05/10/2026
OPISYAL NA PAHAYAG NG BARANGAY BAGBAGUIN PATUNGKOL SA POST NI G. JA ESCOBAR SA KANYANG PERSONAL FACEBOOK ACCOUNT
Una sa lahat, humihingi po kami ng pang-unawa kung medyo natagalan ang aming pagtugon sa nasabing post.
Kinailangan po namin ng sapat na panahon upang ma-verify ang lahat ng impormasyong kaugnay ng insidente, masuri ang ambulance logbook, at makuha ang salaysay ng mga taong direktang sangkot, upang matiyak na ang aming ilalabas na pahayag ay naaayon sa aktuwal na nangyari.
Hindi po namin nais na agad magbigay ng pahayag nang hindi muna nasusuri nang maayos ang buong pangyayari. Mahalaga sa amin na maging tama, patas, at batay sa mga dokumento at salaysay ang anumang paglilinaw na aming ilalabas.
Una sa lahat, nais po naming linawin na sa Barangay Bagbaguin ay walang scheduling system sa paggamit ng ambulansya. Lahat ng emergency cases ay agad na tinutugunan at itinatakbo ng barangay ambulance. Kung sakaling wala ang ambulansya dahil kasalukuyan itong may tinutugunang emergency, agad itong itinatawag sa Valenzuela Rescue upang matugunan ang pangangailangan ng pasyente.
Ikalawa, ayon sa aming ambulance logbook, sa oras at araw ng nasabing insidente ay may apat (4) na pasyente na sabay-sabay na nagtungo sa barangay upang humingi ng transportasyon. Ang kamag-anak ni G. Escobar ang ikaapat. Sa pagdating ng kamag-anak ng nanay ni JA Escobar, ang ambulansya ay kasalukuyang may sakay nang pasyente na hinimatay at walang malay at nangangailangan ng agarang atensyong medikal. Mayroon din itong kasabay na pasyente na isang dialysis patient, na ibinaba sa Hope Dialysis Center, na along the way papunta sa Valenzuela Emergency Hospital. Ayon sa ambulance driver, malinaw niyang ipinaalam na kung kaya namang umupo ng pasyente ay maaari na nila itong isabay. Gayunpaman, iginiit ng kamag-anak na kinakailangan ng pasyente ang stretcher. Dahil dito, ipinaalam ng ambulance driver na babalikan sila pagkatapos maihatid ang kasalukuyang pasyente sa ospital.
Sa pagkakataong iyon, pumayag naman sila at nagpahayag na handa silang mag-standby at maghintay sa pagbabalik ng ambulansya. Tatlong (3) beses ding nilinaw ng ambulance driver na babalikan sila matapos maihatid ang kasalukuyang pasyente. Pagdating ng ambulansya sa Valenzuela Emergency Hospital, agad na tumawag ang ambulance driver upang ipaalam na pabalik na siya at upang maabisuhan ang kamag-anak na naiwan sa barangay. Sa pagkakataong iyon, payag pa rin naman sila at nagpahayag na handa silang mag-standby at maghintay sa pagbabalik ng ambulansya. Ngunit, makalipas lamang ang ilang minuto, bigla nilang binawi ang kanilang desisyon na maghintay at sinabi na magbu-book na lamang sila ng Grab.
Sa kabila nito, ipinaabot pa rin ng ambulance driver sa dispatcher na ipaalam sa kamag-anak na kung sino man ang maunang makarating sa kanila ng Grab, siya ang magdadala sa pasyente sa Fatima Hospital, upang matiyak na hindi na maaantala ang kinakailangang pagpapagamot ng pasyente.
Ikatlo, nais din naming ipahayag na nakakasama po ng loob ang ilan sa mga mensaheng aming natanggap kaugnay ng insidenteng ito.
Nauunawaan namin ang pag-aalala ng bawat isa para sa kanilang mahal sa buhay, ngunit hindi po nararapat ang paggamit ng mga salitang nagmumura, nanlalait, o tumatawag ng βtontaβ sa mga taong nagsisikap tumugon sa emergency situations.
Hinihiling po namin na bago magbigay ng komento o manghusga sa nangyari, alamin muna ang buong pangyayari at aktuwal na sitwasyon, upang maiwasan ang pagbibigay ng maling impormasyon o pagpapalala ng usapin.
Ang aming layunin ay hindi ang makipagtalo o manisi ng sinuman. Nais lamang po naming mailahad ang panig ng Barangay Bagbaguin at ang aktuwal na pangyayari batay sa ambulance logbook at sa salaysay ng mga taong direktang sangkot, upang maging malinaw sa lahat ang naging proseso at desisyon noong araw na iyon.
Muli, humihingi po kami ng pang-unawa kung hindi kami agad nakapagbigay ng pahayag. Kinailangan po naming maglaan ng oras upang maayos na beripikahin ang bawat detalye bago magsalita, dahil nais naming maging responsable at patas sa lahat ng panig.
Maraming salamat po sa inyong pang-unawa.
