Narvacan Naisangsangayan

27/10/2026

Narvacan BHW training, naiwayat

Ginasut a Barangay Health Workers ti Narvacan ti nakipartisipar iti naiwayat a training itay Oktubre 27, 2026 iti Municipal Covered Court. Nagbinnulig ti LGU Narvacan, nga idauluan ni Mayor Dra Edna Cabalo Sanidad, Department of Health, nga idauluan ni Mae Bernardine Belardo Tolentino ken ti Rural Health Unit ti Narvacan, nga idauluan ni Dr. Angelo Gurion, ti naiwayat a training para kadagiti BHW.

Iti panagsarita ni Ms. Tolentino, inlawlawagna dagiti napintas a damag para kadagiti BHW. Karaman ditoy ti maited kadakuada a benepisio, ken umawatda iti seritipiko ken ti panakairehistroda a kas BHW. Impakaammona pay a dagiti addaanen iti tallo a tawen nga agserserbi kas BHW, ad-adalenda iti Senado ti Senate Bill 1905 a mangted benepisio kadagiti BHW a maikkan ti minimum monthly allowance a P3,000, P5,000 ken P10,000, depende iti kabayagda iti serbisio.

Iti training/seminar naibinsabinsa dagiti annongen dagiti BHW. No ania dagiti aramidenda no adda masakit, a nasken ti Root Case Analysis (RCA) maipanggep iti sakit. Nayadal pay kadakuada no kasano a makontrol ti impeksion, ti panagdaldalus kas iti umno a panagbuggo iti ima, panggep ti ubo-bukabolario ken pananglapped iti panagtakki, kasta met iti pannakaammo panggep ti panag-first aid.

Naipalagip pay nga iti panagbalin a BHW masapul nga addaan iti nasayaat a pannakipatang/pannakilangen kadagiti kabarangayan, adda pannakaammo iti mapaspasamak iti barangay. Dagiti met annongen ti maysa a BHW masapul a community organizer, sakbay a mapan ti Health Care Team ket naisaganan ti komunidad. Adda pannakaammoda iti maipapan iti health care caravan iti barangay. Ken agbalinda a Health Education Promotion Officer iti Barangay ken Frontline health workers. (MARIBEL SABALO MALABAG)

27/10/2026

Pundo ti munisipio ti maiwarwaras a fuel subsidy – Mayora Sanidad

Agtultuloy ti panagiwaras ti LGU Narvacan, iti panangidaulo ni Mayora Edna Cabalo Sanidad, DMD, iti fuel subsidy para kadagiti mannalon iti lokalidad ti Narvacan a kas direkta a tulong ti gobierno lokal.

Idi Oktubre 26, 2026, iti pannakaiwaras ti gas slip nga isakada dagiti umili iti krudo, kinuna ni Mayora Sanidad a sapasap a matulongan dagiti mannalon.

“Aggapu iti munisipio, pundo ti gobierno lokal ti maiwarwaras a fuel subsidy,” panangilawlawag ni Mayora Sanidad. “Adda ngamin dagiti sayangguseng nga ibagbagada a naggapu daytoy iti gobierno nasioanl. Saan, apo a pudno dayta. Pundo daytoy ti LGU Narvacan manipud iti apagtayo iti mapaspastrek iti buis ti tabako nga ibingbinglaymi kadagiti dadduma pay a mannalon. Isu nga agyamantayo kadagiti appo a to***co farmers ta mairaman dagiti dadduma pay a mannalon,” kinuna pay ti ina ti ili.

Gas coupon ti maited kadagiti mannalon nga isakadada iti paggasolinaan. Kinuna ni MAO Garry Cardona a depende met iti kalawa ti talon ti maited a fuel subsidy.

Inlawlawag pay ni Mayora Sanidad nga aniaman a pinansial a tulong nga aggapu iti gobierno nasional, saan a maidalan iti gobierno lokal ti Narvacan kas pagallaadan. Diretso daytoy nga iwaras dagiti ahensia a maseknan kadagiti benepisiario a pilien met laeng dagiti maseknan nga ahensia.

26/10/2026

Water Storage Tank, maipasdek
iti Narvacan Farmers Market

Saanton a masayang ti danum manipud iti tudo ta maurnongton tapno pakairanudan a maaramat iti Narvacan Public Market.

Daytoy ti naammuan ken ni Engr. Danny Cabatan, Municipal Engineer ti LGU Narvacan.

Inlawlawag ni Engr. Cabatan a naplano ti proyekto gapu iti pangta ti panagkiddit ti danum gapu iti super el nino. Maisayangkat daytoy babaen ti gobierno lokal ti Narvacan, iti panangidaulo ni Mayora Edna Cabalo-Sanidad, DMD, babaen ti tulong ti Department of Public Works and Highways (DPWH).

Saanton a masayang ken adunto ti pakaaramatan ti danum a maurnong iti water storage tank. Mabalindanto ti agsakdo ta maikkan iti faucet ta gravity tank ti proyekto. Maaramat ti danum a para iti panagdalus iti aglawlaw, iti kasilias, ken pangbuggo ken pangpalayas kadagiti kasapulan a madalusan a paset ti merkado publiko.

Naawagan ti proyekto kas “Construction/Rehabilitation of Water Supply Seepage and Sewerage Rain Water Collection”. Naplano a maipasdek tapno makainut ti LGU iti danum babaen ti pannakaurnong ti tudo.

26/10/2026

Narvacan Cold Storage Facility, nairingpas

Nairingpasen ti Cold Storage Facility iti Narvacan, Ilocos Sur. Gapu itoy manamnama a mairanud dagiti mannalon a Narvacaneans gapu ta addan manamnama a pangikabilanda kadagiti apit ken produktoda a nateng ken prutas tapno makapagbayag ken saan a nadaras a malungsot dagitoy.

Naipatakder ken nadisensio ti Cold Storage Facility nga agaramat iti solar power ken wind turbine tapno saan nga aggastar iti koriente. Naipasdek ti pasilidad iti amianan ti Narvacan Bagsakan Center iti Farmers Market.

Proyekto daytoy ti administrasion ni Mayora Dra Edna Cabalo Sanidad babaen ti tulong ti Department of Agriculture a nangipaay iti pundo ken teknolohia a maaramat.

Prioridad a maka-avail a mangikabil iti produktoda dagiti mannalon iti Narvacan. Nairanta daytoy kadagiti Narvacaneans tapno ad-adda pay a maitag-ay ti kasasaadda, kas impakaammo ni Mayora Sanidad.

“Maisagut kadagiti mannalontayo, isuda ti maipangruna,” kinuna pay ti mayora.

Mainaig itoy, impakaammo ti ina ti ili a saan nga agpatingga ti gobierno lokal nga agpanunot ken mangipasdek kadagiti proyekto a makatulong iti pannakaitag-ay ti panagbiag dagiti umili.

Ti Narvacan, Ilocos Sur ti maysa kadagiti manmano a maibilang a munisipalidad a kaunaan a pakaipatakderan iti Cold Storage Facility iti probinsia kas impakaammo ni Municipal Engineer Cabatan. (Photo credits: Atty. Arnel Cabatu)

26/10/2026

PUBLIC SERVICE

Maipakaammo kadagiti amin a kakabagian, gagayyem, ken makaam-ammo ken ni CRESENCIA BITONIO JACOB ti Limmansangan, Margaay, Narvacan, Ilocos Sur a napanen iti sabali a biag.

Nakamasayag ti bangkayna iti Funerariia Sadiri iti Santa Lucia, Narvacan. Maitabon ti bangkayna itoy a malem ti Oktubre 26, 2026 iti Margaay Cemetery.

Para iti ad-adu pay nga impormasion mabalinyo nga awagan ni Narvacan MSWDO Pauline Cabunoc.

23/10/2026

Maika-126 nga Anibersario ti Aldaw ti Wayawaya ti Narvacan, narambakan

Indauluan ni Mayora Dra Edna Cabalo Sanidad ti pannakailagip ti maika-126 nga anibersario ti Aldaw ti Wayawaya iti Narvacan, Ilocos Sur.

Kadua ni Mayora Sanidad ni SBM Luis Charles Singson, MLGOO Jason Raquel, COP PLt Ramos Reynald, dagiti department heads to LGU Narvacan, dagiti empleado ti munisipio, dagiti kapitan ti barangay, ken dadduma pay a sangaili.

Saan a nakaatendar dagiti kameng ti Sangguniang Bayan nga indauluan ni Bise Mayor Margarito Tejada ta adda inatendaranda a komperensia nasional.

Naiwayat ti simple ngem nakalalagip a programa babaen ti panangidaulo iti kararag ni Pastor Jorge Tabalbag.

Iti panagsarita ni SBM Charles Singson, kinunana a napateg ti pananglagip itoy napateg nga aldaw iti pakasaritaan ti Narvacan ta ilagip ti kinamaingel dagiti bannuar a Narvacanean.

Iti mensahe ni Mayora Sanidad, imbinsabinsana ti kinapateg ti panangrambak ti Aldaw ti Wayawaya iti Narvacan. Nagasat ti Barangay Cadacad, kinunana, ta ditoy ti nangipamatmatan dagiti Narvacanean ti panagkaykaysada, inrupirda, kununana pay, ti kalintegan dagiti umili a nangibunga iti panangidaklerada idi Oct. 23, 1900 ti panagwaywayas ti Narvacan kontra iti panangsakup dagiti Amerikano.

Nagyaman met ni Brgy. Captain Herminia Ballesteros iti isasangbay ken pannakikaykaysa dagiti opisial ti gobierno lokal, iti panangidaulo da Mayora Sanidad ken SBM Singson ken dagiti kapitanes iti Narvacan.

Iti panagsarita ni Eliseo B. Contillo, Information Officer ti LGU Narvacan, insalaysayna ti pakasaritaan ti pannakaideklara ti Aldaw ti Wayawaya iti Narvacan a nangrugi idi Oktubre 19, 1900 idi sentensiaan dagiti Soldado nga Amerikano ni Padre Bello gapu iti pammabasolda a daytoy ti mangsupsuporta kadagiti Katipunero iti Narvacan. Pinatiliw ngamin dagiti Amerikano dagiti lideres iti Narvacan. Imbalud ken pinarigatda dagitoy. Gapu itoy, kinasarita ti padi dagiti cabeza de barangay. Situtured daguti cabeza a nagkaykaysa (malaksid iti maysa) a nangideklara iti panagwaywayas ti Narvacan, nangbutosda kadagiti lider a kontra Amerikano, ken tinambangda dagiti soldado nga Amerikano a rimmaut iti Cadacad.

Indauluan ni Ten. Garcia dagiti Narvacanean a Katipunero a nakiranget kadagiti soldado nga Amerikano a nakapasagan ti adu a saldado nga Amerikano.

Paset pay ti programa ti pannakipaset dagiti Narvacan Elite Zumba Dancers.

Kalpasan ti early packed lunch, indauluan ni Mayora Sanidad ti pannakaiwaras dagiti tumblers kadagiti nagatendar kas sagut ti LGU kadagiti umili nga aramatenda itoy a kalgaw ken panagraira iti super el nino.

22/10/2026

Nangabak iti Bench Cheering
ken Cheerdance Competitions

Paset ti pananglukat ti Narvacan 2026 Sportsfest, naisayangkat ti Bench Cheering Competition kadagiti agad-adal iti elementaria ken Cheer Dance competition iti sekundaria.

Dagitoy ti nangabak iti dua a kompetision:

Bench cheering competion

Champion - Pantoc Elementary School
1st Runner-up - Narvacan North Central School
2nd Runner-up- San Pedro/Nanguneg Elementary School

Minor Awards:

Best in Drums- San Pedro/Nanguneg Elementary School
Best in Cheer - Pantoc Elementary School
Best in Costume - Narvacan North Central School
Best in Host Spirit - Narvacan Catholic School
Most Energetic Team - Pantoc Elementary School

Cheerdance Competition

Champion - Narvacan Catholic School
1st Runner- up - San Pedro National High School
2nd Runner- up - Narvacan National Central High School

Nagun-od amin ti Narvacan Catholic School dagiti Minor Awards
Best in Costume, Best in Musicality, Most Disciplined Team.

Inimatangan ti adu a tattao ti naiwayat a kompetision nupay adda dagiti natalimudaw gapu iti pudot ti panawen, adda met a nakasagana dagiti kameng ti RHU Narvacan ken MDRRMO a nangasikaso kadagitoy.

Inton Oktubre 24 a marugian ti pasalip iti inter-zone iti basketball ken volleyball.

Kas impakaammo ni Mayora Edna Cabalo Sanidad, dakkel ti premio a maited a gunggona kadagiti mapagasatan iti kompetision ken iti pay-ayam a kas insentibo kadakuada tapno ad-adda pay nga asaenda ti talentoda. (Maribel Sabalo Malabag)

22/10/2026