13/10/2026
پریس ریلیز
قائمقام ڈپٹی کمشنر گنگچھے کی علمائے کرام سے الگ الگ ملاقاتیں، قیامِ امن کے لیے کردار ادا کرنے کی اپیل
گنگچھے: قائمقام ڈپٹی کمشنر ضلع گنگچھے ڈاکٹر وجاہت سلیم نے آج ضلعی ہیڈکوارٹر خپلو میں موجودہ ملکی صورتحال کے پیشِ نظر ضلع کے ممتاز علمائے کرام سے الگ الگ ملاقاتیں کیں۔ ملاقات کرنے والوں میں قائدِ صوفیہ نوربخشیہ مولانا رستم علی انجم، نائب امامِ جمعہ امامیہ اثنا عشریہ خپلو شیخ غلام حسین اور امام جمعہ و جماعت اہل ِحدیث خپلو مولانا محمد اسحاق شامل تھے۔
ملاقاتوں کے دوران موجودہ ملکی صورتحال، ضلع گنگچھے میں امن و امان کے استحکام، مذہبی ہم آہنگی، باہمی رواداری اور اتحاد و اتفاق کے فروغ کے حوالے سے تفصیلی تبادلۂ خیال کیا گیا۔ قائمقام ڈپٹی کمشنر نے علمائے کرام سے اپیل کی کہ وہ اپنے خطبات، مجالس اور دیگر مذہبی اجتماعات کے ذریعے عوام میں امن، برداشت، بھائی چارے اور قومی یکجہتی کا پیغام عام کریں اور موجودہ حالات میں ذمہ دارانہ کردار ادا کرتے ہوئے امن و امان کے قیام میں ضلعی انتظامیہ کے ساتھ بھرپور تعاون جاری رکھیں۔
اس موقع پر ڈاکٹر وجاہت سلیم نے ضلع گنگچھے میں مثالی امن کے قیام اور فرقہ وارانہ ہم آہنگی کے فروغ میں علمائے کرام کے مثبت اور تعمیری کردار کو سراہتے ہوئے کہا کہ باہمی احترام، برداشت اور اتحاد ہی پائیدار امن کی بنیاد ہیں۔ انہوں نے اس امید کا اظہار کیا کہ علمائے کرام آئندہ بھی امن و امان کے قیام، سماجی ہم آہنگی اور ضلع کی تعمیر و ترقی کے لیے اپنا مؤثر کردار ادا کرتے رہیں گے۔
علمائے کرام نے ضلع گنگچھے میں امن و امان برقرار رکھنے، مذہبی ہم آہنگی کو فروغ دینے اور تعمیر و ترقی کے عمل کو آگے بڑھانے کے لیے ضلعی انتظامیہ کے ساتھ بھرپور تعاون کی یقین دہانی کرائی۔
عبدالرحیم
پی آر او ٹو ڈپٹی کمشنر گنگچھے
