NDM Updates

نیشنل ڈیموکریٹک مومنٹ کے سینئر لیڈر وسابقہ سینیٹر افراسیاب خٹک صاحب.
*ابتدائی زندگی اور تعلیمی سفر:
افراسیاب خٹک صاحب کا تعلق خیبر پختونخوا کے جنوبی ضلع سے ہے، جہاں انہوں نے اپنی ابتدائی تعلیم وانہ ہائی سکول جنوبی وزیرستان سے حاصل کی۔ میٹرک مکمل کرنے کے بعد وہ بنوں چلے گئے اور وہاں کے کالج سے ایف ایس سی کا امتحان پاس کیا۔ اعلیٰ تعلیم کے حصول کے لیے انہوں نے پشاور یونیورسٹی کا رخ کیا، جہاں سے انہوں نے انگریزی ادب میں ماسٹرز (MA English) اور قانون کی ڈگری (LLB) حاصل کی۔ ان کا تعلیمی دور محض کتابوں تک محدود نہیں تھا بلکہ یہی وہ وقت تھا جب ان کی سیاسی تربیت کا آغاز ہوا۔
*سیاسی آغاز اور نظریاتی تربیت:
خٹک صاحب کی پوری زندگی ایک ترقی پسند جدوجہد سے عبارت ہے۔ انہوں نے اپنے طالب علمی کے دور میں پشتون سٹوڈنٹ فیڈریشن کی بنیاد رکھنے میں اہم کردار ادا کیا اور اس تنظیم کے بانی ممبر کے طور پر خدمات سر انجام دیں۔ اس پلیٹ فارم پر ان کے ساتھ لطیف لالا اور اسفندیار ولی خان جیسے رہنما بھی شامل تھے۔ اپنی نظریاتی پختگی کے لیے انہوں نے باچاخان اور غنی خان بابا جیسے عظیم رہنماؤں کی صحبت اختیار کی اور جہاں بھی یہ بزرگ رہنما جاتے، خٹک صاحب ان کے سائے کی طرح ساتھ ہوتے تھے، جس نے ان کی شخصیت پر گہرے نقوش مرتب کیے۔
خٹک صاحب1975 میں شیرمحمد صاحب کے ساتھ تیراہ کے راستے سے پہلی دفعہ افغانستان گئے تھے جہاں پر انہوں نے داؤد خان کے ساتھ ملاقات کی تھی۔
*قید و بند کی صعوبتیں اور جلاوطنی:
افراسیاب خٹک کی سیاسی زندگی قربانیوں سے بھری پڑی ہے۔ ذوالفقار علی بھٹو کے دورِ حکومت میں انہوں نے اپنی زندگی کے پانچ سال مختلف جیلوں میں گزارے جن میں بلوچستان کی سخت ترین مچ جیل بھی شامل ہے۔ اس دوران ولی خان، خیر بخش مری، اور میر غوث بخش بزنجو جیسے قد آور سیاستدان بھی ان کے ہمراہ قید تھے۔ جیل میں انہیں کئی بار وزارتوں اور مراعات کی پیشکش ہوئی تاکہ وہ اپنے نظریے سے پیچھے ہٹ جائیں، لیکن انہوں نے ان تمام آفرز کو مسترد کر دیا۔ اس کے علاوہ انہیں فوجی عدالتوں کا سامنا بھی کرنا پڑا۔ مسلسل کریک ڈاؤن اور سیاسی مقدمات کی وجہ سے وہ 1981 سے 1989 تک آٹھ سال افغانستان میں جلاوطن رہے.
سٹوڈنٹ لائیف میں جب بھی افراسیاب خٹک صاحب اور ان کے ساتھیوں پر کریک ڈاؤن یا ایف آئی آر درج ہوتی تو کئ بار وہ ساتھیوں سمیت غنی خان خان بابا کے ہجرے چارسدہ میں پناہ لیتے تھے ۔آیف آئی آر اور مختلف جعلی مقدمات کی وجہ سے افراسیاب خٹک ساتھیوں سمیت پشاور یونیورسٹی میں کئ ماہ تک بغیر باہر نکلے رہے چونکہ وہ پشاور یونیورسٹی میں طالب علم تھے تو اس وقت کے وائس چانسلر علی خان جو ولی خان اور غنی خان بابا کے بھائی وہ پولیس کو یونیورسٹی کے اندر ان کو گرفتار کرنے کیلئے داخل ہونے نہیں دیتے۔
شہید ڈاکٹر نجیب کا خٹک صاحب کے ساتھ سٹوڈنٹ لائیف سے گہرا تعلق تھا اور مختلف ادوار میں افغانستان کے دیگر صدور اور رہنماؤں کے ساتھ بھی انکے تعلقات نزدیکی اور اچھے رہے۔
*پارلیمانی خدمات اور انسانی حقوق کے لیے جدوجہد:
خٹک صاحب کو یہ اعزاز حاصل ہے کہ وہ 2008 سے 2012 تک عوامی نیشنل پارٹی کی طرف سے جنوبی اضلاع سے پختونخوا کے پہلے صوبائی صدر منتخب ہوئے اور ابھی تک جنوبی اضلاع سے کوئی بھی اس منسب پر فائز نہیں رہا جو کہ ایک منفرد ریکارڈ ہے۔ وہ 2009 سے 2015 تک سینیٹ آف پاکستان کے رکن رہے، جہاں انہوں نے انسانی حقوق کی فنکشنل کمیٹی کے چیئرمین کے طور پر دو بار خدمات سر انجام دیں۔ خٹک صاحب نے تاریخی "اٹھارویں ترمیم" کی تیاری میں بھی بھرپور حصہ لیا۔ ان کی ایک اہم کوشش آئی ایس آئی کی پارلیمانی جوابدہی کے لیے قانون سازی تھی، جسے اس وقت کی نواز شریف حکومت نے مسترد کر دیا تھا، اور بعد ازاں اسی مقصد کے لیے چیئرمین محسن داوڑ نے اپنے دور میں دوبارہ بل پیش کیا۔جو کہ مسترد کردیا گیا ۔
*عوامی نیشنل پارٹی سے علیحدگی اور این ڈی ایم کی بنیاد:
طویل عرصہ اے این پی سے وابستہ رہنے کے بعد، 2019 میں پارٹی کی جانب سے شوکاز نوٹس ملنے پر انہوں نے تنظیم سے علیحدگی اختیار کر لی۔ کچھ عرصہ "پشتون تحفظ موومنٹ " کے ساتھ سرگرم رہنے کے بعد، انہوں نے یکم ستمبر 2021 کو اپنے ساتھیوں سمیت "نیشنل ڈیموکریٹک مومنٹ" کی بنیاد رکھی، جس کے چیئرمین محسن داوڑ منتخب ہوئے۔ خٹک صاحب کی کتاب "نوی تیغ" ان کی فکری سوچ اور سیاسی بیانیے کی بہترین عکاس ہے، جو موجودہ دور کے سیاسی حالات اور پشتونوں کی جدوجہد پر روشنی ڈالتی ہے۔

آج شمالی وزیرستان کی مٹی کے غیرت مند بیٹے اور نامور صحافی شہید کامران داوڑ کی دوسری برسی ہے۔ دو سال گزر جانے کے باوجود قاتلوں کا آزاد گھومنا قانون نافذ کرنے والے اداروں پر سوالیہ نشان ہے۔
کامران داوڑ عوام کی خدمت کو عبادت سمجھ کر ہمیشہ صفِ اول میں کھڑے رہے۔ انہوں نے اپنے علاقے کی خوشحالی اور امن کے لیے وہ آواز اٹھائی جسے کبھی فراموش نہیں کیا جا سکتا۔
ہم این ڈی ایم (NDM) ڈیجیٹل ونگ کی طرف سے شہید کی قربانیوں کو خراجِ عقیدت پیش کرتے ہیں اور اعلیٰ حکام سے مطالبہ کرتے ہیں کہ کامران داوڑ کے قاتلوں کو فوری گرفتار کر کے انصاف کے کٹہرے میں لایا جائے۔