23/09/2026
ٺل
23 سيپٽمبر 2026ع
سنڌ يونائيٽيڊ پارٽي (ايس يو پي) ضلعي جيڪب آباد جي اهم تنظيمي گڏجاڻي اڄ ايس يو پي هائوس ٺل ۾ مرڪزي اليڪشن ڪميٽي جي چيئرمين روشن علي ڪلهوڙي جي صدارت هيٺ ٿي گذري. گڏجاڻي ۾ ايس يو پي جي مرڪزي سيڪريٽري جنرل منير نائچ، مرڪزي اڳواڻن مجيب ماڇي ۽ جڳديش آهوجا، جڏهن ته لاڙڪاڻي ضلعي جي صدر صدرالدين ڀٽي پڻ خصوصي طور شرڪت ڪئي.
گڏجاڻي دوران ضلعي جيڪب آباد جي تنظيم جي چونڊ پڻ ڪرائي، ڪامريڊ جمال جوش ٻرڙو کي ضلعي صدر ۽ فدا حسين لکڻ کي ضلعي جنرل سيڪريٽري چونڊيو ويو.
ان موقعي تي مرڪزي اڳواڻن ڪارڪنن کي خطاب ڪندي 11 آڪٽوبر 2026ع تي لاڙڪاڻي ۾ منعقد ٿيندڙ ”وحدتِ سنڌ مارچ“ جي تيارين، تنظيم سازي ۽ ڪارڪنن جي متحرڪ ڪردار بابت تفصيلي خيالن جو اظهار ڪيو. اڳواڻن چيو ته مارچ جي ڪاميابي لاءِ ڪارڪنن کي ڀرپور تياري، منظم حڪمت عملي ۽ ذميواري سان پنهنجو ڪردار ادا ڪرڻو پوندو.
گڏجاڻي ۾ 27 سيپٽمبر تي درياهن جو عالمي ڏينهن پڻ ڀرپور نموني ملهائڻ جو فيصلو ڪيو ويو. ان سلسلي ۾ ضلعي جيڪب آباد ۾ مختلف هنڌن تي ريليون ڪڍي ڀرپور ۽ شاندار شرڪت کي يقيني بڻائڻ تي زور ڏنو ويو.
ايس يو پي جي مرڪزي اڳواڻن ضلعي جيڪب آباد ۾ پارٽي جي تنظيمي سرگرمين کي وڌيڪ منظم ۽ فعال بڻائڻ، نئين سر تنظيم سازي ڪرڻ ۽ ڪارڪنن کي متحرڪ ڪرڻ تي پڻ زور ڏنو.
گڏجاڻي ۾ ضلعي جيڪب آباد جي ڪارڪنن ۽ عهديدارن وڏي انگ ۾ شرڪت ڪئي ۽ پارٽي جي تنظيمي معاملن بابت پنهنجي راءِ ۽ تجويزون پيش ڪيون.
