Assistant Commissioner/ SDM Danyore

21/10/2026

19/10/2026

پریس ریلیز
دفتر اسسٹنٹ کمشنر دنیور، ضلع گلگت

دنیور میں غیر قانونی تجاوزات کے خاتمے، قانون کی بالادستی اور عوامی گزرگاہوں کی بحالی کے لیے جامع لائحہ عمل طے

دنیور، 19 اکتوبر 2026ء: اسسٹنٹ کمشنر دنیور، کیپٹن (ر) حسن سلیم بٹ کی زیرِ صدارت اسسٹنٹ کمشنر آفس دنیور میں شاہراہِ قراقرم (KKH) اور دنیور بازار میں قائم غیر قانونی تجاوزات کے خاتمے کے حوالے سے ایک اہم اجلاس منعقد ہوا، جس میں متعلقہ سرکاری محکموں، انجمنِ تاجران اور محکمہ مال کے نمائندوں نے شرکت کی۔

اجلاس میں اس امر پر زور دیا گیا کہ قانون کی بالادستی، عوامی حقوق کا تحفظ، شاہراہِ قراقرم پر ٹریفک کی روانی اور عوامی گزرگاہوں کی بحالی انتظامیہ کی اہم ترجیحات میں شامل ہیں۔ اس مقصد کے حصول کے لیے تمام متعلقہ اداروں کے باہمی تعاون سے ایک جامع اور مرحلہ وار حکمتِ عملی مرتب کی گئی۔
اجلاس میں فیصلہ کیا گیا کہ کسی بھی باقاعدہ کارروائی سے قبل متعلقہ محکموں کے نمائندے دنیور بازار اور شاہراہِ قراقرم کے اطراف کا مشترکہ اور تفصیلی سروے کریں گے، جس کے دوران غیر قانونی تجاوزات کی نشاندہی اور موقع پر حدبندی کی جائے گی۔ بعد ازاں متعلقہ افراد کو تجاوزات رضاکارانہ طور پر ختم کرنے کے لیے مناسب مہلت دی جائے گی۔
مقررہ مدت گزرنے کے باوجود برقرار رہنے والی تجاوزات کے خلاف، محکمہ این ایچ اے (NHA) کی جانب سے ضروری مشینری کی فراہمی اور متعلقہ قانونی تقاضے پورے ہونے کے بعد، تحصیل انتظامیہ دیگر متعلقہ محکموں کے تعاون سے قانون کے مطابق کارروائی عمل میں لائے گی۔
اسسٹنٹ کمشنر دنیور نے اس عزم کا اظہار کیا کہ تجاوزات کے خاتمے کے لیے کارروائی شفاف، منظم اور بلاامتیاز کی جائے گی، تاکہ سرکاری اراضی اور عوامی گزرگاہوں کا تحفظ یقینی بنایا جا سکے۔ اس عمل میں قانون کے تقاضوں، متعلقہ افراد کے حقوق اور مقررہ طریقۂ کار کو ملحوظِ خاطر رکھا جائے گا۔

انتظامیہ کی جانب سے تاجروں اور عوام سے اپیل کی گئی ہے کہ وہ قانون کی پاسداری کرتے ہوئے غیر قانونی تجاوزات رضاکارانہ طور پر ختم کرنے میں تعاون کریں۔ عوامی تعاون سے نہ صرف بازار میں آمدورفت کو بہتر بنایا جا سکتا ہے بلکہ ایک صاف، منظم اور تجاوزات سے پاک شہری ماحول بھی قائم کیا جا سکتا ہے۔

دفتر اسسٹنٹ کمشنر دنیور
ضلع گلگت

15/10/2026

اسسٹنٹ کمشنر دنیور کیپٹن (ر) حسن سلیم بٹ کے خصوصی احکامات پر میونسپل مجسٹریٹ دنیور نے صدر انجمن تاجران و جنرل سیکرٹری کے ہمراہ بازار کا دورہ کیا۔ دورانِ کارروائی فٹ پاتھ اور عوامی گزرگاہیں تجاوزات سے خالی کروائی گئیں۔ ٹریفک پولیس کی جانب سے مختلف مقامات پر غلط پارکنگ اور ٹریفک میں خلل ڈالنے والے 3 افراد کو دفعہ 290 PPC کے تحت مجسٹریٹ کے روبرو پیش کیا گیا، جن پر جرمانے عائد کیے گئے۔ دکانداران اور ڈرائیورز کو آئندہ تجاوزات و غلط پارکنگ سے گریز کی سخت ہدایات جاری کی گئیں۔

04/10/2026

پریس ریلیز

دنیور میں سوک ڈے اور صفائی مہم، 12 ٹن سے زائد کچرا تلف

دنیور، 04 اکتوبر 2026:
اسماعلی کونسل دنیور کی جانب سے انجمن امامیہ دنیور اور تحصیل انتظامیہ دنیور کے تعاون سے سب ڈویژن دنیور میں سوک ڈے (Civic Day) کے سلسلے میں خصوصی صفائی و آگاہی مہم کا انعقاد کیا گیا۔

مہم میں تحصیل انتظامیہ دنیور، ویسٹ مینجمنٹ، اسماعلی کونسل، انجمن امامیہ، مقامی کمیونٹی، دکانداران، رضاکاران اور دیگر متعلقہ سرکاری و غیر سرکاری اداروں نے بھرپور شرکت کی۔

صفائی مہم کے دوران دنیور سے رحیم آباد تک مختلف مقامات پر صفائی کی گئی، جس کے نتیجے میں 12 ٹن سے زائد کچرا جمع کرکے تلف کیا گیا۔ مہم کا مقصد دنیور کو صاف ستھرا رکھنے کے ساتھ ساتھ شہریوں اور دکانداران میں صفائی، مناسب کچرا تلف کرنے اور ماحولیاتی تحفظ کے حوالے سے شعور اجاگر کرنا تھا۔

مہم کے اختتام پر منعقدہ تقریب میں ممبر قانون ساز اسمبلی محترمہ کلثوم مہدی نے شرکت کی۔ انہوں نے صفائی مہم کے کامیاب انعقاد کو سراہتے ہوئے تحصیل انتظامیہ دنیور کی کاوشوں اور مختلف اداروں و کمیونٹی کے درمیان مؤثر رابطہ کاری کو قابلِ تحسین قرار دیا۔

تقریب میں صدر انجمن امامیہ دنیور، اسماعلی ریجنل کونسل کے نمائندگان و سیکریٹری سمیت دیگر معززین اور کمیونٹی نمائندگان نے بھی شرکت کی۔ مقررین نے تحصیل انتظامیہ دنیور اور ویسٹ مینجمنٹ کی خدمات اور تعاون کو سراہتے ہوئے ان کا شکریہ ادا کیا۔

شرکاء نے اس عزم کا اظہار کیا کہ صفائی کو صرف ایک روزہ سرگرمی تک محدود رکھنے کے بجائے اسے مسلسل اجتماعی ذمہ داری کے طور پر جاری رکھا جائے گا اور مستقبل میں بھی تحصیل انتظامیہ، مذہبی و سماجی تنظیموں، مقامی کمیونٹی، دکانداران اور متعلقہ اداروں کے تعاون سے صفائی و آگاہی مہمات کا سلسلہ جاری رکھا جائے گا۔

ترجمان تحصیل انتظامیہ دنیور

22/09/2026

دنیور:
اسسٹنٹ کمشنر دنیور کیپٹن (ر) حسن سلیم بٹ کے احکامات کی روشنی میں فٹ پاتھوں پر تجاوزات، عوامی گزرگاہوں میں رکاوٹ اور صفائی ستھرائی کے ناقص انتظامات کے خلاف میونسپل مجسٹریٹ دنیور کی جانب سے کارروائی عمل میں لائی گئی۔
کارروائی کے دوران متعلقہ دکانداروں اور ہوٹل مالکان کو دفعہ 133 ضابطہ فوجداری (Cr.P.C.) کے تحت نوٹسز جاری کیے گئے اور موقع پر تجاوزات ختم کرنے، فٹ پاتھ اور عوامی راستے کلیئر رکھنے اور صفائی ستھرائی یقینی بنانے کی ہدایات دی گئیں۔
انتظامیہ کی جانب سے واضح کیا گیا کہ جاری کردہ احکامات کی خلاف ورزی کی صورت میں دفعہ 188 تعزیراتِ پاکستان (PPC) کے تحت قانونی کارروائی عمل میں لائی جائے گی۔

20/09/2026

مورخہ 20-09-2026 کو انجمن تاجران دنیور کے انتخابات میونسپل مجسٹریٹ دنیور کی زیرِ نگرانی منعقد ہوئے، جس میں دنیور بازار کے تاجروں اور دکانداروں نے بھرپور شرکت کی۔
انتخابی عمل کے دوران مختلف امیدواران نے صدر کے عہدے کے لیے حصہ لیا، تاہم تمام امیدواران نے باہمی اتفاقِ رائے سے حاجی گلاب شاہ کے حق میں دستبرداری اختیار کر لی۔ نتیجتاً حاجی گلاب شاہ کو انجمن تاجران دنیور کا صدر بلامقابلہ منتخب قرار دیا گیا۔
اس موقع پر تاجروں اور دکانداروں کی جانب سے نومنتخب صدر حاجی گلاب شاہ کو مبارکباد پیش کی گئی۔ نومنتخب صدر نے تاجروں کے مسائل کے حل، ان کے حقوق کے تحفظ، انتظامیہ کے ساتھ مثبت رابطے اور انجمن تاجران کو مزید مضبوط و فعال بنانے کے عزم کا اظہار کیا۔

انتخابی عمل پرامن، شفاف اور باہمی اتفاقِ رائے سے مکمل ہوا، جبکہ تحصیل انتظامیہ دنیور کی جانب سے مکمل تعاون اور انتظامی معاونت فراہم کی گئی۔

17/09/2026

پریس ریلیز

دارُالہنر دنیور کی خصوصی طالبات کی تحصیل انتظامیہ سے ملاقات

دنیور، 17 ستمبر 2026:
دارُالہنر دنیور کی خصوصی طالبات نے تحصیلدار و ایگزیکٹو مجسٹریٹ دنیور، ڈاکٹر زہرا ابراہیم سے خصوصی ملاقات کی۔

ملاقات کا مقصد 19 ستمبر 2026 کو دنیور میں منعقد ہونے والی صفائی مہم میں بھرپور شرکت اور اپنا مؤثر کردار ادا کرنے کے عزم کا اظہار تھا۔

خصوصی طالبات نے صفائی مہم میں بھرپور حصہ لینے اور صاف ستھرے دنیور کے لیے اپنی خدمات پیش کرنے کے عزم کا اظہار کیا۔ انہوں نے اس حوالے سے تحصیل انتظامیہ کے ساتھ مکمل تعاون کی یقین دہانی بھی کرائی۔

تحصیلدار و ایگزیکٹو مجسٹریٹ دنیور، ڈاکٹر زہرا ابراہیم نے خصوصی طالبات کے جذبۂ تعاون کو سراہتے ہوئے ان کا شکریہ ادا کیا اور کہا کہ معاشرے میں صفائی اور مثبت تبدیلی کے لیے ہر فرد کی شمولیت اہم ہے۔

16/09/2026

صاف ستھرا دنیور ♥️

16/09/2026

پریس ریلیز

*دنیور میں صفائی مہم کے حوالے سے اہم اجلاس، متعلقہ اداروں اور شیڈول بینکس کا تعاون*

دنیور، 15 ستمبر 2026:
تحصیل انتظامیہ دنیور کے زیرِ اہتمام 19 ستمبر 2026 کو منعقد ہونے والی صفائی مہم کے انتظامات، باہمی رابطہ کاری اور عوامی شرکت کے حوالے سے ایک اہم اجلاس منعقد ہوا۔

اجلاس میں ڈی ایم او ویسٹ مینجمنٹ، ایس ڈی او بی اینڈ آر، ایس ڈی او پی ایچ ای، ایس ڈی او واٹر اینڈ پاور، این ایچ اے پولیس، اے ڈی فوڈ اور سرکل نائب تحصیلدار نے شرکت کی۔

اجلاس میں صفائی مہم کے انتظامات، متعلقہ اداروں کی ذمہ داریوں، عوامی آگاہی اور مہم میں عوام کی شرکت کے حوالے سے تفصیلی غور و خوض کیا گیا۔ شرکاء نے اپنی تجاویز پیش کرتے ہوئے صفائی مہم کے کامیاب انعقاد کے لیے تحصیل انتظامیہ کے ساتھ مکمل تعاون کی یقین دہانی کرائی۔

اس سلسلے میں دنیور کے اندر موجود تمام شیڈول بینکس کے نمائندگان/منیجرز کے ساتھ بھی ایک خصوصی اجلاس منعقد کیا گیا، جس کی صدارت تحصیلدار دنیور ڈاکٹر زہرا ابراہیم نے کی۔ اجلاس میں 19 ستمبر کو منعقد ہونے والی صفائی مہم کے حوالے سے بینک انتظامیہ کو آگاہ کیا گیا اور باہمی تعاون پر تبادلہ خیال کیا گیا۔

شیڈول بینکس کے نمائندگان نے تحصیل انتظامیہ کے اس اقدام کو سراہتے ہوئے 19 ستمبر 2026 کو منعقد ہونے والی صفائی مہم میں مکمل تعاون اور بھرپور شرکت کی یقین دہانی کرائی۔

اجلاس میں اس امر پر اتفاق کیا گیا کہ تمام متعلقہ سرکاری ادارے اور دنیور میں موجود بینکس صفائی مہم کو کامیاب بنانے کے لیے اپنی ذمہ داریوں کے مطابق معاونت فراہم کریں گے اور باہمی رابطہ و تعاون کو یقینی بنایا جائے گا۔

تحصیل انتظامیہ دنیور نے عوام سے بھی اپیل کی کہ وہ 19 ستمبر 2026 کی صفائی مہم میں بھرپور شرکت کریں اور اپنے علاقوں کو صاف ستھرا رکھنے کے لیے انتظامیہ کے ساتھ تعاون کریں۔

*تحصیل انتظامیہ دنیور*