Nagkakaisang Maturanoc

31/10/2026

BARANGAY ASSEMBLY DAY SA MATURANOC, MATAGUMPAY NA NAIDAOS

Matagumpay at maayos po nating isinagawa ang Barangay Assembly Day para sa 2nd Semester CY 2026 nitong Sabado, October 31, 2026, sa Maturanoc Umali Gym.

Sa nasabing pagtitipon, inilahad ng mga opisyal ng ating barangay ang mga programang naisakatuparan, mga kasalukuyang proyekto at serbisyong patuloy na ipinagkakaloob sa mga residente, gayundin ang mga plano at programang nakatakdang isakatuparan sa mga susunod na panahon.

Naging pagkakataon din ito upang maipabatid sa mga mamamayan ang mahahalagang impormasyon tungkol sa pamamahala ng ating pamunuan, gayundin upang marinig ang kanilang mga katanungan, suhestiyon at pananaw para sa patuloy na pag-unlad ng ating komunidad.

Ang matagumpay na pagsasagawa ng Barangay Assembly ay patunay ng kahalagahan ng bukas na komunikasyon, transparency at aktibong pakikilahok ng bawat mamamayan sa mga usaping may kinalaman sa ating Barangay Maturanoc.

Taos-pusong pasasalamat po sa lahat ng residenteng naglaan ng oras at nakiisa sa pagtitipong ito. Ang inyo pong pakikilahok ay mahalagang bahagi ng isang bukas, responsable at nagkakaisang pamayanan.

Sama-sama po tayo sa patuloy na paglilingkod, pagkakaisa at pag-unlad ng Barangay Maturanoc!

29/10/2026

⚠️ BABALA SA MGA RESIDENTE NG MATURANOC: MAG-INGAT SA BUDOL-BUDOL MODUS!

Pinag-iingat po ang lahat ng residente ng Barangay Maturanoc matapos maiulat ang isang insidente ng umano’y budol-budol modus sa ating barangay.

Ayon po sa ulat, may isang indibidwal na nagkunwaring nagtatanong kung may binebentang gamot ang ating residente. Sa pamamagitan nito, nakuha umano ng suspek ang tiwala ng ating ka-barangay at nakakuha ng pera mula rito.

Dahil dito, pinaaalalahanan po ng ating pamunuan ang bawat isa na manatiling alerto at mapagmatyag. Maging maingat sa pakikitungo at huwag basta magpapapasok o magtitiwala sa mga hindi kilalang tao.

Kung may kahina-hinalang tao o pangyayari po sa inyong lugar, agad po itong ipagbigay-alam sa mga kinauukulan.

Maging mapagmatyag, mag-ingat, at magtulungan po tayo upang mapanatiling ligtas ang ating komunidad.

Ang kaligtasan ng bawat residente ay mahalaga!

— Sangguniang Barangay ng Maturanoc

26/10/2026

🏆 CONGRATULATIONS, MATURANOC WOMEN’S VOLLEYBALL TEAM! 🏐

Taos-pusong pagbati sa ating mga kampeon sa pagkamit ng CHAMPION TITLE sa Bagong Guimba Sports Fest! Ipinagmamalaki kayo ng ating pamunuan sa pangunguna ni PB Raul Romano, gayundin ng buong pamayanan ng Maturanoc!

Muli, congratulations, mga kampeon! Patuloy ninyong dalhin ang karangalan sa ating minamahal na Maturanoc! 💚🏐

24/10/2026

📢 PAALALA | PANSAMANTALANG PAGKAWALA NG ILAW SA STREET LIGHTS SA PUROK 2 LOOBAN

Nais po naming ipaalam sa lahat ng residente ng Purok 2 Looban na pansamantalang hindi gumagana ang mga street lights sa nasabing lugar dahil sa nasirang linya ng kuryente na may kaugnayan sa ating street light system.

Kami po ay taos-pusong humihingi ng paumanhin sa anumang abala o pagkabahalang maaaring idulot nito sa ating mga residente.

Maraming salamat po sa inyong pang-unawa at patuloy na pakikiisa.

SANGGUNIANG BARANGAY NG MATURANOC 💚

24/10/2026

📣 ANUNSIYO | BARANGAY ASSEMBLY DAY 2026 🇵🇭

TARA NA, MATURANOC! MAKILAHOK, MAKIALAM, AT MAKIBAHAGI!

Inaanyayahan po ang lahat ng mga residente ng Barangay Maturanoc na dumalo sa gaganaping BARANGAY ASSEMBLY DAY – 2ND SEMESTER, CY 2026 sa darating na Oktubre 31, 2026 (Sabado), ganap na ika-2:00 ng hapon sa Maturanoc Umali Gym.

Ang Barangay Assembly ay isa pong mahalagang pagkakataon upang maipabatid sa mga mamamayan ang mga programa, proyekto, gawain, at mahahalagang usaping may kaugnayan sa pamamahala ng ating barangay.

Ito rin po ay nagsisilbing bukas na talakayan kung saan maaaring maipahayag ng mga residente ang kanilang mga saloobin, mungkahi, at katanungan para sa ikabubuti ng ating pamayanan.

Sa pangunguna ng ating Punong Barangay Raul C. Romano, kasama ang buong Sangguniang Barangay, patuloy po nating pinahahalagahan ang aktibong pakikilahok ng bawat mamamayan, sapagkat ang maayos na pamamahala ay nagsisimula sa bukas na komunikasyon, pagtutulungan, at pagkakaisa.

Kaya naman, inaasahan po ang inyong pagdalo at pakikiisa!

📅 Petsa: Oktubre 31, 2026 (Sabado)
🕑 Oras: 2:00 PM
📍 Lugar: Maturanoc Umali Gym

Maturanoc… Matapat. Matuwid. Matatag.

22/10/2026

Gusto mo bang magkaroon ng libreng skills training at matuto ng bagong kasanayan?

Mag-register na sa PESO Guimba!
Maging isa sa mga TESDA Scholars at samantalahin ang pagkakataong makakuha ng:

✅ Free Tuition Fee
✅ Free Assessment Fee
✅ Free Allowance
✅ Free Tool Kit

🧵 Dressmaking NC II
📌 25 slots available | 35 days training

Huwag palampasin ang pagkakataong ito!
Mag-register na sa PESO Guimba at simulan ang paghubog ng iyong kasanayan para sa mas magandang oportunidad sa trabaho at kabuhayan.

20/10/2026

CONGRATULATIONS TO OUR NEW REGISTERED CHEMICAL TECHNICIAN!👨‍🔬🥳

MARJUNE AXEL SUMANGIL DOMINGO, RChT

Congratulations on passing the October 2026 Chemical Technicians Licensure Examination! Your hard work, dedication, and perseverance have finally paid off.

You are truly a PRIDE OF MATURANOC! We celebrate this incredible achievement with you and wish you a successful and meaningful journey as a Registered Chemical Technician. ✨

MATURANOC ANG PINAGMULAN, TAGUMPAY ANG PATUTUNGUHAN! 💙💚

13/10/2026

12/10/2026

UPDATE: CUT OFF na po ang application for registration para sa national ID dito sa ating barangay hall. Napuno na po ang 50 slots na nakalaan ngayong araw.

11/10/2026

📣 ABISO SA MGA RESIDENTE

Sa mga nais pong magparehistro o mag-update tungkol sa request na temporary ID para sa National ID (PhilSys), narito po sa ating Barangay Hall ang mga kawani ng PSA PhilSys upang magbigay ng serbisyo.

📅 Petsa: Lunes, Oktubre 12, 2026
⏰ Oras: 8:00 AM – 4:00 PM
📍 Lugar: Barangay Hall ng Maturanoc

📌 PAALALA:
Limitado lamang po sa 25 indibidwal sa umaga at 25 indibidwal sa hapon ang maaaring ma-accommodate.

FIRST COME, FIRST SERVED po ang pagbibigay ng serbisyo.

📄 MGA DAPAT DALHIN:

* Para sa mga nasa hustong gulang (Adult): Anumang valid ID
* Para sa mga bata (Minor): Birth Certificate

Maraming salamat po sa inyong pakikiisa!