04/10/2026
𝐍𝐈𝐀 𝟔 𝐇𝐔𝐆𝐎𝐓 𝐍𝐆𝐀 𝐆𝐈𝐍𝐀𝐁𝐀𝐍𝐓𝐀𝐘𝐀𝐍 𝐀𝐍𝐆 𝐄𝐏𝐄𝐊𝐓𝐎 𝐒𝐀𝐍𝐆 𝐄𝐋 𝐍𝐈Ñ𝐎 𝐒𝐀 𝐀𝐆𝐑𝐈𝐊𝐔𝐋𝐓𝐔𝐑𝐀; 𝐆𝐈𝐍𝐀𝐓𝐀𝐏𝐎𝐒 𝐍𝐆𝐀 𝐉𝐑𝐌𝐏 𝐈𝐈 𝐒𝐀 𝐂𝐀𝐋𝐈𝐍𝐎𝐆, 𝐇𝐀𝐍𝐃𝐀 𝐍𝐆𝐀 𝐌𝐀𝐆𝐁𝐔𝐋𝐈𝐆 𝐒𝐀 𝐌𝐆𝐀 𝐌𝐀𝐍𝐆𝐔𝐍𝐆𝐔𝐌𝐀
Nagapadayon ang hugot nga pagbantay sang National Irrigation Administration (NIA) 6 sa epekto sang El Niño sa agrikultura.
sa
𝐍𝐈𝐀 𝟔 𝐇𝐔𝐆𝐎𝐓 𝐍𝐆𝐀 𝐆𝐈𝐍𝐀𝐁𝐀𝐍𝐓𝐀𝐘𝐀𝐍 𝐀𝐍𝐆 𝐄𝐏𝐄𝐊𝐓𝐎 𝐒𝐀𝐍𝐆 𝐄𝐋 𝐍𝐈Ñ𝐎 𝐒𝐀 𝐀𝐆𝐑𝐈𝐊𝐔𝐋𝐓𝐔𝐑𝐀; 𝐆𝐈𝐍𝐀𝐓𝐀𝐏𝐎𝐒 𝐍𝐆𝐀 𝐉𝐑𝐌𝐏 𝐈𝐈 𝐒𝐀 𝐂𝐀𝐋𝐈𝐍𝐎𝐆, 𝐇𝐀𝐍𝐃𝐀 𝐍𝐆𝐀 𝐌𝐀𝐆𝐁𝐔𝐋𝐈𝐆 𝐒𝐀 𝐌𝐆𝐀 𝐌𝐀𝐍𝐆𝐔𝐍𝐆𝐔𝐌𝐀
Nagapadayon ang hugot nga pagbantay sang National Irrigation Administration (NIA) 6 sa epekto sang El Niño sa agrikultura.
Kabahin diri ang pagdumala sang tubig sa ginatapos nga Jalaur River Multipurpose Project Stage II (JRMP II) sa Calinog, Iloilo.
Suno kay Steve Cordero, Watershed Management Chief kag Spokesperson para JRMP II, padayon ang pagtipon sang tubig sa reservoir dam para magamit sang mga mangunguma sa tion nga maglala ang kakulang sang ulan.
Sa karon, ang JRMP II nakatipon na sang 116.87 million cubic meter nga tubig kag may ikasarang pa nga makatipon sang masobra 130 million cubic meter antis malab-ot ang lubos nga kapasidad sini nga
250.7 million cubic meter.
Dugang pa ni Cordero, kon maglala gid man ang El Niño kag magapabilin nga bastante ang tubig, ginaplano sang NIA nga magpagwa sang pila ka volume sang tubig halin sa high dam padulong sa mga suba tubtob makalab-ot sa Moroboro Dam kag posible nga makabulig sa mga mangunguma nga makapadayon sa pagtanum, lakip na ang second cropping bisan pa sa epekto sang El Niño.
Kon maglala pa gid ang El Niño kag magkulang ang ulan, ginakonsiderar man sang NIA, katuwang ang Deparment of Agriculture Bureau of Soils and Water Management (DA BSWM) kag Philippine Air Force (PAF), ang cloud seeding bilang isa sa mga tikang para makadugang sa tubig nga matipon sa dam.
Ang nasambit nga cloudseeding ang makaduha ka beses nga ginhiwat sang NIA, DA BSWM kag PAF sa area sang Calinog sang nagligad lang nga Septyembre.
Samtang, padayon ang koordinasyon sang NIA sa mga mangunguma kag pag-engganyo sa ila nga mag-adjust sang schedule sang pagtanum santu sa karon nga suplay sang tubig.
Gina-engganyo man sang ahensya ang mga mangunguma nga magpatuman sang crop diversification ukon magtanum sang mga pananom nga makasarang sa mataas nga temperatura kag posible nga kakulang sang tubig.
Ginaagda man nila ang mga mangunguma nga magparehistro sa Philippine Crop Insurance Corporation (PCIC) agud may dugang nga proteksyon sa ila pananom kon ini ang maapektuhan sang El Niño.
Sa karon, padayon ang pag-ubra sa irrigation component sang JRMP II kag nagdangat na sa 87.64% ang accomplishment rate sang proyekto kag ginapaabot nga matapos nga makumpleto sa gintalana nga target.
Sa pihak nga indi pa lubos nga kumpleto, ang JRMP II nagaalagad na sa 500 ka hektarya sang talamnan sa Calinog kag posible magdangat pa sa 700 tubtob 1,000 ka hektarya antes matapos ang 2026.| JP Hervas, RP1
