Joeben Tai

05/10/2026

02/10/2026

Matagumpay po nating nailipat ang 49 na pamilyang dating naninirahan sa ilalim ng Osmeña Highway sa Maynila tungo sa kanilang bagong permanenteng tahanan sa St. Ildephonsus Village, Brgy. Anyatam, San Ildefonso, Bulacan.

Sa pagtutulungan ng National Housing Authority (NHA), Department of Social Welfare and Development (DSWD), at Lokal na Pamahalaan ng Maynila, naisagawa natin ang relokasyon sa ilalim ng DSWD Pag-Abot Program, kung saan nakatanggap ang bawat pamilya ng Transitory Shelter Assistance (TSA) bilang karagdagang suporta sa kanilang paglipat.

Nais kong tiyakin sa ating mga kababayan na hindi nagtatapos sa relokasyon ang aming serbisyo. Patuloy nating susuportahan ang mga pamilyang nailipat upang mas maging maayos ang kanilang pag-angkop sa kanilang bagong komunidad at tahanan.

Kasabay nito, patuloy tayong nakikipag-ugnayan sa mga kinauukulang ahensya at lokal na pamahalaan para sa iba pang mga pamilyang naghihintay ng kanilang relokasyon.

Sa bawat pamilyang nabibigyan natin ng pagkakataong magsimula muli, mas pinagtitibay natin ang ating pangarap na ligtas, disenteng tahanan at mas maayos na buhay para sa bawat pamilyang Pilipino.

28/09/2026

Pinangunahan po natin ang paglagda sa Loan Agreement at Deed of Absolute Sale (DOAS) para sa land acquisition ng Singian Ville Phases I–III dito sa Quezon City.

Isa po itong mahalagang hakbang para sa 307 pamilyang benepisyaryo na matagal nang nangangarap na magkaroon ng mas ligtas at mas matatag na tahanan, at ng sariling titulo.

Sa ating mga benepisyaryo, malapit na tayong makarating sa puntong hawak na ninyo ang sariling titulo. Kaya hinihikayat ko kayong patuloy na tuparin ang inyong mga obligasyon at maging regular at responsable sa pagbabayad ng inyong housing loan. Bawat hulog ay mahalagang hakbang tungo sa pagpapabilis ng proseso para sa inyong Transfer Certificate of Title (TCT).

Hinihikayat ko rin ang ating mga Homeowners’ Associations na gamitin ang mga e-payment partners ng NHA, gaya ng GCash at PayMaya, upang mas maging madali at convenient ang pagbabayad ng inyong mga obligasyon.

Tandaan po natin, ang proyektong pabahay ng ating pamahalaan ay hindi lamang isang istruktura. Ito ay tahanan kung saan nabubuo ang mga pangarap, seguridad na naipapamana sa inyong mga pamilya.

Kaya patuloy tayong magtulungan at magkaisa. Ang NHA ay mananatiling katuwang ninyo sa pag-abot ng pangarap tungo sa isang masiglang komunidad.

23/09/2026

Personal po nating binisita at kinumusta ang ating mga kababayan na naninirahan sa “Tunnel Community” sa Malate, Manila, upang personal na ibahagi sa kanila ang magandang balita tungkol sa kanilang nalalapit na paglipat sa mas ligtas, maayos, at disenteng pabahay ng National Housing Authority (NHA) sa San Ildefonso, Bulacan.

Sa ginanap na Town Hall Meeting sa Brgy. 738 Covered Court, nakasama po natin si Department of Social Welfare and Development (DSWD) Secretary Rex Gatchalian, na nagbahagi ng mga programa at tulong para sa iba pang pamilyang patuloy na naghihintay ng kanilang ganap na relokasyon. Kabilang dito ang transitory shelter assistance, community departure conditioning, at rental subsidy sa ilalim ng DSWD Pag-Abot Program.

Hindi lamang po pabahay ang nais nating maihatid. Higit sa lahat, nais nating matiyak na ang bawat pamilyang Pilipino ay mabibigyan ng mas ligtas, mas maayos, at mas marangal na lugar na matatawag nilang tahanan, kasama ang pagkakataong makapagsimula ng panibagong yugto ng kanilang buhay.

Ang sama-samang pagkilos ng NHA, DSWD, lokal na pamahalaan, at mga komunidad ay mahalaga sa pagsusulong ng bisyon ni Pangulong Ferdinand “Bongbong” R. Marcos Jr. para sa isang Bagong Pilipinas—isang Pilipinas kung saan ang bawat pamilya ay may pagkakataong magkaroon ng disente, ligtas, at sustenableng tahanan.

Sa bawat pamilyang ating naaabot at natutulungan, unti-unti nating naitatayo ang isang Bagong Pilipinas na may malasakit, may pag-asa, at may tahanan para sa bawat pamilyang Pilipino.

17/09/2026

Isang makabuluhang araw po para sa 333 pamilyang benepisyaryo ng programang pabahay ng ating pamahalaan sa Disiplina Village, Arkong Bato sa Valenzuela City.

Kasama po natin ang ating mahal na Pangulong Ferdinand “Bongbong” Marcos Jr. sa seremonya ng turnover ng mga bagong housing units para sa ating mga kababayang dating naninirahan sa mga danger zones, waterways, at mga lugar na apektado ng Manila Bay cleanup.

Malaking bagay para sa isang pamilya ang magkaroon ng ligtas, maayos at disenteng tahanan. Hindi lang ito bahay—ito ay bagong simula at lugar kung saan makakabuo sila ng masasayang alaala kasama ang kanilang pamilya.

Tayo po ay nagpapasalamat kay Pangulong Bongbong Marcos, sa patuloy na suporta sa ating mga programa sa pabahay. Maraming salamat din sa Valenzuela City Government sa pakikipagtulungan upang maisakatuparan ang proyektong ito.

Sa ating mga bagong residente, congratulations po! Sana ay alagaan ninyo ang inyong bagong tahanan at ang komunidad na sama-sama nating binubuo.

Makakaasa po kayo na patuloy ang NHA sa aming tungkulin na mailapit ang ligtas, disenteng at abot-kayang pabahay sa ating mga kababayan.

16/09/2026

Personal po nating iginawad ang 30 Transfer Certificates of Title (TCTs) sa ating mga kababayan na benepisyaryo ng National Government Center Housing and Development Project (NGCHDP), sa Batasan Hills, Quezon City, bilang bahagi ng : "Serbisyong Sapat Para sa Lahat."

Ang bawat TCT na ating naipagkakaloob ay bunga ng sama-samang pagsisikap ng pamahalaan upang matupad ang pangarap ng bawat pamilyang Pilipino na magkaroon ng sariling tahanan at lupang matatawag na kanila.

Tuloy-tuloy po ang NHA sa paghahatid ng serbisyong may puso, para sa bawat pamilyang Pilipino at sa ilalim ng pamumuno ng ating mahal na Pangulong Ferdinand “Bongbong” R. Marcos Jr., patuloy nating inilalapit ang serbisyo ng pamahalaan sa mga Pilipino - direkta, mabilis, at may malasakit.

15/09/2026