http://capiz.gov.ph/, https://www.tiktok.com/@cpgcommunicationsgroup

Capiz Provincial Government Communications Group, Capiz Provincial Government, Provincial Capitol, Taft Street, Barangay III, Roxas City (2026)

07/10/2026

𝗠𝗮𝗴𝗸𝗶𝘁𝗮𝗮𝘆 𝗸𝗶𝘁𝗮 𝗯𝘂𝘄𝗮𝘀, 𝗢𝗸𝘁𝘂𝗯𝗿𝗲 𝟵, 𝟮𝟬𝟮𝟲 𝗵𝘂𝗺𝗮𝗹𝗶𝗻 𝗮𝗹𝗮𝘀-𝟲:𝟯𝟬 𝘁𝘂𝗯𝘁𝗼𝗯 𝗮𝗹𝗮𝘀-𝟭𝟬 𝘀𝗮𝗻𝗴 𝗮𝗴𝗮 𝘀𝗮 𝗕𝗮𝗿𝗮𝗻𝗴𝗮𝘆 𝗟𝗮𝘄𝗮𝗮𝗻, 𝗥𝗼𝘅𝗮𝘀 𝗖𝗶𝘁𝘆, 𝗖𝗮𝗽𝗶𝘇 𝗽𝗮𝗿𝗮 𝘀𝗮 𝗽𝗮𝗿𝗮 𝘀𝗮 𝗚𝗨𝗚𝗠𝗔 𝗠𝗲𝗱𝗶𝗰𝗮𝗹-𝗗𝗲𝗻𝘁𝗮𝗹 𝗢𝘂𝘁𝗿𝗲𝗮𝗰𝗵 𝗣𝗿𝗼𝗴𝗿𝗮𝗺 𝘀𝗮𝗻𝗴 𝗚𝗼𝗯𝘆𝗲𝗿𝗻𝗼 𝗣𝗿𝗼𝗯𝗶𝗻𝘀𝘆𝗮𝗹.

#𝗜𝗸𝗮𝗮𝘆𝗼𝗻𝗴𝗟𝗮𝘄𝗮𝘀
#𝗠𝗮𝗽𝗮𝗴𝗿𝗼𝘀𝗡𝗴𝗮𝗖𝗮𝗽𝗶𝘀𝗻𝗼𝗻
#𝗪𝗼𝘄𝗢𝗻𝗲𝗖𝗮𝗽𝗶𝘇
#𝗦𝗮𝗚𝘂𝗴𝗺𝗮𝗡𝗶𝗖𝗮𝘀𝘁𝗿𝗼𝗠𝗮𝘆𝗬𝘂𝗵𝘂𝗺𝗞𝗮𝗴𝗕𝗮𝗹𝗮𝘁𝘆𝗮𝗴𝗼𝗻

07/10/2026

𝟭,𝟲𝟴𝟭 𝗞𝗔 𝗠𝗚𝗔 𝗠𝗔𝗡𝗨𝗡𝗨𝗗𝗟𝗢 𝗦𝗔 𝟰 𝗡𝗚𝗔 𝗞𝗔𝗕𝗔𝗡𝗪𝗔𝗛𝗔𝗡𝗔𝗡 𝗦𝗔 𝗣𝗥𝗢𝗕𝗜𝗡𝗦𝗬𝗔 𝗞𝗔𝗚 𝟭𝟱𝟮 𝗡𝗢𝗡-𝗧𝗘𝗔𝗖𝗛𝗜𝗡𝗚 𝗣𝗘𝗥𝗦𝗢𝗡𝗡𝗘𝗟 𝗦𝗔𝗡𝗚 𝗦𝗗𝗢 𝗖𝗔𝗣𝗜𝗭, 𝗡𝗔𝗞𝗔𝗕𝗔𝗧𝗢𝗡 𝗦𝗔𝗡𝗚 𝗧𝗔𝗚 𝟭𝟬 𝗞𝗔 𝗞𝗜𝗟𝗢 𝗡𝗚𝗔 𝗕𝗨𝗚𝗔𝗦

Sa pagselebrar sang World Teachers' Day diri sa probinsya sang Capiz, wala nataligam-an sang Gobyerno Probinsyal sang Capiz ang daku nga papel sang mga non-teaching personnel nga padayon nagahatag sang suporta sa tanan nga hilikuton sa sektor sang edukasyon sa probinsya.

Kaupod ang mga 1,681 manunudlo gikan sa Capiz National High School, Ivisan, Panay, kag Panitan, ang 152 nga non-teaching personnel sang Schools Division (SDO) of Capiz, nakabaton man sang tag-10 kilo nga libre nga bugas sa ginhiwat nga pagpanagtag sa Capiz National High School subong nga Oktubre 7, 2026.

Pinaagi sa pagpaninguha ni 𝗚𝗼𝘃𝗲𝗿𝗻𝗼𝗿 𝗙𝗿𝗲𝗱𝗲𝗻𝗶𝗹 𝗛. 𝗖𝗮𝘀𝘁𝗿𝗼, kaupod ang Task Force Pagdumdum, kag Provincial Social Welfare and Development Office (PSWDO), ginpakita sang Gobyerno Probinsyal nga ang tagsa ka sakripisyo kag pagpanerbisyo, merito sang pagkilala kag nagakaigo nga suporta para sa ila adlaw-adlaw nga panginahanglan.

#𝗪𝗼𝘄𝗢𝗻𝗲𝗖𝗮𝗽𝗶𝘇
#𝗦𝗮𝗚𝘂𝗴𝗺𝗮𝗡𝗶𝗖𝗮𝘀𝘁𝗿𝗼𝗠𝗮𝘆𝗬𝘂𝗵𝘂𝗺𝗞𝗮𝗴𝗕𝗮𝗹𝗮𝘁𝘆𝗮𝗴𝗼𝗻

07/10/2026

𝟮,𝟮𝟴𝟭 𝗡𝗚𝗔 𝗠𝗚𝗔 𝗠𝗔𝗡𝗨𝗡𝗨𝗗𝗟𝗢 𝗛𝗔𝗟𝗜𝗡 𝗦𝗔 𝟰 𝗞𝗔 𝗞𝗔𝗕𝗔𝗡𝗪𝗔𝗛𝗔𝗡𝗔𝗡 𝗦𝗔𝗡𝗚 𝗣𝗥𝗢𝗕𝗜𝗡𝗦𝗬𝗔 𝗦𝗔𝗡𝗚 𝗖𝗔𝗣𝗜𝗭, 𝗡𝗔𝗞𝗔𝗕𝗔𝗧𝗬𝗔𝗚 𝗦𝗔𝗡𝗚 𝗡𝗔𝗚𝗔𝗗𝗔𝗕-𝗗𝗔𝗕 𝗡𝗚𝗔 𝗣𝗔𝗚𝗣𝗔𝗦𝗔𝗟𝗔𝗠𝗔𝗧 𝗞𝗔𝗚 𝗣𝗔𝗚𝗟𝗔𝗨𝗠

Nagadab-dab nga pagpasalamat kag paglaum ang nabatyagan sang 2,281 nga mga manunudlo halin sa 4 ka kabanwahanan sa probinsya sang Capiz, matapos makabaton sang libre nga bugas, nga ginpatigayon sa pagpanikasog sang Gobyerno Probinsyal sang Capiz sa idalum sang pagdumalahan ni 𝗚𝗼𝘃𝗲𝗿𝗻𝗼𝗿 𝗙𝗿𝗲𝗱𝗲𝗻𝗶𝗹 𝗛. 𝗖𝗮𝘀𝘁𝗿𝗼.

Ang mga maestra nga nakabenepisyo sang sini nga programa nga ginhiwat sa Pontevedra Elementary School, subong nga adlaw Oktubre 7, 2026, naghalin sa banwa sang Pontevedra, Pilar, Maayon kag President Roxas. Pinaagi sa paghatag sang sini nga bulig, ginapakita sang Gobyerno Probinsyal nga prayoridad kag gina-apresyar ang sektor sang mga maestra nga nagaserbe nga haligi sang edukasyon sa probinsya.

Ang aton mga manunudlo indi lang basta naga-ubra, sila ang nagaserbe nga ika-duha nga ginikanan sang mga kabataan, gani sa pagsaulog sang World Teachers’ Month, tinutuyo ni Governor Castro nga ipabutyag sa ila nga ginahatagan sila sang nagaka-igo nga pagkilala sa ila kakapoy, pangabudlay kag pag-antos sa adlaw-adlaw nga panikasog para sa palaabuton sang kada estudyante sa probinsya sang Capiz.

Sa pagpanguna sang Gobyerno Probinsyal, kaupod ang Task Force Pagdumdum kag Provincial Social Welfare and Development Office (PSWDO), tinutuyo nga ipabutyag sa mga manunudlo sa probinsya nga sila ginatatap sang lokal nga panguluhan, ilabi na ang mga gapanguna nila nga panginahanglan sa matag-adlaw.

#𝗪𝗼𝘄𝗢𝗻𝗲𝗖𝗮𝗽𝗶𝘇
#𝗦𝗮𝗚𝘂𝗴𝗺𝗮𝗡𝗶𝗖𝗮𝘀𝘁𝗿𝗼𝗠𝗮𝘆𝗬𝘂𝗵𝘂𝗺𝗞𝗮𝗴𝗕𝗮𝗹𝗮𝘁𝘆𝗮𝗴𝗼𝗻

07/10/2026

𝗠𝗔𝗦𝗢𝗕𝗥𝗔 𝗗𝗨𝗛𝗔 𝗞𝗔 𝗟𝗜𝗕𝗢 𝗡𝗚𝗔 𝗠𝗚𝗔 𝗠𝗔𝗡𝗨𝗡𝗨𝗗𝗟𝗢 𝗦𝗔 𝟱 𝗞𝗔 𝗞𝗔𝗕𝗔𝗡𝗪𝗔𝗛𝗔𝗡𝗔𝗡, 𝗠𝗔𝗦𝗨𝗡𝗢𝗗 𝗡𝗚𝗔 𝗡𝗔𝗞𝗔𝗕𝗔𝗧𝗢𝗡 𝗦𝗔𝗡𝗚 𝗟𝗜𝗕𝗥𝗘 𝗡𝗚𝗔 𝗕𝗨𝗚𝗔𝗦

Masobra duha ka libo nga mga manunudlo guikan sa lima ka kabanwahanan sa probinsya sang Capiz, masunod nga nakabaton sang libre nga bugas bilang pagpabutyag sang pagpasalamat kag pag-apresyar sang Gobyerno Probinsyal sang Capiz sa ila padayon nga dedikasyon kag mga sakripisyo sa paghanas sang maayo nga bwas-damlag sang mga kabataan kag komunidad.

Ginpangunahan ni 𝗚𝗼𝘃𝗲𝗿𝗻𝗼𝗿 𝗙𝗿𝗲𝗱𝗲𝗻𝗶𝗹 𝗛. 𝗖𝗮𝘀𝘁𝗿𝗼, kaupod ang Provincial Social Welfare and Development Office (PSWDO) kag bug-os nga pwersa sang Task Force Pagdumdum, ang nagapadayon nga distribusyon sang tag-10 ka kilo nga bugas sa Sigma Central Elementary School subong nga adlaw Oktubre 7, 2026, bilang isa man ka pamaagi sa pagselebrar sang World Teachers' Day sa Capiz.

Lakip sa mga manunudlo nga nakabenepisyo naguikan sa mga kabanwahanan sang Sigma, Dao, Jamindan, Mambusao, kag Sapian. Ang suporta nga ila nabaton, magamay guid lamang apang makapapihan-pihan na sa ila mga ginagastu sa ila mga obligasyon sa eskwelahan kag sa ila man panimalay.

#𝗪𝗼𝘄𝗢𝗻𝗲𝗖𝗮𝗽𝗶𝘇
#𝗦𝗮𝗚𝘂𝗴𝗺𝗮𝗡𝗶𝗖𝗮𝘀𝘁𝗿𝗼𝗠𝗮𝘆𝗬𝘂𝗵𝘂𝗺𝗞𝗮𝗴𝗕𝗮𝗹𝗮𝘁𝘆𝗮𝗴𝗼𝗻

07/10/2026

𝗟𝗜𝗕𝗥𝗘 𝗡𝗚𝗔 𝗕𝗨𝗚𝗔𝗦, 𝗣𝗔𝗚𝗞𝗜𝗟𝗔𝗟𝗔 𝗦𝗔 𝗦𝗔𝗞𝗥𝗜𝗣𝗜𝗦𝗬𝗢 𝗦𝗔𝗡𝗚 𝗠𝗚𝗔 𝗠𝗔𝗡𝗨𝗡𝗨𝗗𝗟𝗢 𝗦𝗔𝗡𝗚 𝟰 𝗞𝗔 𝗕𝗔𝗡𝗪𝗔 𝗦𝗔 𝗦𝗘𝗚𝗨𝗡𝗗𝗢 𝗗𝗜𝗦𝗧𝗥𝗜𝗧𝗢 𝗦𝗔𝗡𝗚 𝗖𝗔𝗣𝗜𝗭

Bisan ano man ka daku sang aton mga naangkon subong nga adlaw, indi naton malipatan nga may isa ka manunudlo nga naghanas kag nagtuytoy sa aton padulong sa katumanan sang aton mga handum.

Gani bilang kabahin sang pagsaulog sang World Teachers' Month, isa ka hugot nga pagpasalamat kag pagkilala ang gintukod sang Gobyerno Probinsyal sang Capiz sa pagpanguna ni 𝗚𝗼𝘃𝗲𝗿𝗻𝗼𝗿 𝗙𝗿𝗲𝗱𝗲𝗻𝗶𝗹 𝗛. 𝗖𝗮𝘀𝘁𝗿𝗼. Subong nga adlaw, Oktubre 7, 2026 sa Dumalag Central School, 2,280 ka mga manunudlo naguikan sa banwa sang Dumalag, Cuartero, Dumarao, kag Tapaz East kag West, sa Segundo Distrito ang nagtipon agud magbaton sang tag-10 kilo nga libre nga bugas.

Indi ini basta lamang bugas sa lamesa kundi isa ka pamaagi sang Gobyerno Probinsyal sa pagpabutyag sang pagpalangga kag pagkilala sa adlaw-adlaw nga sakripisyo sang aton mga baganihan sa hulot-buluthuan. Bisan pa man simple nga bulig, daku na ini nga pahuway sa ila mga ginagastos sa eskwelahan kag panimalay.

Sa pagpanguna sang Gobyerno Probinsyal kaupod ang Task Force Pagdumdum kag Provincial Social Welfare and Development Office (PSWDO), tinutuyo sini nga ipabutyag sa mga manunudlo sa probinsya nga sila ginatatap man sang lokal nga panguluhan, ilabi na ang mga gapanguna nila nga panginahanglan sa matag-adlaw.

#𝗪𝗼𝘄𝗢𝗻𝗲𝗖𝗮𝗽𝗶𝘇
#𝗦𝗮𝗚𝘂𝗴𝗺𝗮𝗡𝗶𝗖𝗮𝘀𝘁𝗿𝗼𝗠𝗮𝘆𝗬𝘂𝗵𝘂𝗺𝗞𝗮𝗴𝗕𝗮𝗹𝗮𝘁𝘆𝗮𝗴𝗼𝗻

06/10/2026

𝗞𝗢𝗡𝗦𝗧𝗥𝗨𝗞𝗦𝗬𝗢𝗡 𝗦𝗔𝗡𝗚 𝗠𝗨𝗟𝗧𝗜-𝗣𝗨𝗥𝗣𝗢𝗦𝗘 𝗖𝗢𝗩𝗘𝗥𝗘𝗗 𝗚𝗬𝗠 𝗦𝗔 𝗦𝗜𝗧𝗜𝗢 𝗣𝗥𝗢𝗣𝗘𝗥, 𝗕𝗥𝗚𝗬. 𝗦𝗔𝗡 𝗔𝗡𝗧𝗢𝗡𝗜𝗢, 𝗣𝗜𝗟𝗔𝗥, 𝗬𝗔𝗥𝗔 𝗡𝗔 𝗦𝗔 𝗧𝗨𝗡𝗚𝗔-𝗧𝗨𝗡𝗚𝗔 𝗔𝗡𝗚 𝗡𝗔𝗛𝗨𝗠𝗔𝗡

Yara na sa tunga-tunga ang nahuman sa nagapadayon nga konstruksyon sang Multi-Purpose Covered Gym sang Sitio Proper Brgy. San Antonio sa banwa sang Pilar, pinaagi sa pagpanikasog sang Gobyerno Probinsyal sang Capiz sa idalum sang liderato ni 𝗚𝗼𝘃𝗲𝗿𝗻𝗼𝗿 𝗙𝗿𝗲𝗱𝗲𝗻𝗶𝗹 𝗛. 𝗖𝗮𝘀𝘁𝗿𝗼 , agud may magaserbe na nga pasilidad ang mga pumuluyo para sa ila nagkalain-lain nga mga aktibidad.

Ang ini nga proyekto, isa sa mga gapanguna nga proyekto sang Gobyerno Probinsyal, agud makahatag sang husto nga lugar para sa mga daku nga pagtililipon sang mga pumuluyo sang nasambit nga barangay, pareho sang mga aktibidad sa isport, pagsinapol sang mga organisasyon kag barangay, asembleya sang komunidad, mga programa para sa kabataan kag senior citizens, kag iban pa nga serbisyo publiko.

Magaserbe man ini nga evacuation center sa mga tion nga may baha, bagyo, kag sunog, agud mas mapadasig ang pag-atipan sa mga maapektuhan sini, kag masiguro nga sila may isa ka pasilidad nga mapadulongan kag matiniran nga luwas kag matawhay.

Ang proyekto ginpondohan paagi sa 20% Development Fund sang probinsya, nga nagasuporta sa pagpauswag sang mga pasilidad sa lokal nga komunidad. Ini isa ka tikang sang Gobyerno Probinsyal sang Capiz nga tinutuyo ang paghatag sang imprastruktura nga may direkta kag malawig nga benepisyo para sa mga Capisnon.

#𝗪𝗼𝘄𝗢𝗻𝗲𝗖𝗮𝗽𝗶𝘇
#𝗦𝗮𝗚𝘂𝗴𝗺𝗮𝗡𝗶𝗖𝗮𝘀𝘁𝗿𝗼𝗠𝗮𝘆𝗬𝘂𝗵𝘂𝗺𝗞𝗮𝗴𝗕𝗮𝗹𝗮𝘁𝘆𝗮𝗴𝗼𝗻

06/10/2026

𝗞𝗢𝗡𝗦𝗧𝗥𝗨𝗞𝗦𝗬𝗢𝗡 𝗦𝗔𝗡𝗚 𝗠𝗨𝗟𝗧𝗜-𝗣𝗨𝗥𝗣𝗢𝗦𝗘 𝗣𝗨𝗥𝗣𝗢𝗦𝗘 𝗖𝗢𝗩𝗘𝗥𝗘𝗗 𝗚𝗬𝗠 𝗦𝗔 𝗕𝗥𝗚𝗬. 𝗔𝗠𝗕𝗜𝗟𝗔𝗬, 𝗣𝗔𝗡𝗜𝗧𝗔𝗡, 𝗡𝗔𝗚𝗔-𝗨𝗠𝗣𝗜𝗦𝗔 𝗡𝗔

Naga-umpisa na ang konstruksyon sang ginalauman nga Multi-Purpose Covered Gym sang mga pumuluyo sang Brgy. Ambilay, Panitan, nga isa sa mga prayoridad nga proyekto nga gintinguhaan sang Gobyerno Probinsyal sang Capiz sa pagpanguna ni 𝗚𝗼𝘃𝗲𝗿𝗻𝗼𝗿 𝗙𝗿𝗲𝗱𝗲𝗻𝗶𝗹 𝗛. 𝗖𝗮𝘀𝘁𝗿𝗼.

Natuman ini nga edipisyo pinaagi man sa 20% Development Fund sang probinsya nga ila mapuslan sa nagkalain-lain nga mga programa kag aktibidad sang barangay kasubong sang pagtililipon, pasundayag, livelihood program, mga serbisyo medikal, mga pahampang sa mga kabataan kag iban pa. Sarang man ini magamit bilang komportable nga evacuation center sa tion sang kalamidad kag emerhensya.

Isa lamang ini sa mga prayoridad nga programa kag proyekto sang administrasyon ni Governor Castro, nga nagatinguha sa pagpatuman pa sang nagkalain-lain nga mga dekalidad imprastruktura nga direkta makapa-uswag sang kahimtangan sang tagsa ka pumuluyo kag komunidad.

#𝗪𝗼𝘄𝗢𝗻𝗲𝗖𝗮𝗽𝗶𝘇
#𝗦𝗮𝗚𝘂𝗴𝗺𝗮𝗡𝗶𝗖𝗮𝘀𝘁𝗿𝗼𝗠𝗮𝘆𝗬𝘂𝗵𝘂𝗺𝗞𝗮𝗴𝗕𝗮𝗹𝗮𝘁𝘆𝗮𝗴𝗼𝗻

06/10/2026

𝗦𝗔 𝗟𝗜𝗞𝗢𝗗 𝗦𝗔𝗡𝗚 𝗠𝗔𝗟𝗔𝗪𝗜𝗚 𝗡𝗚𝗔 𝗧𝗨𝗜𝗚 𝗦𝗔𝗡𝗚 𝗣𝗔𝗚𝗦𝗘𝗥𝗕𝗜𝗦𝗬𝗢, 𝗠𝗚𝗔 𝗥𝗘𝗧𝗜𝗥𝗘𝗘𝗦 𝗦𝗔𝗡𝗚 𝗚𝗢𝗕𝗬𝗘𝗥𝗡𝗢 𝗣𝗥𝗢𝗕𝗜𝗡𝗦𝗬𝗔𝗟, 𝗚𝗜𝗡𝗣𝗔𝗦𝗜𝗗𝗨𝗡𝗚𝗚𝗔𝗡 𝗦𝗔 𝗦𝗔𝗟𝗔𝗠𝗔𝗧 𝗠𝗔𝗕𝗨𝗛𝗔𝗬 𝟮𝟬𝟮𝟲

Sa likod sang may tagipusuon nga pag-alagad sa pumuluyong Capisnon, isa ini ka tion sang pagkilala kag pagpasidungog sa mga retirees sang tuig 2025–2026 sa ginpatigayon nga Salamat Mabuhay 2026, subong nga adlaw, Oktubre 6, sa Hall of Governors, bilang pagpasalamat sa ila malawig nga nga pagserbisyo sa probinsya.

Kabahin diri ang 48 tanan ka mga retirado guikan sa nagkalain-lain nga mga talatapan sang Gobyerno Probinsyal sang Capiz ang nagbaton sang Plaque of Appreciation and Token. 12 diri ang mga nag-retire sang tuig 2025, kag 36 naman sa subong nga tuig 2026.

Yari ang mga pangalan sang mga 2025 retirees, kag tuig sang ila malawig nga pagserbisyo:

1. Dr. Rosario O. Palacios, 38 years
2. Dr. Julius N. Valenzuela (Posthumous), 17 years
3. George P. Villarin, 34 years
4. Gina B. Regalado, 32 years
5. Ma. Noela B. Reyes, 32 years
6. Dr. William L. Tan, 25 years
7. Zeny B. Vidal, 39 years
8. Editha D. Fernandez, 21 years
9. Nestor B. Contreras, 27 years
10. Susie F. Alayon, 38 years
11. Dave O. Encabo, 30 years
12. Virgil Don D. Calvez, 30 years

Ang mga nag-retired naman sa tuig 2026, amo ang mga masunod:

1. G. Antonio T. Arbis, 33 years
2. Alphonsus D. Tesoro, 18 years
3. Dr. Lourdes Josephine A. Martin, 31 years
4. Dr. Jean A. Gloria, 37 years
5. Engr. Antonio S. Cerado, 28 years
6. Raoul V. Perez, 23 years
7. Dr. Marites A. Malicudio, 32 years
8. Dr. Gemma G. Bavia, 36 years
9. Dr. Paul Steven R. Jinon, 31 years
10. Dr. Joevic A. Belasoto, 33 years
11. Ma. Luisa L. Tuazon, 33 years
12. Florenda D. San Pedro, 33 years
13. Lucresia E. Basa, 33 years
14. Engr. Barth A. Rivera, 36 years
15. Elvira D. Trogo, 36 years
16. Roberta M. Vallar (Posthumous), 45 years
17. Anna Maria P. Gallardo, 31 years
18. Leo A. Laurilla, 33 years
19. Fely D. Diom, 16 years
20. Tita B. Bergantinos, 17 years
21. Roberto D. Dolor, 38 years
22. Josephine P. Degala, 3 years
23. Mary Joan V. Bialen, 28 years
24. Jose Normande A. Vipinosa, 39 years
25. Victor B. Bueno, 21 years
26. Dorothy E. Decara, 28 years
27. Anita B. Ledesma, 31 years
28. Nazel B. Albaña, 36 years
29. Dionalane A. Pablo, 36 years
30. Jenilyn M. Alimon, 36 years
31. Eufresino M. Reyes Jr., 28 years
32. Christopher P. Flores, 33 years
33. Rosita G. Ardeña, 41 years
34. Roberto L. Cordenillo Jr., 34 years
35. Edmund B. Baldonado, 11 years
36. Celso V. Valencia, 39 years

Sa iya mensahe bilang amay sang probinsya, ginpa-abot ni 𝗚𝗼𝘃𝗲𝗿𝗻𝗼𝗿 𝗙𝗿𝗲𝗱𝗲𝗻𝗶𝗹 𝗛. 𝗖𝗮𝘀𝘁𝗿𝗼 ang iya hugot kag tagus sa tagipusuon nga pagpasalamat sa mga retirado. Ginpahayag diri niya nga ang ila mga kontribusyon kag mga marka nga nabilin sa Gobyerno Probinsyal, indi guid malipatan, kag padayon nga magapabilin sa iya tagipusuon. Ginpahanumdom man niya nga bisan yara na sila sa bag-o nga tion sang ila kabuhi, magpadayon sila sa pagpauswag sang ila kaugalingon bilang indibidwal kag propesyonal, kag gamiton ang mas madamo na nga tion para sa ila kaugalingon kag pamilya.

Nagpaabot man diri sang testimonial message sanday anay Provincial Budget Officer G. Antonio Arbis, kag Edmund Baldonado sang Provincial Procurement and Management Unit. Sentro sang mensahe ni Arbis, amo ang mga tinaga nga "work with integrity"; kag ang pinakadaku nga balos sang aton pagtrabaho sa gobyerno, amo ang makasiling kita nga, "I gave my best, I served with purpose and as part of something greater than ourselves".

Makita sa sini nga okasyon ang presensya nanday Vice Governor Jaime Magbanua, Provincial Administrator Atty. Arthur John Biñas, PIO kag Concurrent HRMO Head Atty. Luvim Amores, mga Board Members sang Capiz, mga pamilya sang mga retirees, mga department heads, kag iban pa nga mga empleyado sang Gobyerno Probinsyal.

Salamat sa inyo kontribusyon sa malawig nga pagserbisyo sa mga Capisnon, gabay nga mangin inspirasyon kamo sang masunod nga mga henerasyon sang empleyado sang Gobyerno Probinsyal sang Capiz. Mabuhay kamo tanan!

#𝗪𝗼𝘄𝗢𝗻𝗲𝗖𝗮𝗽𝗶𝘇
#𝗦𝗮𝗚𝘂𝗴𝗺𝗮𝗡𝗶𝗖𝗮𝘀𝘁𝗿𝗼𝗠𝗮𝘆𝗬𝘂𝗵𝘂𝗺𝗞𝗮𝗴𝗕𝗮𝗹𝗮𝘁𝘆𝗮𝗴𝗼𝗻

06/10/2026

𝗧𝗜𝗡𝗚𝗢𝗚 𝗦𝗔𝗡𝗚 𝗠𝗚𝗔 𝗠𝗔𝗡𝗚𝗜𝗡𝗚𝗜𝗦𝗗𝗔 𝗦𝗔 𝗖𝗨𝗟𝗔𝗦𝗜, 𝗚𝗜𝗡𝗣𝗔𝗠𝗔𝗧𝗜𝗔𝗡 𝗡𝗜 𝗚𝗢𝗩. 𝗖𝗔𝗦𝗧𝗥𝗢

Sa tagsa ka pagpalawod sang isa ka mangingisda, indi lamang isda ang iya ginapangita sa kadagatan, kundi ang pagkaon nga ibutang sa lamesa, kwarta para sa adlaw-adlaw nga kinahanglanon, kag paglaum nga may madala siya pauli para sa iya pamilya.

Amo ini ang kabuhi kag kabudlayan nga ginpaambit sang mga mangingisda halin sa Sitio Pook, Brgy. Culasi, sa syudad sang Roxas, nga personal nga nagpadulong sa talatapan ni Governor Fredenil H. Castro subong nga adlaw, Oktubre 6, 2026, agud ipaabot ang ila kahimtangan tuhoy sa ila pangabuhian.

Sa ila pagpakig-angot sa Gobernador, ginpaathag sang mga mangingisda ang nagkalain-lain nga pagtilaw nga ila padayon nga ginaatubang. Lakip diri ang kapigaduhon sang kita halin sa pagpangisda, samtang nagapadayon man ang pagsaka sang gasto sa ila adlaw-adlaw nga pagpangabuhi.

Suno sa ila, daku ang epekto sang El Niño, lakip na ang padayon nga pagsaka sang presyo sang gasolina kag nagkalain-lain nga mga balaklon. Para sa mga pamilya nga nagasalig sa pagpangisda, ang tagsa ka pagsaka sang presyo sang gasolina nagakahulugan sang dugang nga gastos antes pa sila makapalawod, nga wala sang kasiguruhan kon pila ang ila madakpan kag kon igo bala ini agud mabawi ang ila gin-gasto. Sa likod sang sini nga mga kabudlayan amo ang simple apang mabug-at nga handum sang tagsa ka mangingisd, ang makapangabuhi sang matarong kag mapakaon ang ila pamilya paagi sa dungganon nga pagpangabudlay.

Bangud sini, ginpamatian ni Governor Castro ang ila nga kag ginpanugyan sa grupo nga mag-organisar sang ila kaugalingon nga asosasyon sang mga mangingisda. Paagi sa isa ka organisado kag rehistrado nga grupo, mas mangin mahapos ang pagtingob sang ila tingog, pagplastar sang ila mga kinahanglanon, kag pag-angot sa mga programa, madasig nga aksyon, kag iban pa nga suporta sang gobyerno nga mahimo nila mapuslan.

Ang pag-organisar sang asosasyon ginalantaw bilang isa ka tikang agud indi lamang tagsa-tagsa nga mangingisda ang nagapangita sang solusyon sa ila problema, kundi isa ka komunidad nga naga-ugyon para sa mas malig-on nga pangabuhian.

Ilabi sa tanan, ang ila pagbisita nagapahanumdom nga sa likod sang kada isda nga makita naton sa merkado kag kada pagkaon nga nagahalad sang bugay sang kadagatan, yara ang mga kamot sang mga mangingisda nga nagapangabudlay sa tunga sang init, ulan, balod kag indi masaligan nga kita.

Para sa ila, ang pagpangisda indi lamang trabaho. Ini ang ila kabuhi. Ini ang ila palangabuhian. Ini ang ila paagi sa pagbuhi sang ila pamilya.

Padayon nga ginpasiguro sang Gobyerno Probinsyal ang pagpamati sa mga sektor nga nagakinahanglan sang bulig kag ang paglantaw sa mga posible nga tikang agud masabat ang ila mga kinahanglanon, ilabi na ang mga pamilya nga ang adlaw-adlaw nga pagkaon nagadepende sa kadagatan kag sa resulta sang ila pagpalawod.

Kay kon ang tingog sang ordinaryo nga mangingisda ginapamatian, ang iya kabudlayan indi na lamang problema sang isa ka pamilya. Nangin kabahin ini sang mas malapad nga responsibilidad sang komunidad, nga ang mga nagapakaon sa aton halin sa bugay sang kadagatan indi man dapat mapabay-an ang ila pangabuhianan.

#𝗪𝗼𝘄𝗢𝗻𝗲𝗖𝗮𝗽𝗶𝘇
#𝗦𝗮𝗚𝘂𝗴𝗺𝗮𝗡𝗶𝗖𝗮𝘀𝘁𝗿𝗼𝗠𝗮𝘆𝗬𝘂𝗵𝘂𝗺𝗞𝗮𝗴𝗕𝗮𝗹𝗮𝘁𝘆𝗮𝗴𝗼𝗻

Capiz Provincial Government Communications Group

07/10/2026

07/10/2026

07/10/2026

07/10/2026

07/10/2026

06/10/2026

06/10/2026

06/10/2026

06/10/2026

Address

Telephone

Website

Alerts

Contact The Organization

Shortcuts

Share

Category

Listing takedown request