12/11/2025
𝐂𝐎𝐌𝐄𝐋𝐄𝐂 𝐒𝐓𝐀𝐓𝐄𝐌𝐄𝐍𝐓 | 𝟏𝟐 𝐍𝐨𝐯𝐞𝐦𝐛𝐞𝐫 𝟐𝟎𝟐𝟓
𝐔𝐊𝐎𝐋 𝐒𝐀 𝐃𝐄𝐒𝐈𝐒𝐘𝐎𝐍 𝐍𝐆 𝐊𝐎𝐑𝐓𝐄 𝐒𝐔𝐏𝐑𝐄𝐌𝐀 𝐍𝐀 𝐏𝐈𝐍𝐀𝐆𝐓𝐈𝐁𝐀𝐘 𝐀𝐍𝐆 𝐁𝐀𝐓𝐀𝐒 𝐑𝐄𝐏𝐔𝐁𝐋𝐈𝐊𝐀 𝐁𝐋𝐆. 𝟏𝟐𝟐𝟑𝟐
Intramuros, Manila – Ikinagagalak ng Komisyon sa Halalan ang napapanahong desisyon ng Korte Suprema kung saan pinagtibay nito ang Batas Republika Bilang 12232 (Republic Act No. 12232).
Ayon sa Korte Suprema, ang R.A. No. 12232 ay sumasang-ayon sa ating Saligang Batas dahil sa mga sumusunod:
1.) May kapangyarihan ang Kongreso na magtakda ng termino ng mga opisyal ng Barangay sa ilalim ng Artikulo X, Seksyon 8 ng Saligang Batas. Hindi nakatali ang mga opisyal ng Barangay sa 3 taong termino na nag-aapply sa ibang mga halal na lokal na opisyal. Kabilang rin sa kapangyarihang ito ang pagpasya kung kailan magsisimula ang termino ng mga opsiyal ng Barangay.
2.) Ang R.A. No. 12232 ay isang “term-setting law”. Hindi ito isang batas na nagpapaliban ng halalan at nagkataon lamang ang pagbabago ng Araw ng Halalan para sa Barangay at Sangguniang Kabataan Elections (BSKE) kaya hindi maaaring i-apply ang Macalintal guidelines o ang mga parameter na kailangang sundin ng Kongreso sa pagbabaliban ng halalan.
3.) Walang paglabag sa karapatang bumoto. Hindi binuwag o sinuspinde ng walang katiyakan ang BSKE. Nagkaroon lamang ng pagbabago sa agwat ng pagsasagawa nito mula sa kada 3 taon ay naging kada 4 na taon. Nananatiling “regular, periodic, at certain” ang halalan.
4.) Ang R.A. No. 12232 ay hindi discriminatory na batas. Hindi maituturing na diskriminasyon ang pagbibigay ng isang batas ng pabor na pagtrato sa mga opisyal ng Barangay kung ito mismo ay pinahihintulutan ng Saligang Batas.
Sa paglabas ng desisyong ito, nagpahayag ng kanyang kaginhawaan si COMELEC Chairman George Erwin M. Garcia, “This, hopefully, would finally put an end to endless speculations concerning the BSKE. Now that the SC have spoken, the COMELEC can now focus on our timelines and our preparations”.
Isasagawa ang susunod na Barangay at Sangguniang Kabataan Elections sa unang Lunes ng Nobyembre 2026 o sa November 2, 2026, at sa tuwing ika-4 na taon pagkatapos nito.
