17/10/2026
ڈپٹی کمشنر دکی فضل الرحمان کبدانی کی ہدایت پر تجاوزات اور گراں فروشی کے خلاف کارروائی، متعدد دکانیں سیل
ڈپٹی کمشنر دکی فضل الرحمان کبدانی کی خصوصی ہدایت پر اسسٹنٹ کمشنر دکی محمد اکرم خان حریفال نے شہر کے مختلف بازاروں اور شاہراہوں کا دورہ کیا، جہاں تجاوزات، غیر قانونی طور پر کھڑی ریڑھیوں اور گراں فروشی کے خلاف کارروائی عمل میں لائی گئی۔ اس دوران دکانوں کے سامنے اضافی سامان رکھ کر عوامی راستوں میں رکاوٹ پیدا کرنے والے دکانداروں کے خلاف کارروائی کرتے ہوئے متعدد دکانیں سیل کر دی گئیں، جبکہ مقررہ نرخوں سے زائد قیمتوں پر اشیائے ضروریہ فروخت کرنے والوں کو بھی کارروائی کا سامنا کرنا پڑا۔
اسسٹنٹ کمشنر نے دکانداروں کو ہدایت کی کہ وہ سرکاری احکامات پر عمل درآمد یقینی بنائیں، تجاوزات سے گریز کریں اور اشیائے ضروریہ مقررہ نرخوں پر فروخت کریں۔ انہوں نے واضح کیا کہ شہریوں کی سہولت، ٹریفک کی روانی برقرار رکھنے اور بازاروں میں نظم و ضبط قائم کرنے کے لیے کسی قسم کی خلاف ورزی برداشت نہیں کی جائے گی۔ ضلعی انتظامیہ دکی نے عوام کو ریلیف فراہم کرنے اور شہر کو تجاوزات سے پاک رکھنے کے عزم کا اعادہ کرتے ہوئے کہا کہ خلاف ورزی کرنے والوں کے خلاف قانونی کارروائیاں جاری رہیں گی۔
