20/10/2026
کراچی میں مقیم اورکزئی برادری کا تاریخی تعارفی و مشاورتی پروگرام ایک نئی اجتماعی جدوجہد کا آغاز ۔۔۔۔
الحمدللہ 11 اکتوبر 2026ء کو محمدی کالونی، کراچی میں ضلع اورکزئی سے تعلق رکھنے والے افراد کا ایک عظیم الشان تعارفی و مشاورتی پروگرام منعقد ہوا، جس میں پانچ سو سے زائد افراد نے شرکت کی۔ اس پروگرام میں معزز علماء کرام، قومی مشران، سماجی شخصیات، وکلا، ڈاکٹرز اور نوجوانوں سمیت اورکزئی برادری کے مختلف شعبہ ہائے زندگی سے تعلق رکھنے والے افراد شریک ہوئے۔تقریباً تین گھنٹے جاری رہنے والے اس پروگرام میں اورکزئی کی اٹھارہ اقوام سے تعلق رکھنے والے معزز مشران اور علماء کرام نے اورکزئی ویلفیئر ٹرسٹ سندھ کے اغراض و مقاصد، مستقبل کے لائحۂ عمل اور قوم کی فلاح و بہبود کے لیے مشترکہ جدوجہد پر تفصیلی گفتگو کی۔یہ نشست ہمارے لیے خوشی، اتحاد اور اعزاز کا باعث ہے کہ کراچی میں پہلی مرتبہ اتنی بڑی تعداد میں اورکزئی برادری کے افراد ایک مشترکہ مقصد کے تحت جمع ہوئے۔ اس اجتماع کا بنیادی مقصد باہمی رابطوں کو مضبوط بنانا، محبت و اخوت کو فروغ دینا اور اپنی قوم کی اجتماعی ترقی و خدمت کے لیے ایک منظم پلیٹ فارم مہیا کرنا ہے۔
ان شاء اللہ امید ہے کہ یہ تاریخی اجتماع مستقبل میں اتحاد، باہمی تعاون اور قومی خدمت کے ایک نئے باب کا آغاز ثابت ہوگا، اور اورکزئی ویلفیئر ٹرسٹ سندھ کے پلیٹ فارم سے ہم سب مل کر اپنی برادری کی فلاح و بہبود کے لیے عملی اقدامات کریں گے۔
خصوصی طور پر جناب دلبر معاویہ صاحب کا تہہ دل سے شکریہ، جنہوں نے مہمانوں کے استقبال، میزبانی اور انتظامات میں بھرپور کردار ادا کیا۔ ان کے انتظامات اور مہمان نوازی قابل تحسین تھے۔اللہ تعالیٰ ہماری قوم کے درمیان محبت، اتفاق و اتحاد اور بھائی چارے کو ہمیشہ قائم و دائم رکھے، اس اجتماعی کوشش کو کامیابی عطا فرمائے اور ہمیں اپنی قوم اور انسانیت کی خدمت کرنے کی توفیق نصیب فرمائے۔ آمین!
اتحاد ہماری طاقت، خدمت ہمارا مقصد!
(MDM today update)
