03/08/2026
کوئلہ کانوں کے مزدور کب تک ریاستی غفلت کی قیمت اپنی جانوں سے ادا کرتے رہیں گے؟
تحریکِ خلق پاکستان کےرہنماؤں حمود الرب جعفری اور صابر علی حیدر نے مشترکہ بیان میں گزشتہ ہفتے کوئٹہ کے نزدیک کوئلے کی کان میں میتھین گیس کے اخراج کے نتیجے میں ہونے والے دھماکے میں ٣٤ مزدوروں کی ہلاکت پر انتہائی رنج و غم کا اظہار کیا ہے۔ انہوں نے کہا کہ پاکستان کا ایک بڑا المیہ یہ ہے کہ قیامِ پاکستان سے آج تک کوئلہ کانوں میں کام کرنے والے محنت کشوں کی آواز کو وہ اہمیت نہیں دی گئی جس کے وہ حق دار ہیں۔ نہ ہی بڑی سیاسی جماعتوں نے ان کے بنیادی حقوق کے لیے مستقل اور مؤثر جدوجہد کی اور نہ ہی مذہبی جماعتیں ان مزدوروں کے تحفظ اور مسائل کو اپنی ترجیحات میں شامل کر سکیں۔ کوئلہ کانوں میں حفاظتی انتظامات کا فقدان، جدید حفاظتی اشیاء اور آلات کی عدم فراہمی، ناقص نگرانی اور متعلقہ اداروں کی غفلت کے باعث ہزاروں محنت کش اپنی قیمتی جانیں گنوا چکے ہیں۔ افسوسناک امر یہ ہے کہ مسلسل حادثات اور قیمتی انسانی جانوں کے ضیاع کے باوجود آج تک اس مسئلے کا مستقل اور مؤثر حل تلاش نہیں کیا جا سکا۔
کوئٹہ میں پیش آنے والا حالیہ المناک سانحہ ایک بار پھر ہمیں یہ سوچنے پر مجبور کرتا ہے کہ آخر ایک مزدور کی جان کی قیمت ہے بھی یا نہیں؟ کان میں اترنے والا مزدور بھی اسی ملک کا شہری ہے، اس کے بھی خواب ہیں، اس کا بھی خاندان ہے اور اس کی زندگی بھی اتنی ہی قیمتی ہے جتنی کسی بااثر یا صاحبِ اقتدار شخص کی۔
تحریکِ خلق پاکستان مطالبہ کرتی ہے کہ:
۱) کوئلہ کانوں میں کام کرنے والے تمام مزدوروں کو جدید اور معیاری حفاظتی اشیاء و حفاظتی آلات فوری طور پر فراہم کی جائیں؛
۲) کان کنی کے شعبے میں بین الاقوامی حفاظتی معیار کے مطابق قوانین نافذ کیے جائیں اور ان پر سختی سے عمل درآمد یقینی بنایا جائے؛
۳) خطرناک اور غیر محفوظ کانوں کو حفاظتی معیار پورا کیے بغیر کام کرنے کی اجازت نہ دی جائے؛
۴) مزدوروں کی جان و مال کا تحفظ ریاست اپنی آئینی اور اخلاقی ذمہ داری سمجھتے ہوئے یقینی بنائے ؛
۵) کان کنی کے حادثات کی شفاف اور غیر جانب دارانہ تحقیقات کرائی جائیں اور غفلت یا کوتاہی کے ذمہ دار عناصر کے خلاف قانون کے مطابق سخت کارروائی کی جائے؛
۶) حادثات میں جاں بحق ہونے والے مزدوروں کے لواحقین کو فوری اور باعزت روزگار، مالی معاوضہ، پنشن اور دیگر ضروری مراعات فراہم کی جائیں؛ اور
۷) زخمی مزدوروں کے مفت علاج اور ان کے خاندانوں کی معاشی معاونت کا مستقل نظام بنایا جائے۔
ہم واضح کرنا چاہتے ہیں کہ مزدور صرف معیشت کا پہیہ چلانے والی قوت نہیں بلکہ اس ملک کے برابر کے شہری ہیں۔ ان کی زندگیوں کو سستی محنت اور معمولی معاوضے کے بدلے خطرے میں ڈالنا کسی صورت قابلِ قبول نہیں۔
ریاست کی ذمہ داری صرف حادثے کے بعد لاشیں نکالنا اور تعزیتی بیانات جاری کرنا نہیں، بلکہ حادثات کو روکنا اور مزدوروں کی زندگیوں کا تحفظ یقینی بنانا ہے۔ اگر آج بھی مؤثر اور عملی اقدامات نہ کیے گئے تو ایسے سانحات مستقبل میں بھی ہمارے محنت کش خاندانوں کے چراغ بجھاتے رہیں گے۔
تحریکِ خلق پاکستان مطالبہ کرتی ہے کہ مزدور کی جان کو محض اعداد و شمار کا حصّٰہ نہیں بلکہ ایک انسانی زندگی سمجھا جائے۔
جاری کردہ:
شعبۂ نشر و اشاعت
تحریکِ خلق پاکستان
