YaadeiNیادیں

اُن کے اندازِ کرم ، اُن پہ وہ آنا دل کا
ہائے وہ وقت،وہ باتیں،وہ زمانہ دل کا

نہ سُنا اُس نے توجہ سے فسانہ دل کا
زِندگی گُزری ، مگر درد نہ جانا دل کا

کُچھ نئی بات نہیں حُسن پہ آنا دل کا
مشغلہ ہے یہ نہایت ہی پُرانا دل کا

وہ مُحبت کی شروعات ، وہ بے تھاہ خوشی
دیکھ کر اُن کو وہ پُھولے نہ سمانا دل کا

دل لگی، دل کی لگی بن کے مِٹا دیتی ہے
روگ دُشمن کو بھی یارب! نہ لگانا دل کا

ایک تو میرے مُقدر کو بِگاڑا اُس نے
اور پِھر اُس پہ غضب ہنس کے بنانا دل کا

مرے پہلو میں نہیں،آپ کی مُٹھی میں نہیں
بے ٹِھکانے ہے بہت دن سے ، ٹِھکانا دل کا

وہ بھی اپنے نہ ہوئے،دل بھی گیا ہاتھوں سے
ایسے آنے سے تو بہتر تھا ، نہ آنا دل کا

خوب ہیں آپ بہت خوب ، مگر یاد رہے
زیب دیتا نہیں ایسوں کو ستانا دل کا

بے جِھجک آ کے مِلو، ہنس کے مِلاؤ آنکھیں
آؤ ہم تُم کو سِکھاتے ہیں مِلانا دل کا

نقش بر آب نہیں ، وہم نہیں ، خواب نہیں
آپ کیوں کھیل سمجھتے ہیں مِٹانا دل کا

حسرتیں خاک ہوئیں، مِٹ گئے ارماں سارے
لُٹ گیا کُوچہِ جاناں میں خزانہ دل کا

لے چلا ہے مرے پہلو سے بصِد شوق کوئی
اب تو مُمکِن ہی نہیں لوٹ کے آنا دل کا

اُن کی محفِل میں نصیرؔ اُن کے تبسُم کی قسم
دیکھتے رہ گئے ہم ، ہاتھ سے جانا دل کا...!

✍️...نصیرُالدین نصیرؔ (پیمانِ شب📚)

جِس کو اکثر سوچا تھا تنہائی میں
شامِل ہے وہ شخص مری رُسوائی میں

مُجھ سے مت پُوچھو وہ چہرہ کیسا تھا
ڈُوب گیا میں ، آنکھوں کی گہرائی میں

جاگتے رہنے کی کتنی ترغیبیں تھیں
اُس کی بوجھل تھکی ہوئی انگڑائی میں

تُجھ سے آنکھ مِلانا کِتنا مشکل ہے
ورنہ سورج گھل جائیں بینائی میں

پیار بھی کرتا ہے وہ بے پروائی سے
نادانی کا رنگ بھی ہے دانائی میں

کاش کوئی مہمل کے اندر سُن سکتا
میری چیخ بھی شامل تھی شہنائی میں

وہ ایک پل کو رُوٹھا تو محسوس ہوا
جیسے بیت گیا ایک سال جُدائی میں

جاؤ اپنے جیسے لوگ تلاش کرو
کیا پاؤ گے محسن سے ہر جائی میں...!

✍️...محسنؔ نقوی ( عذابِ دید📚 )

تُمہارا ہِجر،وابستگی قُربت کے لمحے اور دسمبر
تُمہارا لمس،وابستگی دل و جان کے لمحےاور دسمبر

تُمہاری دُوری ہِجر کے ماروں کے لیے وحشت
تُمہاری یاد وابستگی رونقِ محفِل کے لمحے اور دسمبر

تُمہارا اِنتظار باقی رھے گا تا دمِ مرگ!!
تُمہارے لوٹ آنے کی جُستجُو کے لمحے اور دسمبر

اِک اور برس تیرے نام رھا شب و روزِ زِندگانی کا
جابجا مرے لفظوں میں تری یاد کے لمحے اور دسمبر

سرد موسم کی سرد شامیں اور دشتِ تنہائی کا سفر
ہر موڑ پہ ترے ساتھ گُزری باتوں کے لمحے اور دسمبر

دورِ حیات، اور تیرا ذِکر ، یاد رھے گا ساتھ رھے گا
جب تلک ھیں وقاصؔ،سانسوں کی آھٹ کے لمحے اور دسمبر...!

✍️...ایم وقاصؔ ( میں تنہا تھا📚 )

ہم اپنی طرف اُن کی نظر دیکھ رہے ہیں
حیرت ہے کہ وہ آج اِدھر دیکھ رہے ہیں

محفِل میں نہیں اور کوئی شُغل ہمارا
ہم آپ کے اندازِ نظر دیکھ رہے ہیں

نیرنگیِ عالم کا یہ عالم ، ارے توبہ
کیا کہیے،جو ہم شام و سحر دیکھ رہے ہیں

ہم کو نظر آتا نہیں کُچھ اور کہیں بھی
جلوے تیرے تاحدِ نظر دیکھ رہے ہیں

بیٹھا ہُوا چُپ چاپ یہ میں دیکھ رہا ہُوں
دزدیدہ نظر سے وہ اِدھر دیکھ رہے ہیں

وہ لوگ نصیرؔ! اپنے گریباں میں بھی جھانکیں
جو لوگ میرے عیب و ہُنر دیکھ رہے ہیں...!

✍️...نصیرُالدین نصیرؔ (دستِ نظر📚)

دریچے سے دیا جا کر ہٹا دو
مت اپنے ساتھ اس کو بھی سزا دو

وہ لوٹ آئے اگر تو چونک اُٹھے
نشاں تک گھر کا اس جا سے مٹا دو

بہت یکسانیت لگتی ہے اس میں
کہانی میں نیا اب موڑ لا دو

بظاہر درمیاں کُچھ بھی نہیں تھا
مُقدر ہو گیا حائل بتا دو

چُھپا کر اب اُنہیں رکھنے سے حاصل
سب اس کے خط وہ تصویریں جلا دو

مُحبت اِبتدا سے امتحاں لے
تُم اب اس امتحاں کو انتہا دو

کوئی موہوم سے امید لے کر
ذرا منزل کو رستے سے ملا دو

چمن کی زِندگی اب ہے اسی میں
گُلابوں کی جگہ پتھر اُگا دو

مُحبت کو تجارت نام دے کر
خُدا کے قہر کو تو مت صدا دو

اذیت دل کو دیتا ہے مسلسل
میری آنکھوں سے وہ چہرہ ہٹا دو...!

✍️...فاخرہ بتولؔ ( بُھلا دیا نا📚؟ )

تیرا خیال رہے ، تیری آرزو بھی رہے
یہ دل ترا ہے کبھی اس میں آ کے تُو بھی رہے

وُفورِ شوق میں چاہت کی آبرو بھی رہے
تلاشِ یار بھی ہو،اپنی جستجو بھی رہے

یہ دو گھڑی کی رفاقت نہیں ، مُحبت ہے
حیا تو حُسن کا زیور ہے،گفتگو بھی رہے

جمالِ حق مری آنکھوں کا نور بن کے رہا
اگرچہ مری آنکھوں میں خوبرو بھی رہے

ترے بغیر کبھی مَے کا نام تک نہ لیا
ہزار جام چلے،سامنے سبُو بھی رہے

خُدا کرے کہ تُجھے بھی غم محبت ہو
تمام عُمر گِرفتارِ عِشق ، تُو بھی رہے

مُجھے یہ دُھن ہے کہ محفل میں کوئی غیر نہ ہو
اُسے یہ ضِد ہے کہ میں بھی رہوں،عدو بھی رہے

سُنا ہے اُن کی مُلاقات کو گئے تھے نصیرؔ
ملے وہ آپ سے،آپ ان کے روبرو بھی رہے...!

✍️...نصیرُالدین نصیرؔ (پیمانِ شب📚)

تُو نہیں تیرا استعارا ، نہیں
آسماں پر کوئی ستارا نہیں

وہ میرے سامنے سے گُزرا تھا
پِھر بھی میں چُپ رہا پُکارا نہیں

وہ نہیں مِلتا ایک بار ہمیں
اور یہ زِندگی دوبارا نہیں

ہر سمندر کا ایک ساحل ہے
ہِجر کی رات کا کِنارا نہیں

ہو سکے تو نِگاہ کر لینا
تُم پہ کُچھ زور تو ہمارا نہیں

ناو اُلٹی تو یہ ہوا معلوم
زِندگی موج ہے کنارا نہیں...!

✍️...امجد اِسلام امجدؔ (ذرا پِھر سے کہنا📚)

یُوں وہ محفِل میں بصِد شان بنے بیٹھے ہیں
میرا دل ، اور میری جان بنے بیٹھے ہیں

اُن کی صُورت نِکھر آئی پسِ زینت کیا کیا
دیدۂِ خلق کا ارمان بنے بیٹھے ہیں

جن کو آداب تک آتے نہیں دربانی کے
آج اُس در پہ وہ دربان بنے بیٹھے ہیں

مُجھ کو دیکھا تو غضب ناک ہوئے، ٹوٹ پڑے
کیا خبر تھی کہ وہ طوفان بنے بیٹھے ہیں

جو ہیں سُلطان، وہ پھرتے ہیں گداؤں کی طرح
جو گدا گر ہیں، وہ سُلطان بنے بیٹھے ہیں

محفلِ ناز میں بُلوا بھی لیا ہے مُجھ کو
اور پِھر مُجھ سے وہ انجان بنے بیٹھے ہیں

اہلِ دل پر نہ وہ غصہ ہے، نہ وہ قہر و ستم
خیر سے آج وہ انسان بنے بیٹھے ہیں

دیکھتے ہی نہیں قصدًا وہ ہماری جانب
جان کر ہم سے وہ انجان بنے بیٹھے ہیں

اے نصیرؔ اُن کی اداؤں کے کرشمے دیکھو
ہر تماشے کا وہ عنوان بنے بیٹھے ہیں...!

✍️...نصیرُالدّین نصیرؔ (دستِ نظر📚)

‏اپنوں کے سِتم، اُن کی جفا یاد کریں گے
ہم جُرمِ مُحبت کی سزا یاد کریں گے

تُو آگئی، آنا تھا جنہیں وہ نہیں آئے
ہم بھی تُجھے کیا کیا نہ صبا یاد کریں گے

میں نے دمِ رُخصت جو کہا بُھول نہ جانا
یہ سُن کے رُکے، اور کہا یاد کریں گے

اب حرفِ تسلی کا تکلف نہ کریں وہ
جو دل سے بُھلا بیٹھے، وہ کیا یاد کریں گے

ہم بُھول کے اب نام بھی لیں گے نہ وفا کا
وہ چوٹ لگی ہـے کہ سدا یاد کریں گے

ہم چشمِ تصور میں سجا لیں گے وہ آنکھیں
یُوں پینے پِلانے کا مزا یاد کریں گے

یاروں پہ نصیرؔ آپ دل و جاں سے فِدا تھے
وہ پِھر گئے سب، آپ بھی کیا یاد کریں گے...!

✍️...نصیرالدین نصیرؔ (پیمانِ شب📚)

مہرباں تھا جو روز و شب ، کوئی
اُس کو لے آئے کاش ! اب کوئی

چشمِ ساقی میں اِلتفات نہیں
اب کہاں جائے تِشنہ لب کوئی

ہوتی آئی ہے یہ زمانے میں
کام آیا کسی کے کب کوئی

تذکرہ اہلِ دل کا چل نِکلا
چھیڑتا مری بات اب کوئی

یوں ہیں خاموش عرضِ حال پہ وہ
سی کے بیٹھا ہو جیسے لب کوئی

اُن سے مِل! بات کر! نِگاہ مِلا
دل لُٹانے کا ہو سبب ، کوئی

ہم سے وہ چل چُکے بہت چالیں
چال ہم بھی چلیں گے اب کوئی

آپ کو جب کسی کی چاہ نہیں
کیوں کرے آپ کی طلب کوئی

میکدہ ہے ، شراب پی ، زاہد
سیکھ لے زندگی کا ڈھب کوئی

ان پہ کہنے کو لوگ مرتے ہیں
جان دیتا ہے اپنی کب کوئی

بے وفا بھی رہے ، خفا بھی رہے
آپ بھی ہیں بڑے عجب کوئی

آپ آتے ، کوئی پیام آتا
یوں بسر ہوتی اپنی شب کوئی

جاں بلب ہے نصیرؔ سوختہ جاں
کاش لے آئے ان کو اب کوئی...!

✍️...نصیرُالدین نصیرؔ (دستِ نظر📚)

عِشق نے جکڑا ہے مُجھ کو اُس کڑی زنجیر سے
جس کے حلقے کُھل نہیں سکتے کِسی تدبیر سے

اور ہی کُچھ ہو شبِ فُرقت کے کٹنے کی سبیل
دِل تصور سے بہلتا ہے ، نہ اب تصویر سے

خط اِسے مت کہہ، یہ لِکھا ہے مِری تقدیر کا
دِل کو ہے اِک ربط تِری شوخیِ تحریر سے

زِندگی بھر اِک سُہانہ خواب ہم دیکھا کیے
تیری صُورت مِل گئی اُس خواب کی تعبیر سے

اُس نِگاہِ ناز پر صدقے دِل و جاں ہو گئے
آپ نے دیکھا؟ نشانے دو اُڑے، اِک تیر سے

اب تو بس دو ہِچکیوں کی بات باقی رہ گئی
آپ نے پوچھا مُجھے، لیکن بڑی تاخیر سے

غم کی تنہائی کے سناٹے میں تنہا تھا نصیرؔ
وہ تو کھو جاتا، مگر تُم مِل گئے تقدیر سے...!

✍️...نصیرُالدین نصیرؔ (پیمانِ شب📚)

بہ صد خُلوص، بہ صد اِفتخار گُزری ہے
وہ زِندگی ، جو سرِ کُوئے یار گُزری ہے

گُلوں کا رنگ لیے شکلِ یار گُزری ہے
مِری نظر سے مکمل بہار ، گُزری ہے

غم و الَم کے، اذیت کے، کُرب زاروں میں
تڑپ تڑپ کے شبِ اِنتظار گُزری ہے

نَفَس نَفَس میں چُبھن تھی، قدم قدم پہ خلِش
تمام عُمر سرِ نوکِ خار گُزری ہے

قفس میں حال نہ پوچھا صبا نے آ کے کبھی
مِرے قریب سے بیگانہ وار گُزری ہے

سُکونِ دل نہ میسر ہُوا زمانے میں
ہماری زیست بڑی بے قرار گُزری ہے

وہ ایک بار جِدھر سے گُزر گئے ہیں نصیرؔ
ہزار بار اُدھر سے بہار گُزری ہے...!

✍️...نصیرُالدین نصیرؔ (دستِ نظر📚)