07/10/2026
ڈیری اینڈ کیٹل فارمرز ایسوسی ایشن آف پاکستان کے وفد کا پیرس میں پرتپاک استقبال
ڈیری اینڈ کیٹل فارمرز ایسوسی ایشن آف پاکستان کے ایک معزز وفد نے پیرس کا دورہ کیا اور اس موقع پر پاکستان بزنس فورم یورپ کے ہیڈ آفس میں خصوصی ملاقات کی۔
وفد میں ایسوسی ایشن کے صدر شاکر عمر گجر، عبدالباسط گجر، حماد علی اور اسد منصور شامل تھے۔ پاکستان بزنس فورم فرانس کے عہدیداران نے وفد کا پرتپاک اور شاندار استقبال کیا۔
ملاقات کے دوران پاکستان کے فارمرز اور لائیو اسٹاک سیکٹر کو درپیش مسائل، زرعی شعبے کی بہتری، کسانوں کے لیے نئے مواقع اور پاکستان کی معیشت میں فارمنگ و لائیو اسٹاک کے کردار سمیت مختلف اہم امور پر تفصیلی گفتگو ہوئی۔ شرکاء نے اس بات پر زور دیا کہ پاکستان کے کسان اور فارمرز ملکی معیشت کی ریڑھ کی ہڈی ہیں، لہٰذا ان کے مسائل کے حل اور انہیں جدید سہولیات و عالمی منڈیوں تک رسائی فراہم کرنے کے لیے مشترکہ کوششیں وقت کی اہم ضرورت ہیں۔
ملاقات کے اختتام پر پاکستان بزنس فورم فرانس کی جانب سے معزز مہمانوں کے اعزاز میں ایک پرتکلف عشائیے کا بھی اہتمام کیا گیا، جہاں خوشگوار ماحول میں باہمی روابط کو مزید مضبوط بنانے اور مستقبل میں تعاون کے امکانات پر بھی تبادلہ خیال کیا گیا۔
یہ ملاقات پاکستان اور یورپ کے درمیان کاروباری، زرعی اور تجارتی روابط کو فروغ دینے کے حوالے سے ایک مثبت اور خوش آئند قدم قرار دی جا سکتی ہے۔
Muhammad Shakir
