Pasig City Cooperative Development Office

𝐆𝐀𝐃 𝐂𝐡𝐚𝐦𝐩𝐢𝐨𝐧 𝐨𝐟 𝐭𝐡𝐞 𝐌𝐨𝐧𝐭𝐡: 𝐔𝐑𝐂 𝐄𝐦𝐩𝐥𝐨𝐲𝐞𝐞𝐬 𝐂𝐫𝐞𝐝𝐢𝐭 𝐂𝐨𝐨𝐩𝐞𝐫𝐚𝐭𝐢𝐯𝐞 — 𝐏𝐢𝐧𝐚𝐥𝐚𝐤𝐚𝐬 𝐚𝐧𝐠 𝐊𝐚𝐚𝐥𝐚𝐦𝐚𝐧 𝐬𝐚 𝐆𝐞𝐧𝐝𝐞𝐫 𝐒𝐞𝐧𝐬𝐢𝐭𝐢𝐯𝐢𝐭𝐲 𝐓𝐫𝐚𝐢𝐧𝐢𝐧𝐠 💜

Noong ika-27 ng Mayo 2026, isang makabuluhang hakbang tungo sa pagsusulong ng gender equality at inclusivity ang isinagawa ng URC Employees Credit Cooperative (URCEMPCO) sa pamamagitan ng kanilang Gender Sensitivity Training para sa mga miyembro mula sa Cabuyao, Laguna. Sa pamamagitan ng aktibidad na ito, muling ipinakita ng kooperatiba ang kanilang malasakit at dedikasyon sa paglikha ng isang ligtas, patas, at gender-responsive na komunidad para sa lahat.

Pinangunahan ang pagsasanay ni G. John Troy Sunga, Officer-in-Charge ng Pasig City Cooperative Development Office (CDO), kasama sina Bb. Cassandra Gabrielle A. Salangsang at Gng. Raquel Dela Cruz. Tinalakay sa programa ang kahalagahan ng gender sensitivity, paggalang sa karapatan ng bawat isa, at ang papel ng bawat miyembro sa pagsusulong ng inklusibo at makataong pakikitungo sa loob ng kooperatiba at komunidad.

Naging makabuluhan ang aktibidad dahil sa aktibong pakikilahok ng mga miyembro na nagbahagi ng kanilang mga karanasan at pananaw tungkol sa gender awareness at equality, gayundin sa mga workshop na isinagawa sa programa. Sa pamamagitan ng bukas na talakayan at palitan ng ideya, higit na napalawak ang kaalaman at napagtibay ang pagkakaisa ng mga kalahok tungo sa mas inklusibo at maayos na samahan.

Isang taos-pusong pagbati sa URC Employees Credit Cooperative (URCEMPCO) bilang GAD Champion of the Month! Patuloy kayong nagsisilbing huwaran sa pagtataguyod ng gender responsiveness, inclusivity, at people-centered service sa loob ng kilusang kooperatiba 💜

𝐏𝐚𝐬𝐢𝐠 𝐂𝐃𝐎 𝐚𝐭 𝐏𝐅𝐂𝐂𝐎-𝐍𝐂𝐑, 𝐤𝐚𝐭𝐮𝐰𝐚𝐧𝐠 𝐬𝐚 𝐦𝐚𝐬 𝐦𝐚𝐥𝐢𝐧𝐚𝐰 𝐚𝐭 𝐦𝐚𝐬 𝐞𝐩𝐞𝐤𝐭𝐢𝐛𝐨𝐧𝐠 𝐩𝐚𝐦𝐚𝐦𝐚𝐡𝐚𝐥𝐚: 𝐂𝐫𝐞𝐝𝐢𝐭 𝐚𝐧𝐝 𝐑𝐢𝐬𝐤 𝐌𝐚𝐧𝐚𝐠𝐞𝐦𝐞𝐧𝐭 𝐒𝐞𝐦𝐢𝐧𝐚𝐫, 𝐢𝐬𝐢𝐧𝐚𝐠𝐚𝐰𝐚 𝐩𝐚𝐫𝐚 𝐬𝐚 𝐦𝐠𝐚 𝐤𝐨𝐨𝐩𝐞𝐫𝐚𝐭𝐢𝐛𝐚

Naging makabuluhan at puno ng bagong kaalaman ang isinagawang seminar na “Credit and Risk Management for Cooperatives” noong ika-26 ng Mayo 2026 sa Pasig Creative Arts Academy, bilang bahagi ng partnership ng Pasig City Cooperative Development Office (CDO) at Philippine Federation of Credit Cooperatives - NCR.

Dinaluhan ito ng mga kinatawan mula sa iba’t ibang kooperatiba upang higit na mapalawak ang kanilang kaalaman sa wastong pamamahala ng credit at panganib sa kanilang mga organisasyon.

Pormal na binuksan ang programa ni G. Zymoun Delos Reyes bilang Master of Ceremony, na sinundan ng welcome remarks ni G. Troy Sunga, Officer-in-Charge ng Pasig CDO. Sa kanyang mensahe, binigyang-diin niya ang kahalagahan ng patuloy na paglinang sa kakayahan ng mga kooperatiba upang manatiling matatag, responsable, at handa sa iba’t ibang hamon sa larangan ng pananalapi at pamamahala.

Naging sentro ng seminar ang talakayan ni Resource Speaker na si G. Roy Raian Joson, CPA mula sa PFCCO-NCR, kung saan kanyang ibinahagi ang mahahalagang konsepto ukol sa risk assessment, loan evaluation, responsableng pagpapautang, at mga epektibong paraan ng credit management para sa mga kooperatiba. Naging mas interaktibo rin ang aktibidad sa pamamagitan ng workshop activities na nagbigay pagkakataon sa mga kalahok na mailapat ang kanilang mga natutunan sa mga praktikal na sitwasyon.

Samantala, nagbigay naman si Gng. Ma. Lourdes Benavides Cabuntas ng isang maikling coopmercial na nagtatampok sa mga programa, serbisyo, at benepisyong hatid ng PFCCO-NCR para sa mga kooperatiba.

Nagtapos ang seminar sa closing remarks ni G. Nathaniel Andre I. Cadampog, kung saan kanyang pinasalamatan ang mga kalahok at partner organizations sa matagumpay na pagsasagawa ng aktibidad. Sa kabuuan, naging mahalagang hakbang ang seminar upang higit pang mapalakas ang kaalaman at kakayahan ng mga kooperatiba tungo sa mas epektibo at napapanatiling serbisyong pampinansyal para sa kanilang mga miyembro.

𝐒𝐚 𝐆𝐢𝐭𝐧𝐚 𝐧𝐠 𝐊𝐚𝐥𝐬𝐚𝐝𝐚, 𝐌𝐚𝐲 𝐊𝐚𝐚𝐠𝐚𝐩𝐚𝐲: 𝐀𝐏𝐄𝐂𝐂 𝐅𝐮𝐞𝐥 𝐒𝐮𝐛𝐬𝐢𝐝𝐲, 𝐇𝐚𝐭𝐢𝐝-𝐆𝐢𝐧𝐡𝐚𝐰𝐚 𝐬𝐚 𝐏𝐌𝐐-𝐓𝐒𝐂

Isang makabuluhan at makataong inisyatiba ang isinagawa sa pamamagitan ng Fuel Subsidy Assistance Program ng ASA Philippines Employees Credit Cooperative (APECC) para sa Pasig Mandaluyong Quiapo Transport Service Cooperative (PMQ-TSC), bilang patuloy na suporta sa kabuhayan ng mga miyembro ng sektor ng transportasyon.

Ginanap ang turnover sa Caltex Sandoval Avenue, Pinagbuhatan, Pasig noong ika-23 ng Mayo 2026, kung saan maayos at maaliwalas ang naging daloy ng programa mula sa pagbubukas haanggang sa pag-abot ng tulong sa mga benepisyaryo.

Sa kabuuan, nagkaloob ang APECC ng Fuel Subsidy Assistance para sa 30 modern jeepney units, sa halagang ₱3,000 kada unit, o kabuuang ₱90,000, bilang direktang tulong sa gastusin sa araw-araw na biyahe at operasyon ng mga tsuper.

Binuksan ni G. Zymoun Benedict Delos Reyes mula sa Pasig City Cooperative Development Office, ang maikling programa bilang Master of Ceremony. Sinundan naman ito ng welcome remarks ni G. Ferdinand U. Jikiri, Chairperson ng APECC, kung saan binigyang-diin niya ang layunin ng APECC na maipagkaloob ang Fuel Subsidy Assistance bilang konkretong suporta sa mga tsuper ng PMQ-TSC, na naglalayong magbigay-ginhawa sa kanilang araw-araw na operasyon at makatulong sa patuloy na pagtaas ng gastusin sa kabuhayan at biyahe.

Nagpahayag rin ng pasasalamat si G. Benjamin Alvares Jr., Vice Chairperson ng PMQ-TSC, na binigyang-diin ang agarang epekto ng tulong sa kanilang mga tsuper, na araw-araw na lumalaban para sa kabuhayan ng kanilang pamilya.

Sa mensahe ni Bb. Cassandra Gabrielle A. Salangsang na mula rin sa Pasig CDO, kanyang pinasalamatan ang APECC sa patuloy na suporta sa PMQ-TSC. Binigyang-diin niya na ang ganitong programa ay malinaw na sumasalamin sa diwa ng Cooperation Among Cooperatives, kung saan ang pagkakaisa ng mga kooperatiba ay nagbubunga ng konkretong tulong at tunay na benepisyo para sa mga miyembro ng sektor ng transportasyon.

Habang ipinaabot naman ni Engr. Maricel R. Pansoy, Operations Adviser at Officer-in-Charge ng APECC, ang patuloy na suporta ng kooperatiba sa mga programang naglalayong palakasin ang sektor ng transportasyon. Aniya, ang ganitong inisyatiba ay patunay ng buhay na diwa ng Cooperation Among Cooperatives, kung saan ang pagtutulungan ay nagiging konkretong aksyon para sa kapakanan ng mga miyembro at komunidad.

Gayunpaman, dahil 24 lamang ang aktwal na modern jeepney units na kasalukuyang tumatakbo sa PMQ-TSC, nagkaroon ng kakulangan para sa 6 na benepisyaryo, na katumbas ng halagang ₱18,000.00, na kinilala upang maayos na maitugma ang assistance sa aktwal na bilang ng mga units.

Ang naturang programa ay muling nagpatunay na sa bawat biyahe, sa bawat kalsada, at sa bawat kooperatiba — may kaagapay na handang umalalay at maghatid ng pag-asa.

#

𝐊𝐎𝐎𝐏𝐄𝐑𝐀𝐓𝐈𝐁𝐀, 𝐌𝐀𝐘 𝐎𝐑𝐀𝐒 𝐏𝐀! 📢

Hindi pa huli ang lahat — extended hanggang 𝐌𝐚𝐲 𝟑𝟏, 𝟐𝟎𝟐𝟔 ang pagsusumite ng FY 2025 Reports nang walang penalty, alinsunod sa CDA Memorandum Circular No. 2026-07.

Kasama rin sa extension ang validity ng mga Certificate of Compliance (COC) na nag-expire noong April 30, 2026.

Kung hindi pa kumpleto ang inyong requirements, maaari pa itong habulin at ayusin sa loob ng extension period.

Samantalahin na natin ang dagdag na panahon upang makapagpasa nang maayos at kumpleto.

Huwag nang hintayin ang last minute!

𝐊𝐎𝐎𝐏 𝐊𝐍𝐎𝐖𝐒: 𝐃𝐄𝐀𝐃𝐋𝐈𝐍𝐄 𝐄𝐗𝐓𝐄𝐍𝐃𝐄𝐃 📢

Upang mabigyan ng sapat na panahon ang mga kooperatiba sa pagsunod sa mga kinakailangang ulat, pinalawig ng Cooperative Development Authority, sa ilalim ng CDA Memorandum Circular No. 2026-07, ang submission ng FY 2025 reports hanggang May 31, 2026 na walang penalty.

Pinalawig din ang bisa ng mga Certificate of Compliance (COC) na nakatakdang mag-expire sa April 30, 2026, kaya’t mananatili itong valid hanggang May 31, 2026.

Ito ay kaugnay ng Executive Order No. 110 at aprubado sa ilalim ng Board Resolution No. 161, s. 2026.

Para sa mga kooperatibang hindi pa nakakapagsumite, hinihikayat silang agad na i-adjust ang kanilang internal schedules at tapusin ang kinakailangang requirements sa loob ng itinakdang bagong deadline.

—
Sanggunian / Basahin ang buong anunsyo ng CDA dito: https://www.facebook.com/share/p/1DucnHMVN2/

𝐏𝐚𝐠𝐭𝐚𝐭𝐚𝐠𝐩𝐨 𝐧𝐠 𝐥𝐚𝐲𝐮𝐧𝐢𝐧 𝐚𝐭 𝐬𝐞𝐫𝐛𝐢𝐬𝐲𝐨: 𝐑𝐓𝐔-𝐄𝐂𝐒𝐎 𝐚𝐭 𝐏𝐚𝐬𝐢𝐠 𝐂𝐃𝐎, 𝐧𝐚𝐠𝐤𝐚𝐢𝐬𝐚 𝐬𝐚 𝐢𝐬𝐚𝐧𝐠 𝐄𝐱𝐩𝐥𝐨𝐫𝐚𝐭𝐨𝐫𝐲 𝐌𝐞𝐞𝐭𝐢𝐧𝐠 𝐩𝐚𝐫𝐚 𝐬𝐚 𝐦𝐚𝐬 𝐩𝐢𝐧𝐚𝐠𝐚𝐧𝐝𝐚𝐧𝐠 𝐬𝐞𝐫𝐛𝐢𝐬𝐲𝐨

Isang kapana-panabik na pagtutulungan ang kasalukuyang binubuo sa pagitan ng akademya at pamahalaang lokal. Noong ika-21 ng Mayo 2026, matagumpay na nagdaos ng isang exploratory meeting ang RTU Extension and Community Services Office (RTU ECSO) at ang Pasig City Cooperative Development Office (CDO) upang pag-usapan ang paggawad ng mga magkatuwang na programa para sa capacity building at community development.

Sa nasabing pagpupulong, nagpalitan ng mga karanasan at inisyatiba ang dalawang institusyon. Ipinakilala ng RTU ECSO ang kanilang mga Extension Services na naglalayong magbahagi ng kaalaman at teknolohiya upang mapabuti ang lokal na produksyon at kalidad ng pamumuhay ng iba't ibang sektor.

Kasabay nito, nagbahagi naman ang Pasig CDO ng ulat ukol sa kasalukuyang sitwasyon ng mga kooperatiba sa lungsod at ang kanilang mga umiiral na programa sa technical assistance at capacity building. Sa pamamagitan nito, nakita ng dalawang panig kung paano maaaring magkatugma ang galing ng unibersidad at ang mga pangangailangan sa komunidad.

Naging masigla ang palitan ng ideya nang talakayin ang mga konkretong proyekto na maaari nilang pagtulungan sa hinaharap bilang mga partner. Lumitaw sa usapan ang magkasanib na pagpapatupad ng bookkeeping support at financial literacy sessions, pati na rin ang mga enterprise development initiatives gaya ng product development, branding, packaging, at digital media training para sa mga lokal na kooperatiba. Bukod dito, binigyang-pansin din ang "Silid Aralan Program" ng RTU sa Tanay na tumutulong sa mga underprivileged youth bilang isang magandang oportunidad para sa partnership sa sektor naman ng kabataan.

Ang mahalagang simulain na ito ay dinaluhan ng mga kinatawan mula sa parehong tanggapan. Dumalo para sa RTU ECSO sina Dr. Robelyn Bautista (Head, Extension Community Linkages Unit), Bb. Abigail Plaza Mendoza-Morite, at G. John Luis Martinez, habang naging kabahagi naman mula sa Pasig CDO sina G. John Troy Sunga (Officer-in-Charge, CDO), Bb. Cassandra Gabrielle A. Salangsang, Bb. Raquel S. Dela Cruz, at G. Bernard Jason De Real.

Ang pagtatapos ng pulong ay nag-iwan ng malinaw na direksyon para sa isang mas matatag, inklusibo, at magkatuwang na paglilingkod sa mamamayan.

𝐊𝐨𝐨𝐩 𝐊𝐚𝐩𝐚𝐭𝐢𝐝 𝐏𝐚𝐫𝐭𝐧𝐞𝐫𝐬𝐡𝐢𝐩 𝐓𝐮𝐫𝐧𝐨𝐯𝐞𝐫 𝐂𝐞𝐫𝐞𝐦𝐨𝐧𝐲 | 𝐔𝐑𝐂 𝐄𝐦𝐩𝐥𝐨𝐲𝐞𝐞𝐬 𝐌𝐮𝐥𝐭𝐢𝐩𝐮𝐫𝐩𝐨𝐬𝐞 𝐂𝐨𝐨𝐩𝐞𝐫𝐚𝐭𝐢𝐯𝐞 (𝐔𝐑𝐂𝐄𝐌𝐏𝐂𝐎) 𝐚𝐭 𝐒𝐚𝐦𝐚-𝐒𝐚𝐦𝐚 𝐆𝐨𝐥𝐝𝐞𝐧 𝐀𝐠𝐞 𝐀𝐥𝐥𝐢𝐚𝐧𝐜𝐞 𝐂𝐫𝐞𝐝𝐢𝐭 𝐂𝐨𝐨𝐩𝐞𝐫𝐚𝐭𝐢𝐯𝐞 (𝐒𝐒𝐆𝐀𝐀𝐂𝐂)!

Isa na namang matagumpay na partnership ang nabuo sa ilalim ng Koop Kapatid Program matapos pormal na isagawa noong ika-21 ng Mayo 2026 ang turnover ceremony sa pagitan ng URC Employees Multipurpose Cooperative (URCEMPCO) at Sama-Sama Golden Age Alliance Credit Cooperative (Ssgaac coop.) sa tanggapan ng URCEMPCO.

Sa pamamagitan ng partnership na ito, ipinagkaloob ng URCEMPCO sa SSGAACC ang isang Computer Set with Printer at Complete Microsoft Office System bilang suporta sa pagpapalakas ng operasyon at administratibong kakayahan ng beneficiary cooperative.

Nakiisa rin ang Pasig City Cooperative Development Office (CDO) upang saksihan ang makabuluhang gawaing nagpapakita ng tunay na diwa ng kooperatibismo — ang pag-angat ng kapwa kooperatiba sa pamamagitan ng malasakit, paggabay, at pagbabahaginan ng oportunidad.

Sa kaniyang mensahe, ibinahagi ni G. Romeo Naga, Chairperson ng URCEMPCO, na mahalagang mapanatili ang kultura ng pagtutulungan sa loob ng kilusang kooperatiba. Buong puso rin nilang tinanggap ang SSGAACC bilang kanilang “small brother” cooperative at tiniyak na bukas ang kanilang kooperatiba sa patuloy na paggabay at suporta.

Nagpahayag naman ng pasasalamat si G. Jess Viray, Chairperson ng SSGAACC, para sa ipinakitang tiwala at tulong ng URCEMPCO na malaking bagay umano sa patuloy na pagpapatatag ng kanilang kooperatiba.

Samantala, binigyang-diin ni G. John Troy Sunga, Officer-in-Charge ng Pasig CDO, na hindi tunay na nagiging makabuluhan ang pag-unlad kung hindi naisasama ang mas maliliit na kooperatiba. Aniya, nagsisilbing tulay lamang ang CDO sa pagbuo ng mga partnership habang ang tunay na pagbabago ay nagmumula sa mga kooperatibang handang tumulong at magbahagi.

Ibinahagi rin ni G. Nathaniel Durias, General Manager ng URCEMPCO, na hindi lamang sa turnover ceremony nagtatapos ang kanilang suporta dahil bukas din sila sa pagbibigay ng technical assistance at paggabay sa paggamit ng ipinagkaloob na computer system.

Patunay ang partnership na ito na mas lumalakas ang kilusang kooperatiba kapag sama-samang umaangat at nagtutulungan ang bawat kooperatiba.

𝐌𝐚𝐭𝐚𝐭𝐚𝐠 𝐧𝐚 𝐊𝐨𝐨𝐩𝐞𝐫𝐚𝐭𝐢𝐛𝐚, 𝐍𝐚𝐠𝐬𝐢𝐬𝐢𝐦𝐮𝐥𝐚 𝐬𝐚 𝐦𝐚𝐚𝐲𝐨𝐬 𝐧𝐚 𝐏𝐚𝐠𝐭𝐚𝐭𝐚𝐥𝐚: 𝐏𝐚𝐬𝐢𝐠 𝐂𝐃𝐎, 𝐧𝐚𝐠𝐬𝐚𝐠𝐚𝐰𝐚 𝐧𝐠 𝐁𝐚𝐬𝐢𝐜 𝐁𝐨𝐨𝐤𝐤𝐞𝐞𝐩𝐢𝐧𝐠 𝐓𝐫𝐚𝐢𝐧𝐢𝐧𝐠

Bilang bahagi ng pagpapatibay ng partnership sa pagitan ng Pasig City Cooperative Development Office (CDO) at Cooperative Development Authority, patuloy na pinalalakas ang kaalaman at kakayahan ng mga kooperatiba sa lungsod sa pamamagitan ng matagumpay na pagsasagawa ng Training on Basic Bookkeeping for Cooperatives noong ika-19 ng Mayo 2026 sa Astoria Plaza. Dinaluhan ito ng mga opisyal at kinatawan ng iba’t ibang kooperatiba na nagnanais mapalawak ang kanilang kaalaman sa wastong pamamahala ng financial records at bookkeeping system.

Nagsilbing Master of Ceremony si G. Zymoun Benedict Delos Reyes mula sa CDO, habang naging resource speaker naman si Bb. May Q. Pacleb, Senior Cooperative Development Specialist mula sa CDA NCR Extension Office. Sa kaniyang talakayan, ibinahagi niya ang mahahalagang pundasyon ng Accounting at Bookkeeping, kabilang ang kahulugan at pagkakaiba ng dalawang konsepto, gayundin ang kahalagahan ng maayos na financial recording sa pagpapatakbo ng isang kooperatiba.

Mas pinalalim pa ang diskusyon sa pamamagitan ng pagpapaliwanag sa limang pangunahing accounts — Assets, Liabilities, Equity, Income, at Expenses—na nagsisilbing batayan sa pagsusuri ng kalagayang pinansyal ng isang organisasyon. Tinalakay rin ang Rules of Debit and Credit, Accounting Equation, at Chart of Accounts na mahalagang bahagi sa tamang proseso ng bookkeeping.

Bukod sa lecture discussions, naging masigla at interaktibo rin ang buong pagsasanay dahil sa iba’t ibang activities at workshops na isinagawa sa pagitan ng mga talakayan. Nagkaroon ng mga situational exercises, group activities, at practical applications kung saan aktibong nakilahok ang mga dumalo upang mas maunawaan at maisabuhay ang mga konseptong itinuro.

Sa pamamagitan ng mga gawaing ito, nagkaroon ang mga kalahok ng pagkakataong subukan ang wastong pagtatala ng transaksyon, pag-aanalisa ng accounts, at pagbuo ng simpleng bookkeeping entries na maaari nilang magamit sa kanilang mga kooperatiba.

Sa pagtatapos ng programa, hindi lamang dagdag kaalaman kundi mas pinatibay ring kumpiyansa at kakayahan sa financial management ang naiuwi ng mga kalahok — isang hakbang tungo sa mas organisado, episyente, at matatag na pamamahala ng kanilang mga kooperatiba. Patunay ito sa patuloy na pagtutulungan ng CDO at CDA sa paghahatid ng mga programang magpapalakas sa sektor ng kooperatiba at magsusulong ng inklusibo at sustenableng pag-unlad sa lungsod.