22/09/2026
September 20, 2026 - Adlawng Dominggo,
malipayon namong gisaulog ang akong adlawng natawhan kauban ang akong pinalanggang inahan, Congresswoman Janice Vallega Degamo, sa among panimalay sa Sawang, Bonawon, Siaton, Negros Oriental.
Bisan pa man nga ang akong tinuod nga adlawng natawhan mao ang September 22, among gipili nga himuon ang selebrasyon niadtong Domingo tungod kay adunay importante nga lakaw ang akong pinalanggang inahan sa akong mismong birthday. Gusto usab namo nga mahimong higayon kini aron mas daghan pa sa atong mga kaigsuonan ang makaambit sa gamay nga grasya ug kalipay.
Dili man kini ikatandi sa tanan nga grasya nga atong nadawat, apan among gihatag kini uban sa kinasingkasing nga pagpasalamat ug paghigugma sa atong mga katawhan.
Sa tanan nga mihatag sa ilang panahon, mibisita, ug nakig-uban kanamo sa pagsaulog sa akong adlawng natawhan, daghang salamat kaninyo. Ang inyong presensya usa na ka dakong kalipay ug usa sa pinakanindot nga regalo nga akong nadawat. Labaw pa sa bisan unsang butang, akong gipangga ang panahon ug suporta nga inyong gihatag kanako ug sa among pamilya.
Dako usab ang akong pasalamat sa akong pinalanggang inahan,Congresswoman Janice Vallega Degamo, nga kanunay anaa aron mosuporta, mogiya, ug magdasig kanako. Salamat, Mommy, sa imong gugma ug sa kanunay nimong pagpahinumdom kanamo nga ang tinuod nga serbisyo alang sa katawhan kinahanglan buhaton uban sa kasingkasing, pagkamapainubsanon, ug sinseridad.
Ilabi na gyud sa akong pinalanggang amahan, ang kanhing Governor Roel Ragay Degamo. ❤️
Pa, daghang salamat sa tanan nimong gihimo alang kanamo. Salamat sa imong paggiya kanamo ni Mommy ug sa mga prinsipyo nga imong gibilin nga among gidala hangtod karon. Kung asa man kami karon, dako kaayo ang bahin sa imong gugma, sakripisyo, ug paningkamot.
Dili sayon para kanako ang pagsaulog sa akong adlawng natawhan nga wala ka sa among taliwala. Adunay kahilom ug kasubo nga dili gyud matago. Apan bisan wala ka na namo sa pisikal nga paagi, nagpabilin kanamo ang imong mga tambag, panig-ingnan, ug ang mga maayong buhat nga imong kanunay gipatudlo.
Among paningkamotan, Pa, nga ipadayon ang imong maayong panulondon ang pagtabang sa isigkatawo, pagserbisyo nga walay pagduhaduha, ug paghimo og maayo alang sa atong mga katawhan. Nagtuo kami nga ang Ginoo adunay plano sa tanan, ug among itugyan Kaniya ang tanan namong pangandoy ug mga lakang sa kinabuhi.
Sa akong pamilya, mga higala, kauban sa serbisyo, ug labaw sa tanan, sa tibuok Tiersero Distrito, daghang salamat sa inyong walay puas nga pagsalig, suporta, ug paghigugma.
Ang inyong presensya ug suporta usa ka dakong inspirasyon aron magpadayon ako sa pagserbisyo ug pagbuhat sa unsay maayo alang sa atong mga katawhan.
DAGHANG SALAMAT SA INYONG TANAN, TIERSERO DISTRITO!
