07/09/2026
ڈائریکٹر جنرل جی ڈی اے معین الرحمٰن خان سے یو این ڈی پی کنسلٹنٹ ثنا درانی کی ملاقات
گوادر، 7 ستمبر۔
اقوام متحدہ کے ترقیاتی پروگرام (UNDP) کی گوادر میں جاری سرگرمیوں سے وابستہ کنسلٹنٹ ثنا درانی نے ڈائریکٹر جنرل گوادر ڈویلپمنٹ اتھارٹی معین الرحمٰن خان سے ان کے دفتر میں ملاقات کی۔ اس موقع پر ڈائریکٹر ٹاؤن پلاننگ جی ڈی اے شاہد علی بھی موجود تھے۔
ملاقات کے دوران یو این ڈی پی کے تحت گوادر میں جاری مختلف سرگرمیوں اور منصوبوں پر ڈائریکٹر جنرل جی ڈی اے کو بریفنگ دی گئی۔ بتایا گیا کہ یو این ڈی پی کے ایک منصوبے کے تحت گوادر میں موسمیاتی تبدیلی کے شعبے میں سرگرم مقامی گروپس، نیٹ ورکس اور متعلقہ اسٹیک ہولڈرز کے لیے دو روزہ تربیتی پروگرام کا انعقاد کیا گیا۔
یو این ڈی پی کنسلٹنٹ نے بتایا کہ تربیتی پروگرام کا بنیادی مقصد گوادر میں موسمیاتی تبدیلی کے حوالے سے سرگرم مقامی گروپس اور نیٹ ورکس کی استعدادِ کار میں اضافہ کرنا ہے، تاکہ وہ مستقبل میں مؤثر، پائیدار اور مقامی ضروریات سے ہم آہنگ موسمیاتی منصوبے تشکیل دے سکیں۔
اس موقع پر ڈائریکٹر جنرل جی ڈی اے معین الرحمٰن خان نے موسمیاتی تبدیلی کے اثرات سے نمٹنے کے لیے مقامی سطح پر مؤثر اقدامات کی اہمیت پر زور دیا۔ انہوں نے کہا کہ موسمیاتی چیلنجز سے نمٹنے کے لیے متعلقہ اداروں، تنظیموں اور مقامی اسٹیک ہولڈرز کے درمیان مربوط تعاون ناگزیر ہے۔
انہوں نے کہا کہ جی ڈی اے موسمیاتی تبدیلی کے چیلنجز سے مکمل طور پر آگاہ ہے اور گوادر میں ماحول دوست اور پائیدار ترقی کے لیے مختلف سطحوں پر عملی اقدامات جاری ہیں۔ انہوں نے اس عزم کا اظہار کیا کہ جی ڈی اے مستقبل میں بھی ماحول دوست ترقی، (Climate Resilience)، عوامی آگاہی اور پائیدار منصوبہ بندی کو اپنی ترجیحات میں شامل رکھے گی۔
