UPAC Camanava - United People Against Corruption

KALBARYO NG MAMAMAYAN NG CAMANAVA WAKASAN, OIL PRICE HIKE TUTULAN!

Taun-taon ay ginugunita natin ang Mahal na Araw (Holy Week), upang alalahanin ang naging dakilang sakripisyo ng isang rebulosyonaryo at Panginoong si Hesukristo para sa buong sansinukob. Ang Kanyang dakilang misyon para iligtas ang tao mula sa matinding kasalanan sa pamamagitan nang pag-alay ng Kanyang buhay ang pinaka-dakilang anyo ng pagmamahal, at wala nang hihigit pa rito. Si Kristo, bilang totoong tao at Diyos, ay pagpapakita ng isang halimbawa para ating sundin para sa kapakanan ng isa’t isa, at ang Krus na Kanyang binuhat ay isang simbolo nang pagpasan ng kasalanan ng tao na kanyang napag-tagumpayan mula sa Kanyang pagpapakasakit, kamatayan, at muling pagkabuhay.

Sa kasalukuyang kalagayan ng mamamayang Pilipino, nabubuhay ito sa isang sistema na araw-araw ay bumubuhat ng krus mula sa pagsasamantala sa kapwa ⎯ kagutuman, kawalan ng katiyakan sa kabuhayan, pagkasira ng kalikasan, korapsyon, pagpaslang, at iba pang kasalanan sa kapwa ay ilan lamang sa mga mabibigat na pasanin ng masang Pilipino dulot ng kasakiman ng tao sa tao. Ang kasakiman ay isa sa mga dahilan kung bakit tayo ay nalalayo sa isang maliwanag na kinabukasan, isang lipunan na malaya sa pagsasamantala at lahat ay nakikinabang.

Pero ang isang mabigat na bagay ay guma-gagaan kapag nag-tulong-tulong ang mga tao upang buhatin ito. Ang sama-samang pagkilos upang ipaglaban ang karapatan at wakasan ang pagsasamantala ay isang halimbawa na itinuturo sa atin ng Panginoon, ang paglilingkod sa kapwa katulad ng ginawa N’yang paghuhugas ng paa sa mga Apostoles noong huling hapunan at pag-alay ng buhay sa Krus, at katulad din ng maningning na pagkabuhay ni Kristo matapos ang tatlong araw ng Kanyang kamatayan, ang hinaharap para sa isang magandang bukas na malaya sa pagsasamantala at kaapihan para sa lahat ng mamamayang Pilipino na makakamit sa pagkakaisa at kolektibong pagkilos ay siyang pag-asa na ating tinatanaw matapos ang kalbaryo na ating pinagdadaanan.

Upang muli nating alalahanin ang naging dakilang sakripisyo, pagpapakasakit, kamatayan, at muling pagkabuhay ng ating Panginoong Hesukristo at mailapat ito sa kasalukuyang kinakaharap ng sambayanang Pilipino, atin pong isagawa ang Estasyon ng Krus: Kalbaryo ng Mamamayan ng CAMANAVA wakasan, OIL PRICE HIKE tutulan

Estasyon ng Krus: Kalbaryo ng Mamamayan ng CAMANAVA wakasan, OIL PRICE HIKE tutulan

Ang Kalbaryo ng Maralita ay isang mobilisasyon tuwing papalapit o sa mga araw ng Mahal na Araw upang ipakita ang pagpasan ng krus ng kalbaryo ng maralita na siyang nagpapahirap sa mga ito. Pinapasan ng masa ang krus na naglalaman ng mga kanilang kalbaryo at pagkatapos ay magkakaroon ng programa upang ipahayag ng maralita ang kanilang mga hinaing at kasalukuyang problema na kanilang pinagdadaanan.

Sa taong ito, ang tema ng Kalbaryo ng Mamamayan ay ESTASYON NG KRUS bilang pagtugon sa kasalukuyang krisis na kinakaharap ng mamamayan ng buong mundo dahil sa nagaganap na digmaan sa pagitan ng US-Israel-Iran. Libu-libong Overseas Filipino Workers (OFWs) ang kasalukuyang nagtatrabaho sa Iran, Lebanon, Abu Dhabi, Israel, at mga karatig na bansa sa Middle East ang kasalukuyang naaapektuhan ng gera na inilulunsad ng US-Israel laban sa Iran. Mga inosenteng buhay ang kapalit sa gerang agresyon ng US-Israel. Sa Pilipinas, bukod sa nalalagay sa panganib ang mga OFW, nakaamba din ang muling pagsirit ng presyo ng langis dahil sa gera. Tinataya na aabot sa Php. 90.00/litro ng Diesel at Gasolina ang magiging presyo sa mga susunod na linggo kung magpapatuloy ang gera sa Middle East. Tiyak na malaking pasanin ito sa mamamayang Pilipino dahil bukod sa presyo ng gasoline ay magtataas din ang presyo ng mga pangunahing gastusin tulad ng pagkain, kuryente, tubig, pamasahe, at iba pa.

Kung gayon, sa darating na mga Mahal na Araw, ating alalahanin ang mga buong mundo sa nangyayaring gera sa buong daigdig (Middle East, Palestine, Ukraine, at iba pa). Ating suportahan ang panawagan ng mahal na Santo Papa Leon XIV ang pagtigil sa gera at solusyonan ang sigalot ng mga bansa sa pamamagitan ng mapayapang dayalogo. Atin ding ipanawagan ang pag-suspinde sa E-VAT at pagtanggal sa VAT na mga pangunahing nagdadagdag sa presyo ng gastusin ng ordinaryong Pilipino. Nanawagan tayo sa ating pamahalaan na agad na tulungan ang mga Pinoy na kasalukuyang apektado ng gera at mailigtas sila sa pinakakagyat upang muli silang makauwi sa kanilang mga pamilyang nag-aantay dito sa bansa. Sa huli, nananawagan tayo sa sambayanan ng Diyos ng patuloy na panalangin, pagkakaisa, pagkalinga, pagtutulungan, at paglaban sa gera at isulong ang kapayapaan batay sa katarungan.

Kaya sa darating na Marso 29, 2026, malugod po namin kayong iniimbitahan na makiisa sa aming aktibidad. Gaganapin po ito sa Monumento sa ganap na 11:30 ng umaga. Ating wakasan KALBARYO NG MAMAMAYAN NG CAMANAVA!

Kahapon nakapagpulong ang United People's Against Corruption - CAMANAVA kaugnay sa gagawing aktibidad para sa "Kalbaryo ng Mamamayan" sa darating na Marso 29.
Noong nakaraan taon sumabog ang galit ng taumbayan sa mga anomalya ng flood control project. Pinagsasamantalahan ang kaban ng bayan. Pinagpipyestahan ang buwis ng mamamayan, imbes ilagay sa libre at batayang serbisyo ay napupunta lang sa mga luho at bisyo ng mga buwaya at buwitre sa gobyerno.

Samantala, pinangunahan ng UPAC camanava ang maikling protesta at programa hinggil sa pagkondena sa sunod sunod na pagtaas ng presyo ng langis, nitong martes ang ika siyam na beses na pagtaas nito. Ang Oil Price Hike ay kongkretong anyo ng pagpapakapapet ng rehimeng Marcos sa imperyalistang US. Kaya ang panawagan ng mamamayan, hindi pagsuspendi kundi tuluyang tanggalin ang VAT at excise tax sa langis.

Oil Deregulation Law, Ibasura!
Sahod itaas, presyo ibaba!
Presyo ng langis, ibaba i roll back!

𝗨𝗻𝗶𝘁𝗲𝗱 𝗣𝗲𝗼𝗽𝗹𝗲 𝗔𝗴𝗮𝗶𝗻𝘀𝘁 𝗖𝗼𝗿𝗿𝘂𝗽𝘁𝗶𝗼𝗻 (𝗨𝗣𝗔𝗖) 𝗖𝗔𝗠𝗔𝗡𝗔𝗩𝗔 𝗧𝘂𝗹𝗼𝘆 𝗔𝗻𝗴 𝗟𝗮𝗯𝗮𝗻!

Naglunsad ng pagkilos ang UPAC CAMANAVA at mga programa ng pagkondena sa katiwalian, at pasismo na nangyayari sa mga lungsod ng Caloocan, Malabon, Navotas, at Valenzuela sa Monumento at 5th Avenue LRT Station.

"Sa halip na makulong ang mga kurakot at magnanakaw, ay sinikil pa lalo ang mga lumalaban sa korapsyon kagaya ng Gabriela North Caloocan na hinuli at minamanmanan." Leticia Castillo, UPAC CAMANAVA

Sobrang galit ang ipinalkita naman ni David D'Angelo ng Green Party of the Philippines na isa rin sa convenor ng UPAC CAMANAVA, "Kailan pa mababago ang sistemang ito. May mga namamatay na pero wala pa rin nalukulong at napapanagot."

Ang pagkilos ay bahagi ng Lakbayan Laban sa Korapsyon na ikinasa ng iba't-ibang grupo at nagtuloy sa Liwasang Bonifacio at Mendiola noong Nobyember 7, 2025.

Nakiisa ng UPAC Camanava sa Lakbayan ng mamamayan kontra korapsyon noong Nov 7, matatandaang bumuyangyang sa socmed, pahayagan at television ang garapalang korapsyon ng mga kontraktor sa usapin ng flood control budget. Lumaon dahil sa imbistigasyon ay dumami ang naging sangkot dito at nasa matataas pa na opisyales ng pamahalaan.

Nakakadismaya lang dahil sa kabila ng nagaganap na usap sa kamara at senado hanggang ngayon ay wala pa ring napapanagot.! Kaya kami sa, United People's Against Corruption (UPAC) ay hindi titigil kahit araw arawin pa ang panawagang lahat ng sangkot sa korapsyon ay dapat managot!