12/10/2026
Ligtas na Paaralan, Sama-samang Isusulong: SCNHS, Nakiisa sa National School Safety Week
Sa layuning matiyak ang kaligtasan at kapakanan ng bawat mag-aaral, nakiisa ang Sta. Cruz National High School (SCNHS) sa pagtalima ng National School Safety Week ngayong Oktubre 12, 2026, sa pamamagitan ng isang oryentasyon na isinagawa matapos ang flag ceremony.
Pinangunahan ng Punong-g**o na si G. Joven D. Paitan ang oryentasyon, kung saan binigyang-diin ang kahalagahan ng sama-samang pagkilos upang mapangalagaan ang mga mag-aaral laban sa bullying, karahasan, diskriminasyon, at iba pang banta sa kanilang kaligtasan, alinsunod sa DepEd Order No. 006, s. 2026.
Bilang pagpapakita ng suporta sa adbokasiya, naghatid ng mga mensahe ang mga kinatawan ng iba’t ibang sektor ng komunidad ng paaralan. Kabilang dito si Wilfredo C. Portugal Jr., pangulo ng School Parents-Teachers Association (SPTA); Pastor Ramil Aragon, tagapangulo ng School Governance Council (SGC); Hon. Carmelita Jurilla, kinatawan ni Hon. Julito Gonzales, Punong-Barangay ng Sta. Cruz; Jerick M. Broqueza, pangulo ng Faculty Club; at Jamaica Imperial, pangulo ng Supreme Secondary Learner Government (SSLG).
Sa kanilang mga mensahe, binigyang-diin ng mga kinatawan na ang kaligtasan ng mga mag-aaral ay hindi lamang pananagutan ng mga g**o at pamunuan ng paaralan, kundi tungkulin din ng mga magulang, mag-aaral, at buong komunidad. Itinampok din ang kahalagahan ng paggalang sa kapwa, pagtulong sa mga nakararanas ng bullying, at agarang pagsasabi sa mga nakatatanda o kinauukulan kapag may nasaksihang pang-aabuso o hindi ligtas na sitwasyon.
Sinundan ito ng sama-samang pagbigkas ng Panata para sa Ligtas, Inklusibo at Maalagang Paaralan, na pinangunahan ni Sir Paitan. Sa pamamagitan ng panata, pinagtibay ang pangakong itaguyod ang isang paaralang nagbibigay-halaga sa dignidad ng bawat mag-aaral at hindi kinukunsinti ang bullying, karahasan, at diskriminasyon.
Bilang huling bahagi ng programa, pinangunahan ng mga stakeholders ang paglagda sa School Safety Commitment Wall, na nagsilbing simbolo ng kanilang pagkakaisa at pananagutang makibahagi sa pagpapanatili ng kaligtasan sa paaralan.
Sa pamamagitan ng sama-samang pagkilos ng mga g**o, magulang, mag-aaral, at mga katuwang ng paaralan, muling pinagtibay ng SCNHS ang paninindigang ang kaligtasan ng bawat mag-aaral ay pananagutan ng lahat.
✍️ Jamaica Imperial
📸 Aidrian Ramos, Cherry Mejela Oliva , Ashley Chloe Maderal
