2 LINE URDU Poetry - Shairy

اور تم رات سونے سے پہلے سوچے جانے والے آخری شخص ہو۔

"تم وہ عورت ہو جس کے لیے شاعر شعر کہتے ہیں ، سیاست دان جُھوٹ بولتے ہیں ، تاجر بلیک مارکیٹ کرتے ہیں ، اور مولوی اور پنڈت ماتھا رَگڑ رَگڑ کر خُدا کو یاد کرتے ہیں۔

تمہارے لیے انسان نے کیڑوں سے ریشم مانگا ، بُھوری مٹی سے کانچ پیدا کیا۔ دھَرتی کی چھاتی میں گھس کر سونا نکالا ، اور سمندر میں ڈُوب کر موتی تلاش کیے۔ تمہارے لیے انسان نے گھر بنایا ، گھر کے گرد باغ لگایا ، باغ میں پُھول کِھلاٸے ، اور پُھولوں کو توڑ کر تمہارے بالوں میں ٹانک دیا۔

تم جو ہر انسان کی آرزو کی خُوشبُو ہو۔ ہر خُوشبو کا صِلہ ہو۔

تم آج کیوں رو رہی ہو؟"

_کرشن چندر

پسندیدہ شخص کی گود پھولوں کا وہ بستر ہے جہاں صدیاں گزاری جاسکتی ہیں.

عین ممکن تھا کبھی بات کو سلجھا لیتے
اس نے پر قطع تعلق پہ ہی اصرار کیا

کل دوپہر عجیب سی اک بے دلی رہی
بس تیلیاں جلا کے بجھاتا رہا ہوں میں

سید جون ایلیاء

جب تک رفوگری کی فراغت اسے ملے
ممکن ہے مجھ پہ جسم کی پوشاک ہی نہ ہو

ظہیر مشتاق

‏کیا یہ کافی نہیں کہ تمہیں سوچ کر مسکرانے کا حق مجھ سے آج بھی کوئی نہیں چھین سکا، تم بھی نہیں۔

اُسے کسی سے محبت تھی اور وہ میں نہیں تھا.

اگر تُو کہے تو
مَیں شاخِ شبِ قدر سے توڑ لاؤں۔۔۔
چمکتے دمکتے ستاروں کے گُچھّے
انہیں اک سُنہری سُبک طشتری میں رکھوں۔۔۔
اور تجھے پیش کردوں
کہ لے میرے عشقِ زبُوں پر یقیں کر۔۔۔
اگر تُو کہے تو
چہکتے بہشتی پرندوں پہ چُپکے سے اک جال پھینکوں۔۔۔
اُنہیں پھڑپھڑاتے ہوئے ہی گرفتار کرلوں
غُباروں کے مانند دھاگوں سے باندھوں۔۔۔
تجھے پیش کردوں
کہ لے میرے جذبِ درُوں پر یقیں کر۔۔۔
اگر تُو کہے تو
بُخارا، سمرقند، تہران، شیراز،
لاھور اور قرطبہ کی فضاؤں سے خوشبو چراؤں۔۔۔
اُسے اپنی آنکھوں میں بھر کے
تجھے پیش کردوں
کہ لے چاھتوں کے فسُوں پر یقیں کر۔۔۔
اگر تُو کہے تو
شفق رنگ بارش کے قطروں سے مالا بناؤں۔۔۔
خموشی کے ساتوں سُروں سے
کوئی گیت بالکل نرالا بناؤں۔۔۔
محبت کے اظہار کا اک انوکھا حوالہ بناؤں
تیرے نام کا پھول کوئی سدا رھنے والا بناؤں۔۔۔
اُسے اپنی ویراں ہتھیلی پہ رکھ کے
تجھے پیش کردوں
کہ لے اب تو میرے جنُوں پر یقیں کر۔۔۔

رحمان فارس

.

.