Commissioner Hazara

24/09/2026

*ڈیزاسٹر رسک ریڈکشن پالیسی 2030-2026 کے نفاذ کے حوالے سے ڈویژنل مشاورتی ورکشاپ*

خیبر پختونخوا میں ڈیزاسٹر رسک ریڈکشن (Desaster Risk Reduction) پالیسی 2030-2026 کے اجراء اور نفاذ کے حوالے سے ریجنل سطح پر مشاورتی ورکشاپ جمعرات کے روزایبٹ آباد کے ایک نجی ہوٹل میں منعقد ہوئی اس مشاورتی ورکشاپ کی صدارت ایڈیشنل کمشنر ہزارہ ڈویژن جاوید اقبال نے کی۔ ورکشاپ میں ڈی آر ایم ایڈوائزر ڈیزاسٹر رسک مینجمنٹ پی ڈی ایم اے اسماعیل یوسف زئی، ہزارہ ڈویژن کے آٹھ اضلاع کے ایڈیشنل ڈپٹی کمشنرز، مختلف محکموں کے افسران اور متعلقہ ماہرین نے شرکت کی۔ورکشاپ کا مقصدتمام اسٹیک ہولڈرزکے ساتھ مشاورتی نشست کا اہتمام کر نا اور قدرتی آفات کے خطرات میں کمی، آفات سے نمٹنے کی تیاری اور عوام کے تحفظ کے لیے علاقائی و ضلعی سطح کی ترجیحات، عملی اقدامات، اداروں کی ذمہ داریوں، باہمی رابطہ کاری اور وسائل کی ضروریات کا تعین کرنا تھا تاکہ ان سفارشات کو صوبائی ڈیزاسٹر رسک ریڈکشن پالیسی کے پانچ سالہ منصوبے میں شامل کیا جا سکے۔مشاورتی ورکشاپ کے شرکاء نے مختلف اضلاع میں قدرتی آفات کے ممکنہ خطرات، موجودہ انتظامات، درپیش مسائل اور ترجیحی ضروریات کا تفصیلی جائزہ لیا اور آفات سے قبل مؤثر تیاری، بروقت رسپانس اور نقصانات میں کمی کے لیے مختلف تجاویز پیش کیں۔ ورکشاپ میں اس امر پر بھی زور دیا گیا کہ ہزارہ ڈویژن کے مختلف اضلاع کی جغرافیائی، موسمی اور مقامی ضروریات کو مدنظر رکھتے ہوئے ضلعی سطح پر مخصوص ڈیزاسٹر رسک ریڈکشن اقدامات کومجوزہ پالیسی کے منصوبے کا حصہ بنایا جائے۔ڈی آر ایم ایڈوائزر پی ڈی ایم اے اسماعیل یوسف زئی نے ڈیزاسٹر رسک ریڈکشن کی ترقی اور مؤثر نفاذ کے حوالے سے شرکاء کو تفصیلی بریفنگ دی اور پالیسی کے تحت ترجیحات، ادارہ جاتی ذمہ داریوں اور آفات کے خطرات میں کمی کے لیے مجوزہ اقدامات سے آگاہ کیا۔ایڈیشنل کمشنر ہزارہ ڈویژن جاوید اقبال نے ورکشاپ کے شرکاء سے خطاب کر تے ہوئے کہا کہ قدرتی آفات سے نمٹنے اور ان کے خطرات میں کمی کے لئے اس طرح کی مشاورتی نشستوں کاانعقاد پالیسی سازی میں اہم کردار اداکر تا ہے۔انھوں نے متعلقہ حکام پر زور دیا کہ ڈیزاسٹر رسک مینجمنٹ کو مزید مؤثر بنانے، اداروں کے درمیان مربوط رابطہ کاری کو یقینی بنانے اور ضلعی سطح پر ہنگامی حالات سے نمٹنے کی استعدادِ کار بڑھانے کے لیے عملی اقدامات کیے جائیں۔ انہوں نے کہا کہ قدرتی آفات کے خطرات کو کم کرنے کے لیے پیشگی منصوبہ بندی، مربوط حکمت عملی اور تمام متعلقہ اداروں کی مؤثر شمولیت ناگزیر ہے۔

22/09/2026

کمشنر ہزارہ ڈویژن شاہد اللہ خان کا ایبٹ آباد بورڈ کا دورہ، پوزیشن ہولڈرز میں شیلڈز تقسیم

ایبٹ آباد: کمشنر ہزارہ ڈویژن شاہد اللہ خان نے بورڈ آف انٹرمیڈیٹ اینڈ سیکنڈری ایجوکیشن ایبٹ آباد کے دفتر کا دورہ کیا، جہاں انہوں نے فرسٹ اور سیکنڈ ایئر کے امتحانات میں نمایاں پوزیشنیں حاصل کرنے والے طلبہ و طالبات میں شیلڈز تقسیم کیں۔ اس موقع پر چیئرمین ایبٹ آباد بورڈ عنایت اللہ وسیم، کنٹرولر امتحانات بابر احمد عباسی اور بورڈ کے دیگر افسران بھی موجود تھے۔ کمشنر ہزارہ نے کامیاب طلبہ و طالبات کو مبارکباد دی اور ان کے روشن مستقبل کے لیے نیک خواہشات کا اظہار کیا۔

18/09/2026

صوبائی حکومت | گڈ گورننس | ڈسٹرکٹ سروس ڈیلیوری

◀️ نیشنل انسٹیٹیوٹ آف مینجمنٹ اسلام آباد کے 47ویں مڈ کیرئیر مینجمنٹ کورس کے شرکاء افسران کا ڈویژنل ہیڈکوارٹر ایبٹ آباد کا دورہ۔ کمشنر ہزارہ ڈویژن کی جانب سے ڈپٹی کمشنر ایبٹ آباد سرمد سلیم اکرم اور ڈاکٹر شبیر احمد آکاش سیکرٹری ٹو کمشنر ہزارہ نے شرکاء کو خوش آمدید کہا۔

◀️ ڈپٹی کمشنر ایبٹ آباد سرمد سلیم اکرم نے شرکاء کو ہزارہ ڈویژن کے جغرافیائی خدوخال، مختلف محکموں کی کارکردگی، ہیلتھ و ایجوکیشن، شہریوں کو سروسز کی فراہمی، ریونیو سروسز، ون ونڈو آپریشن اور کمپیوٹرائزیشن آف لینڈ ریکارڈ کے حوالے سے تفصیلی بریفنگ دی۔

◀️ بریفنگ کے دوران داسو ہائیڈرو پاور پراجیکٹ، دیامیر بھاشا ڈیم، سوکی کناری اور بالاکوٹ ہائیڈرو پاور پراجیکٹس سمیت بڑے ترقیاتی منصوبوں، جبکہ سٹی امپرومنٹ پراجیکٹ کے تحت صاف پانی کی فراہمی، سالڈ ویسٹ مینجمنٹ، بازاروں میں پیدل چلنے والوں کے لیے راستوں، شہری انفراسٹرکچر اور اپ لفٹنگ کے اقدامات پر بھی روشنی ڈالی گئی۔

◀️ شرکاء کو سیاحت کے فروغ، ٹھنڈیانی روڈ کی کشادگی، نئے سیاحتی مواقع، غیر قانونی ہاؤسنگ سوسائٹیز، بلڈنگ پلان پر عملدرآمد، غیر قانونی مائننگ، جنگلات کے تحفظ، بے ہنگم تعمیرات کی روک تھام، گراؤنڈ واٹر لیول میں کمی اور مستقبل میں صاف پانی کی فراہمی کے حوالے سے اقدامات سے آگاہ کیا گیا۔

◀️ ڈپٹی کمشنر نے حالیہ بارشوں کے دوران اربن فلڈنگ کی روک تھام کے لیے اقدامات، آبادی اور انفراسٹرکچر میں اضافے کے اثرات، ہاؤسنگ سوسائٹی قوانین میں بہتری اور ہزارہ ڈویژن کے مختلف محکموں کی مجموعی کارکردگی کے حوالے سے بھی تفصیلی بریفنگ دی۔ آخر میں ڈپٹی کمشنر ایبٹ نے کمشنر ہزارہ شاہداللہ خان کی جانب سے کورس کی ڈائریکٹر کو شیلڈ پیش کی۔

18/09/2026

17/09/2026

*کمشنر ہزارہ ڈویژن کی زیر صدارت ڈویژنل ٹاسک فورس برائے انسدادِ پولیو کا اجلاس*

*ہزارہ میں 21 ستمبر سے شروع ہونے والی انسداد پولیو مہم میں 7 لاکھ 88 ہزار 992 بچوں کو قطرے پلانے کا ہدف*

کمشنر ہزارہ ڈویژن شاہد اللہ خان کی زیر صدارت ڈویژنل ٹاسک فورس برائے انسداد پولیو کا اہم اجلاس جمعرات کے روز ان کے دفتر میں منعقد ہوا، جس میں ہزارہ ڈویژن کے تمام اضلاع کے ڈپٹی کمشنرز، ضلعی صحت افسران اور انسداد پولیو ٹیموں کے نمائندگان نے ویڈیو لنک کے ذریعے شرکت کی۔ اجلاس میں عالمی ادارہ صحت کے ایریا کوآرڈینیٹر ڈاکٹر خورشید نوید نے انسداد پولیو مہم کی تیاریوں اور دیگر متعلقہ امور سے متعلق بریفنگ دی۔

اجلاس میں بتایا گیا کہ 21 ستمبر سے شروع ہونے ہونے انسداد پولیو اس مہم کے دوران ہزارہ ڈویژن میں انسداد پولیو مہم کے دوران کل 788,992 بچوں کو پولیو سے بچاؤ کے قطرے پلانے کا ہدف مقرر کیا گیا ہے۔

اس موقع پر کمشنر ہزارہ شاہد اللہ خان نے کہا کہ انسداد پولیو مہم میں بچوں تک سو فیصد رسائی اور کوریج کے معیار کو بہتر بنانے کے لیے ہر مہم سے قبل عملی منصوبہ بندی کی مکمل اور جامع جانچ پڑتال ناگزیر ہے۔ انہوں نے کہا کہ منصوبہ بندی کی مؤثر جانچ سے مہم کے معیار، رہ جانے والے بچوں اور دیگر خامیوں کی بروقت اور درست نشاندہی ممکن ہوگی، جس کے بعد ان خامیوں کا فوری ازالہ کرکے مہم کے نتائج کو مزید بہتر بنایا جا سکتا ہے۔

کمشنر ہزارہ نے ہدایت کی کہ تربیتی پروگراموں میں ضلعی صحت افسران خود شرکت کریں اور پولیو ٹیموں کی تربیت کے معیار کو یقینی بنائیں تاکہ فیلڈ میں ٹیمیں بہتر انداز میں اپنی ذمہ داریاں انجام دے سکیں۔ انہوں نے کہا کہ انسداد پولیو مہم کا معیار ہر صورت اعلیٰ ہونا چاہیے اور مہم کی کارکردگی کے تمام اشاریے مثبت نظر آنے چاہئیں نہ کہ منفی۔

انہوں نے متعلقہ افسران کو ہدایت کی کہ مہم کے دوران سامنے آنے والی تمام خامیوں اور کمزوریوں کی فوری نشاندہی کرکے ان کی بروقت اصلاح کی جائے تاکہ آئندہ مہم کے نتائج مزید بہتر بنائے جا سکیں۔

کمشنر ہزارہ نے مزید کہا کہ مؤثر منصوبہ بندی، مکمل کوریج، معیاری تربیت اور فیلڈ میں بھرپور نگرانی کے ذریعے انسداد پولیو مہم کو کامیاب بنایا جا سکتا ہے اور ملک کو پولیو جیسی موذی بیماری سے نجات دلانے کے لیے تمام متعلقہ اداروں کو اپنا کردار مزید مؤثر انداز میں ادا کرنا ہوگا۔

کمشنر ہزارہ ڈویژن شاہد اللہ خان نے والدین سے اپیل کی کہ 21 ستمبر 2026 سے شروع ہونے والی انسداد پولیو مہم کے دوران پولیو ٹیموں کے ساتھ بھرپور تعاون کریں اور اپنے پانچ سال سے کم عمر تمام بچوں کو پولیو سے بچاؤ کے قطرے ضرور پلوائیں، تاکہ بچوں کو اس موذی مرض سے محفوظ رکھا جا سکے۔

17/09/2026

A meeting regarding the boundary dispute between Tangir District, Diamer, Gilgit-Baltistan and Dassu District, Upper Kohistan, Khyber Pakhtunkhwa, in connection with the land acquisition and resettlement activities of the Dasu Hydropower Project (DHPP), was held under the chairmanship of Commissioner Hazara, Shahidullah Khan. The meeting was attended by the Commissioner, Diamer-Astore Division; Deputy Commissioner, Upper Kohistan; General Manager, DHPP and Deputy Commissioner, Diamer, while the Director General, Social Safeguards, Dasu Project, Advisor Dasu; Director, Social and Resettlement and Assistant Director, Land Acquisition participated through video link. The General Manager, DHPP,and Deputy Commissioner, Diamer briefed the participants on the subject issue and apprised the forum of the relevant matters. After detailed discussion, necessary directions were issued to the concerned authorities accordingly.

15/09/2026

برانڈو ہائیڈرو پاور پراجیکٹ تورغر کے حوالے سے اہم اجلاس/جرگہ، مختلف امور پر تفصیلی غور

آج کمشنر ہزارہ شاہد اللہ خان کے دفتر میں برانڈو ہائیڈرو پاور پراجیکٹ کے حوالے سے ایک اہم اجلاس/جرگہ منعقد ہوا، جس میں رکن قومی اسمبلی شہزادہ گستاسپ محمد خان، رکن صوبائی اسمبلی لیاقت محمد خان اور برانڈو ہائیڈرو پاور پراجیکٹ کے پراجیکٹ ڈائریکٹر نے شرکت کی، جبکہ ڈپٹی کمشنر تورغر نے ویڈیو لنک کے ذریعے اجلاس میں شرکت کی۔

اجلاس کے دوران برانڈو ہائیڈرو پاور پراجیکٹ سے متعلق مختلف مسائل، تحفظات اور دیگر اہم امور پر تفصیلی تبادلہ خیال کیا گیا۔ تمام شرکاء نے منصوبے کے حوالے سے اپنے مؤقف، تحفظات اور درپیش مسائل سے آگاہ کیا۔

کمشنر ہزارہ شاہد اللہ خان نے تمام شرکاء کے مؤقف اور تحفظات کو غور سے سنا اور یقین دہانی کرائی کہ عوام اور متعلقہ فریقین کے جائز اور حقیقی تحفظات کو مناسب فورم پر اٹھایا جائے گا اور ان کے حل کے لیے ہر ممکن اقدامات کیے جائیں گے۔

15/09/2026

ٹھنڈیانی روڈ کے تعمیراتی معیار پر کسی قسم کا سمجھوتہ نہ کیا جائے، کمشنر ہزارہ ڈویژن شاہد اللہ خان

ایبٹ آباد: کمشنر ہزارہ ڈویژن شاہد اللہ خان کی زیرِ صدارت کے آئی ٹی ای (KITE) منصوبے کے تحت ٹھنڈیانی روڈ کی تعمیر پر جاری کام کی پیش رفت کا جائزہ لینے کے لیے اجلاس منعقد ہوا۔ اجلاس میں ڈپٹی کمشنر ایبٹ آباد، محکمہ مواصلات و تعمیرات کے منصوبہ ڈائریکٹر، کے آئی ٹی ای پراجیکٹ کے افسران، نیشنل انجینئرنگ سروسز پاکستان کے انجینئر عمران خان گنڈاپور، جنرل منیجر، ٹیم لیڈر اور دیگر متعلقہ افسران نے شرکت کی۔اجلاس میں متعلقہ حکام نے کمشنر ہزارہ کو سڑک کی تعمیر کی موجودہ صورتحال اور کام میں حائل رکاوٹوں کے حوالے سے تفصیلی بریفنگ دی۔

بریفنگ میں بتایا گیا کہ تعمیراتی کام میں تیزی آ گئی ہے، تاہم تین مقامات پر بعض رکاوٹیں موجود ہیں۔کمشنر ہزارہ ڈویژن شاہد اللہ خان نے ہدایت کی کہ ٹھنڈیانی روڈ کی تعمیر میں تعمیراتی معیار پر کسی قسم کا سمجھوتہ نہیں کیا جائے گا اور سڑک کو اعلیٰ معیار کے مطابق تعمیر کیا جائے۔ انہوں نے مزید ہدایت کی کہ عوام کی سہولت کو پیشِ نظر رکھتے ہوئے منصوبے کو جلد از جلد مکمل کیا جائے تاکہ شہریوں کو آمدورفت میں آسانی فراہم ہو اور علاقے کی ترقیاتی سرگرمیوں کو فروغ مل سکے۔

انہوں نے محکمہ مواصلات و تعمیرات کو ہدایت کی کہ کسی بھی مسئلے کی صورت میں ضلعی انتظامیہ کو فوری طور پر آگاہ کیا جائے۔کمشنر ہزارہ نے کہا کہ ٹھنڈیانی روڈ کو علاقے کی ایک مثالی سڑک کے طور پر تعمیر کیا جائے اور منصوبے کو ترجیحی بنیادوں پر مکمل کیا جائے تاکہ آئی ٹی زون پارک پر کام کا آغاز ممکن ہو سکے۔ انہوں نے متعلقہ حکام کو تعمیراتی کام کی رفتار، معیار اور بروقت تکمیل یقینی بنانے کی بھی ہدایت کی۔

11/09/2026

گلیات ڈویلپمنٹ اتھارٹی کی جانب سے سیاحوں کو جدید، بروقت اور جامع سفری معلومات فراہم کرنے کے لیے ’’Go Galiyat 360‘‘ ٹورازم ایپ متعارف کرا دی گئی، جس کا باقاعدہ افتتاح کمشنر ہزارہ ڈویژن شاہد اللہ خان نے کیا۔
افتتاحی تقریب میں ڈائریکٹر جنرل گلیات ڈویلپمنٹ اتھارٹی محمد فواد سمیت ادارے کے مختلف ڈائریکٹرز اور متعلقہ افسران بھی موجود تھے۔ اس موقع پر ڈائریکٹر جنرل گلیات ڈویلپمنٹ اتھارٹی محمد فواد نے کمشنر ہزارہ ڈویژن کو Go Galiyat 360 ایپ کے مختلف فیچرز اور افادیت کے حوالے سے تفصیلی بریفنگ دی۔
بریفنگ میں بتایا گیا کہ جدید ٹیکنالوجی سے مزید اس ایپ کے ذریعے گلیات آنے والے ملکی و غیر ملکی سیاحوں کو ایک ہی پلیٹ فارم پر موسم کی تازہ صورتحال، سڑکوں اور سفری حالات، اہم سیاحتی مقامات، راستوں، رہنمائی اور دیگر ضروری معلومات تک رسائی حاصل ہوگی۔
ایپ کا مقصد گلیات میں سیاحوں کے سفر کو مزید محفوظ، آسان بنانا اور انہیں دورانِ سفر بروقت معلومات فراہم کرنا ہے، تاکہ سیاح بہتر منصوبہ بندی کے ساتھ گلیات کے قدرتی حسن اور سیاحتی مقامات سے لطف اندوز ہو سکیں۔
اس موقع پر کمشنر ہزارہ ڈویژن شاہد اللہ خان نے گلیات میں سیاحوں کی سہولت کے لیے جدید ٹیکنالوجی کے استعمال کو سراہتے ہوئے کہا کہ ڈیجیٹل سہولیات کے فروغ سے سیاحوں کو بہتر سفری تجربہ فراہم کرنے کے ساتھ ساتھ خطے میں سیاحت کے فروغ میں بھی مدد ملے گی۔
ڈائریکٹر جنرل GDA محمد فواد نے کہا کہ گلیات ڈویلپمنٹ اتھارٹی سیاحوں کو بہترین سہولیات کی فراہمی، محفوظ سفر اور جدید ٹیکنالوجی کے ذریعے سیاحتی خدمات کو مزید مؤثر بنانے کے لیے اقدامات جاری رکھے ہوئے ہے۔ Go Galiyat 360 اسی سلسلے کی ایک اہم کاوش ہے، جو گلیات آنے والے سیاحوں کے لیے ایک جامع ڈیجیٹل گائیڈ کے طور پر معاون ثابت ہوگی۔
https://play.google.com/store/apps/details?id=pk.gov.gda.gda_tourism

11/09/2026

عوامی مسائل کا بروقت حل، شفاف انتظامیہ اور بہتر گورننس ہماری اولین ترجیح ہے، کمشنر ہزارہ شاہد اللہ خان کا کے ٹو ٹی وی کو خصوصی انٹرویو