02/04/2022
ရေပေါ်ဆီသင်္ကြန် (သို့) ဘောမသင်္ကြန်
ယခုကာလဟာ စစ်အာဏာရှင်စနစ်ကိုတွန်းလှန်ဖြိုဖျက်ဖို့ တော်လှန်ရေးဇောက်နက်ထဲကို ရဲရဲဝံ့ဝံ့ဆင်းပြီး ကိုယ်ကျိုးစွန့်ကာ တိုင်းပြည်ကို ကယ်တင်ဖို့ ကြိုးစားနေတဲ့ တော်လှန်ရေးရဲဘော်တွေ၊ ဆန္ဒပြပြည်သူတွေ၊ အဖိနှိပ်ခံတွေ၊ အခြေခံလူတန်းစားတွေနဲ့ စစ်ရှောင်ဒေသက အိုးမဲ့အိမ်မဲ့ဒုက္ခသည်တွေအတွက် ခက်ခဲကြပ်တည်းဆုံး အချိန်ကိုရောက်နေပြီဖြစ်ပါတယ်
ကျဆုံးခဲ့ရတဲ့သူရဲကောင်းတို့အတွက် လွမ်းဆွတ်သံများ ငိုကြွေးသံများမှာလည်း မတိတ်သေး။ ပေတရာထက်ကသွေးစီးကြောင်းများသည်လည်း မခြောက်သေးပေ။
ယခုလိုအချိန်မှာ အချို့သောသူများမှာတော့ ကောက်ရိုးမီးပမာ ဟန်ဆောင်ခံစားပြခဲ့ကြပြီး တော်လှန်ရေးအောင်မြင်ရေးအတွက် ထိုသူရဲကောင်းတို့ ပေးဆပ်ခဲ့ရခြင်းနှင့် ဆန့်ကျင်ဘက်လုပ်ရပ်များကို ပြောင်ပြောင်တင်းတင်းလုပ်ဆောင်လာနေကြပြီဖြစ်ပါတယ်
နှစ်ကူးကာလလည်း နီးကပ်လာသည်နှင့်အမျှ သင်္ကြန်ပိုးဝင်နေသော အယောင်ဆောင်တို့မှာ လူ့အသိစိတ်ရှိလျှင် လူသားချင်းညှာတာထောက်ထားတတ်သောစိတ်သာရှိလျှင် သွေးအေးနိုင်ကြမည် မဟုတ်ပါ
အခြေခံလူထုတစ်ရပ်လုံးရဲ့ ဒုက္ခပဋိပက္ခတွေကို လျစ်လျှူရှုနိုင်လောက်အောင် ပြည့်စုံနေသော ပြည်သူ့အရေးငါ့အရေးမဟုတ်သော ရေပေါ်ဆီလူတန်းစားနှင့် ဘောမလောက်ကောင်များသာလျှင် သင်္ကြန်ပွဲတော်ကို ပျော်ရွှင်စွာဆင်နွှဲဖို့ ရဲဝံ့ကြပါပေလိမ့်မည်။
ပြည်မရဲ့လမ်းတွေပေါ်မှာ လူ့အယုတ်တမာတို့ရဲ့ ရက်စက်ကြမ်းကြုတ်မှုကြောင့်
ကြေလွင့်ခဲ့ရတဲ့ အသက်ဝိညာဥ်တွေရဲ့ ငိုကြွေးသံတွေ ဘယ်လောက်တောင်ကျယ်လောင်နေပါလိမ့်...
ဒီလမ်းတွေပေါ်မှာ သင်ကိုယ်တိုင်ရေပက်ခံထွက်ပြီး တော်လှန်ရေးဝိညာဥ်တွေကိုစော်ကားမည်လော...?
တောင်တန်းဒေသတွေမှာ ယခုတိုင် အစာရေဆာပြတ်လပ်ပြီး ခိုလှုံနားခိုရာမဲ့ဖြစ်နေတဲ့ စစ်ဘေးရှောင်တိုင်းရင်းသားတွေခမျာ ဘယ်နေ့အသက်ဆုံးရှုံးရမလဲ မသိ ကြောက်တရားနဲ့ ရှင်သန်နေရတဲ့နေ့တွေ...ဘယ်လောက်တောင်ကြာမြင့်နေပါလိမ့်...
ဒါကိုသင်က "ငါ့လှေငါထိုးပဲခူးရောက်ရောက်" လုပ်ပြီး သင်္ကြန်အချိန်အခါကိုပျော်ပျော်ကြီး ကျော်ဖြတ်မည်လော...?
မြန်မာနိုင်ငံ၏အမှောင်မိုက်ဆုံးသော အကျည်းတန်ဆုံးသော အချိန်ကာလ…
တစ်တိုင်းပြည်လုံး အသုဘအိမ်ဖြစ်နေတဲ့ ကာလ…
ပြည်သူအပေါင်း နေ့စဥ်ရက်ဆက် စိတ်ဆင်းရဲကိုယ်ဆင်းရဲပြီး သွေးမြေကျနေရသည့် ဤကာလတွင် အပျော်အပျက်တွေကို လျှော့ချရမည်မှာ ပြည်သူတစ်ဦးတိုင်း၏ တာဝန်ဖြစ်ပါသည်
ဒါ့ကြောင့် "သွေးသင်္ကြန်"ကို မဆင်နွှဲဘဲ တော်လှန်ရေးကိုဆုံးခန်းတိုင်အောင် အရောက်သွားရမည့် "အတွေးမှန်" ကို ရင်တွင်ပိုက်ရန် အဓမ္မဝါဒကိုဆန့်ကျင်သော ပြည်သူပြည်သားတို့အား ဆော်ဩလိုက်ရပါတော့သည်။
#ရေပေါ်ဆီသင်္ကြန်
#ဘောမသင်္ကြန်
#သွေးသင်္ကြန်နဲ့အတွေးမှန်

22/03/2022
06/02/2022
06/02/2022
06/02/2022
06/02/2022