31/05/2026
:
📰 پریس ریلیز / مذمتی بیان
پنجاب لوک راج پارٹی (PLRP) دے وائس چیئرمین میاں امجد دا سندھ وچ پنجابیاں دے حالیہ قتلِ عام اُتے شدید غصے دا اظہار، حکومت تے آرمی چیف توں فوری کارروائی دا مطالبہ
لاہور / دادو (پریس ریلیز): پنجاب لوک راج پارٹی دے وائس چیئرمین میاں امجد ہوراں نے سندھ دے وکھو وکھ ضلعیاں وچ بے گناہ پنجابیاں دے بے رحمانہ قتلِ عام دی شدید لفظاں وچ مذمت کیتی اے تے ڈونگھے دکھ تے افسوس دا اظہار کیتا اے۔
اپنے اک ہنگامی بیان وچ میاں امجد ہوراں نے آکھیا کہ:
"تحصیل مہر (ضلع دادو)، ضلع سانگھر تے ضلع میرپور خاص وچ حالیہ دناں وچ جس طرح چُن چُن کے بے گناہ تے پرامن پنجابیاں نوں نشانہ بنایا گیا اے، اوہ انتہائی دردناک تے برداشت توں باہر اے۔ وطنِ عزیز وچ کسے بھی شہری نوں اوہدی بولی یا قومیت پاروں نشانہ بنانا ملک دی سلامتی اُتے حملہ اے۔"
اوہناں نے گورنمنٹ آف پاکستان، آرمی چیف جنرل عاصم منیر صاحب تے دوجے اعلیٰ عہدیداراں توں پرزور مطالبہ کیتا کہ اس سنگین صورتحال دا فوری نوٹس لیا جائے۔ سندھ وچ وسدے پنجابیاں دے جان و مال دا تحفظ ہر حال وچ یقینی بنایا جائے تے اوتھے جاری اس ظلم و ستم نوں فوری طور تے بند کروایا جائے۔
میاں امجد ہوراں نے واضح کیتا کہ پنجاب لوک راج پارٹی مظلوماں دے نال کھڑی اے تے اسیں مطالبہ کردے آں کہ انہاں گھناؤنے واقعات وچ ملوث سفاک قاتلاں تے اوہناں دے سرپرستاں نوں فی الفور گرفتار کر کے قانون دے کٹھہرے وچ لیایا جائے تے اوہناں نوں عبرت دا نشان بنایا جائے تاکہ اگوں توں کسے نوں ایہو جہی بزدلانہ کارروائی کرن دی جرات نہ ہووے۔
اوہناں نے مقتولین دے ٹبراں (لواحقین) نال دلی ہمدردی دا اظہار کردیاں یقین دوایا کہ انصاف ملن تیکر اسیں اوہناں دی آواز بن کے ہر فورم اُتے احتجاج کردے رہواں گے۔