14/10/2026
الحمدللہ — احسن کارکردگی برائے 15 ملاپ یونٹ
تاریخ: 14 اکتوبر 2026
پریس ریلیز
مضمون: کراچی پولیس 15 ملاپ یونٹ کی بروقت کارروائی، ذہنی توازن درست نہ ہونے والے لاوارث ملنے والے شخص کو ورثاء سے ملا دیا گیا۔
کراچی: کراچی پولیس 15 کے ملاپ یونٹ کو اطلاع موصول ہوئی کہ ضلع کورنگی، تھانہ شاہ فیصل کی حدود سے ایک شخص لاوارث حالت میں ملا ہے، جس کا ذہنی توازن درست نہیں ہے۔ اطلاع موصول ہوتے ہی ملاپ یونٹ نے فوری کارروائی کرتے ہوئے مددگار 15 کو موقع پر روانہ کیا، جہاں لاوارث ملنے والے شخص کی تصویر حاصل کی گئی۔ بعد ازاں مذکورہ شخص کا اشتہار تیار کرکے سوشل میڈیا پر شیئر کر دیا گیا اور مددگار 15 کو ہدایت کی گئی کہ لاوارث شخص کو فوری طور پر متعلقہ تھانے منتقل کیا جائے۔
کچھ ہی دیر بعد کراچی پولیس 15 کے ملاپ یونٹ کو اپنے آفیشل واٹس ایپ نمبر پر ایک شکایت موصول ہوئی، جس میں شکایت کنندہ نے اپنے بھائی فرحان ولد شفیع، عمر تقریباً 30 سال، کے لاپتا ہونے کی اطلاع دی۔ شکایت کنندہ کے مطابق ان کے بھائی کا ذہنی توازن بھی درست نہیں ہے۔
ملاپ یونٹ نے لاپتا شخص کی تصویر کا جائزہ لیا تو وہ ضلع کورنگی، تھانہ شاہ فیصل کی حدود سے لاوارث ملنے والے شخص کی تصویر سے مشابہت رکھتی تھی۔ اس پر ملاپ یونٹ نے فوری طور پر لاپتا شخص کے اہلِ خانہ کو لاوارث ملنے والے شخص کی تصویر ارسال کی، جسے دیکھ کر اہلِ خانہ نے شناخت کی تصدیق کرتے ہوئے بتایا کہ یہ ان کے بھائی فرحان ہیں۔
الحمدللہ، کراچی پولیس 15 کے ملاپ یونٹ کی بروقت کارروائی، مؤثر رابطہ کاری اور سوشل میڈیا کے ذریعے فوری تشہیر کے نتیجے میں لاوارث ملنے والے شخص کی شناخت ممکن ہوئی اور ان کے اہلِ خانہ سے رابطہ قائم کر لیا گیا۔
یہ کارروائی کراچی پولیس 15 کے ملاپ یونٹ کی عوامی خدمت، انسانی ہمدردی اور بچھڑے ہوئے افراد کو ان کے اہلِ خانہ سے ملانے کے عزم کی عکاس ہے۔
