18/09/2026
Kahapon, 17 September 2026, pormal nating inihain sa 35th Regular Session ng Sangguniang Kabataan ng Barangay VASRA ang SK Resolution No. 034, Series of 2026: “A RESOLUTION STRONGLY OPPOSING ANY LEGISLATIVE MEASURE TO POSTPONE THE NOVEMBER 2, 2026 BARANGAY AND SANGGUNIANG KABATAAN ELECTIONS (BSKE) AND DEMANDING THE COMMISSION ON ELECTIONS (COMELEC) TO STRENGTHEN THE INTEGRITY OF THE SCHEDULED POLLS."
Buo at hindi matitinag ang ating paninindigan: dapat ibigay ang pinakamataas na paggalang sa boto at boses ng bawat mamamayan. Bilang Tagapangulo ng Committee on Active Citizenship, mariin kong iginigiit na walang tunay na demokrasya kung walang boses ang taumbayan. Hindi kailanman magiging makatarungan ang pamumuno kung hindi ito nagmumula sa malayang pagpapasya ng taong-bayan.
Bilang mga lider-kabataan at kasalukuyang naglilingkod sa ating barangay, napakahalagang marinig ang ating boses ukol sa isyung ito. Hindi lamang ito usapin ng kaayusan ng konseho o ng pagtiyak na maipatupad ang mga proyektong nakalatag; usapin din ito ng harap-harapang pagtatanggal sa ating karapatang mamili nang tama at naaayon sa tunay na pangangailangan ng ating komunidad. Hindi lahat ng barangay ay mayroong functioning na SK Council tulad ng SK VASRA, na nakakapaghatid ng mga proyektong nakasandig sa pangangailangan ng mga kabataan sa aming komunidad. Paano na lamang ang mga komunidad kung saan pulitika ang umiiral at humahadlang upang maabot ng mamamayan ang basic services? Huwag nating panghawakan ang posisyon para sa pansariling interes lamang! Ang ating barangay at ang taumbayan ang siyang dapat magpasiya!
Malinaw ang naging desisyon ng Korte Suprema sa landmark case na Macalintal v. COMELEC (G.R. No. 263590, 27 June 2023), kung saan idineklarang labag sa Saligang Batas o UNCONSTITUTIONAL ang nakaraang pagpapaliban ng BSKE sa ilalim ng Republic Act No. 11935. Naniniwala tayong ang pagpapaliban ng halalan ay lumalabag sa karapatan sa pagboto at sa prinsipyo ng regular at may takdang panahon na pamumuno. Kaya naman, ang anumang panibagong pagtatangkang ipagpaliban ang halalan ay tahasang pagyurak sa ating Konstitusyon.
Kahit naipasa man sa parehong Lower House at Upper Chamber ng Kongreso ang kani-kanilang bersyon ng sinasabing "pagsasaayos ng termino" upang muling ipagpaliban ang takdang halalan sa November 2, 2026, patuloy tayong lalaban at igigiit na DAPAT ITULOY ANG ELEKSYON. Ang panibagong pagpapaliban ay magpapalawig lamang sa termino ng mga nakaupong opisyal nang walang bagong mandato mula sa publiko, na nagpapahina sa tiwala ng mamamayan sa ating mga lokal na institusyon.
Hindi pa huli ang lahat! Maaari pang i-veto ng Pangulo ang mga panukalang batas na ito. Ngayon natin makikita kung tunay bang nakikinig ang Pangulo sa kanyang mamamayan. ALL EYES ARE ON YOU!
Kaya naman, ang buong konseho ng Sangguniang Kabataan ng Barangay VASRA, ay lumagda at sumang-ayon sa SK Resolution 034, Series of 2026, at kami ay mariing tumututol sa anumang panukalang batas o hakbangin na naglalayong ipagpaliban, i-delay, o isuspinde ang November 2, 2026 Barangay and Sangguniang Kabataan Elections.
Kasabay nito, pormal nating itinutulak at hinihiling sa Commission on Elections (COMELEC) na gampanan ang kanilang mandato, tutulan ang anumang hindi konstitusyonal na pagkaantala, at ituon ang buong kakayahan upang patatagin ang integridad, kalinisan, at kaayusan ng nakatakdang halalan.
Ituloy ang Halalan! Igalang ang Boto ng Taumbayan!