03/06/2026
دامنِ شاشان پبلک لائبریری کمیٹی گریشگءِ بنجاھی لس مجلس ءِ دیوان برجم دارگ بوت.
دامنِ شاشان پبلک لائبریری کمیٹی ءِ بنجاھی لس مجلس ءِ دیوان 31 مئی 2026 ءَ کمیٹی ءِ کماش عزیز شاد ءِ پاگ واجہی ءَ برجم دارگ بوت. گچین کاری ءِ رِد ءَ حسن خان بلوچ کمیٹی ءِ کماش(Chairman) ءُ نصیر کّیا بلوچ کارگُشاد (General secretary)گِچین کنگ بوت اَنت۔
دامنِ شاشان پبلک لائبریری کمیٹی ءِ چارمی بنجاھی لس مجلسء دیوان گوستگیں کماش عزیز شاد ءِ پاگواجھی ءَ برجم دارگ بوت دیوان ءِ تہ ءَ جتا جتائیں سرھلانی سر ءَ گپ ءٌ تران کنگ بوت۔ دیوان ءِ تہ ءَ کماش ءِ بنداتی تران ، گوستگیں کارانی اھوال ،راھبند سازی، شرگداری ، جست ءُ پسّو، شور ء ُ سلاہ، آوُوکیں گامگیج ءُ گچین کاری ءِ سرھال ءِ سر ءَ گپ ءُ تران کنگ بوت۔
دیوانءِ تہا کماشءَ وتی دٔریں ھیالانی درشان کنانءَ گُشت کہ نوجوان بے مانیں ءُ بے مقصدیں کار ءُ جیڑھاں وتءَ بہ رکیں اَنت ءُ وتی گران بہائیں وھدا پہ چاگردی دیمروی ءُ وانگ ءُ زانگءِ واستہ بہ دینت. مئے راجی پدمنتگی ءُ لاچاری مَستریں سبب نا وانندگی اِنت.
دومی سرھال ءِ تہ ءَ کارگشاد ءِ نیمگ ءَ گوستگیں دو سال ءِ کارانی اھوال دیوانءِ دیم ءَ آرگ بوت انت.
دیمتر ءَ کتابجاہ ءِ رَھبند ءِ تہ ءَ جُتا جُتائیں شِکانی سر ءَ گپ ءُ تران کنگ بوت۔
شرگداری بزانکہ نگدی تھر ءُ جست ءُ پسّو ءِ سرءَ باسکانی نیمگ ءَ کتابجاہ ءِ کارانی سر ءَ جُست ایر کنگ بوت اِنت ءُ کابینہ ءِ سنگتاں جُستانی پسّو دات اَنت۔ شور ءُ سلاہ ءِ تھر ءِ تہ ءَ باسکانی نیمگ ءَ آیوکیں دو سالانی واست ءَ جتائیں شَور ءُ سلاہ دیگ بوت اَنت ۔
آیوکیں گامگیج ءِ سرھال ءِ تہ ءَ گچینکاری ءِ پّترے ٹھینگ بوت آئیءِ واستءَ سراج نور ءُ عزیز شاد گچین کنگ بوت اَنت ۔
گچینکاری پتر ءَ گوستگین کمیٹی ھلاس کُت ءُ نوکیں کابینہ ءِ واست ءَ پارم جم کنگ ءِ پیسلہ دات۔
گچینکاری وسیلگ ءَ حَسن خان بلوچ کماش(Chairman)، اعجاز اسلم بلوچ کمک کماش (Voice chairman)، نصیر کّیابلوچ کارگشاد(General secretary)، وحید صالح بلوچ کمک کارگشاد(Deputy General Secretary)،انور بلوچ شنگکار(Information Secretary)ءُ ضمیرمقصود دفتری کارگشاد (Office Secretary)گچین کنگ بوت اَنت۔
گڈسر ءَ کارگشاد ءَ کُلیں باسکانی منت گپت ءُ دیوان ءِ ھلاسی ءِ جار جَت۔