08/10/2026
پریس ریلیز
پشاور: پاکستان پیپلز پارٹی خیبرپختونخوا کے صوبائی صدر سید محمد علی شاہ باچا نے پشاور پریس کلب میں پریس کانفرنس کرتے ہوئے صوبائی حکومت اور وزیراعلیٰ سہیل آفریدی کو شدید تنقید کا نشانہ بنایا اور کہا کہ خیبرپختونخوا کے عوام بدامنی، بے روزگاری اور بنیادی مسائل کا سامنا کر رہے ہیں، جبکہ وزیراعلیٰ صوبے کے مسائل حل کرنے کے بجائے لانگ مارچ کی سیاست میں مصروف ہیں۔
پریس کانفرنس میں صوبائی سیکرٹری اطلاعات امجد آفریدی، پاکستان پیپلز پارٹی کے پارلیمانی لیڈر احمد کریم کنڈی، اراکین صوبائی اسمبلی شازیہ طہماس، مہر سلطانہ اور فرزانہ شیرین، سابق رکن قومی اسمبلی ڈاکٹر حیدر علی خان، صدر پشاور ڈویژن حاجی مصباح الدین اور سٹی میٹروپولیٹن کے صدر حاجی عمر خطاب بھی موجود تھے۔
سید محمد علی شاہ باچا نے کہا کہ وزیراعلیٰ سہیل آفریدی کو صوبے کے عوام کے جان و مال کی فکر ہونی چاہیے، مگر انہیں حکومت چلانے سے زیادہ لانگ مارچ کی فکر ہے۔ خیبرپختونخوا میں امن و امان کی صورتحال تشویشناک ہے، لیکن وزیراعلیٰ سیاسی نمائش میں مصروف ہیں۔ صوبے کو نعروں، جلسوں اور مارچوں کی نہیں بلکہ سنجیدہ حکمرانی اور عملی اقدامات کی ضرورت ہے۔
انہوں نے کہا کہ سہیل آفریدی صوبے کے اندر ہی مارچ کر رہے ہیں اور بڑے بڑے دعوے کر رہے ہیں، لیکن صوابی سے ایک انچ آگے بڑھنے کی ہمت نہیں کر سکتے۔ اگر وزیراعلیٰ واقعی اپنے سیاسی دعووں میں سنجیدہ ہیں تو میدان میں آکر عملی طور پر ثابت کریں، صرف سڑکوں پر سیاسی تماشے سے صوبے کے مسائل حل نہیں ہوں گے۔
صوبائی صدر نے کہا کہ وزیراعلیٰ کو یاد رکھنا چاہیے کہ خیبرپختونخوا کسی سیاسی جماعت کا سیاسی اکھاڑا نہیں بلکہ کروڑوں عوام کا صوبہ ہے۔ عوام کو امن، روزگار، صحت، تعلیم اور بہتر حکمرانی چاہیے، نہ کہ ہر روز ایک نیا سیاسی محاذ۔
اس موقع پر صوبائی سیکرٹری اطلاعات امجد آفریدی نے صوبائی حکومت کی کارکردگی پر سخت سوالات اٹھاتے ہوئے مختلف سرکاری محکموں میں مبینہ کرپشن اور بدعنوانی کے معاملات کو اجاگر کیا۔ انہوں نے کہا کہ صوبے کے مختلف محکموں میں کرپشن کے الزامات اور شکایات سامنے آ رہی ہیں، مگر حکومت ان معاملات پر مؤثر کارروائی کے بجائے سیاسی سرگرمیوں میں مصروف ہے۔
امجد آفریدی نے کہا کہ اگر صوبائی حکومت واقعی عوامی خدمت کا دعویٰ کرتی ہے تو اسے ہر محکمے میں شفافیت، جوابدہی اور احتساب یقینی بنانا ہوگا۔ عوام کے وسائل کسی سیاسی مہم یا ذاتی مفادات کے لیے استعمال کرنے کی اجازت نہیں دی جا سکتی۔
پاکستان پیپلز پارٹی خیبرپختونخوا کے رہنماؤں نے واضح کیا کہ صوبے کے عوام کو سیاسی نعروں سے نہیں بلکہ عملی کارکردگی سے جواب چاہیے۔ حکومت اپنی آئینی اور انتظامی ذمہ داریاں پوری کرے، امن و امان بہتر بنائے اور عوامی مسائل حل کرے، ورنہ اس کی کارکردگی اور طرزِ حکمرانی پر سیاسی و عوامی سطح پر سوالات اٹھتے رہیں گے۔
