Commissioner Peshawar Division, Peshawar

20/09/2026

پریس ریلیز

کمشنر پشاور ڈویژن ریاض خان محسود کا ایم ڈی کیٹ امتحانی مراکز کا دورہ

طلبہ کو فراہم سہولیات، سکیورٹی اور امتحانی انتظامات کا جائزہ، شفافیت اور نقل کی روک تھام یقینی بنانے کی ہدایات، سہولیات کی فراہمی اور طلبہ کو پرسکون ماحول کی فراہمی پر اطمینان کا اظہار

پشاور: کمشنر پشاور ڈویژن ریاض خان محسود نے صوبائی دارالحکومت پشاور میں میڈیکل اینڈ ڈینٹل کالجز ایڈمیشن ٹیسٹ (MD-CAT) کے انعقاد کے سلسلے میں مختلف امتحانی مراکز اور امتحانی ہالز کا دورہ کیا۔

اس موقع پر کمشنر پشاور ڈویژن نے امتحانی مراکز میں کیے گئے انتظامات، طلبہ کو فراہم کی جانے والی سہولیات، سکیورٹی اقدامات اور امتحانی عمل کا تفصیلی جائزہ لیا۔ انہوں نے امتحانی ہالز کا معائنہ کرتے ہوئے طلبہ کے لیے پرسکون، محفوظ اور سازگار ماحول کی فراہمی کو یقینی بنانے کے اقدامات کا بھی جائزہ لیا۔

کمشنر پشاور ڈویژن ریاض خان محسود نے امتحانی انتظامات اور طلبہ کو فراہم کی جانے والی سہولیات پر اطمینان کا اظہار کیا۔ انہوں نے امتحانی عملے کو ہدایت کی کہ امتحان کے دوران شفافیت اور میرٹ کو ہر صورت برقرار رکھا جائے اور نقل سمیت کسی بھی غیر قانونی یا غیر اخلاقی ذریعے کے استعمال کی روک تھام کے لیے مؤثر اقدامات یقینی بنائے جائیں۔

انہوں نے مزید ہدایت کی کہ تمام امیدواروں کے ساتھ یکساں اور منصفانہ رویہ اختیار کیا جائے، امتحانی ضوابط پر سختی سے عملدرآمد کرایا جائے اور طلبہ کو کسی غیر ضروری پریشانی کے بغیر امتحان دینے کے لیے ہر ممکن سہولت فراہم کی جائے۔

کمشنر پشاور ڈویژن نے کہا کہ ایم ڈی کیٹ طلبہ کے مستقبل اور میڈیکل شعبے میں ان کے داخلے کے حوالے سے انتہائی اہم امتحان ہے، اس لیے امتحانی عمل میں شفافیت، میرٹ اور نظم و ضبط کو یقینی بنانا تمام متعلقہ اداروں کی بنیادی ذمہ داری ہے۔

انہوں نے امتحانی عملے اور انتظامیہ کی جانب سے کیے گئے انتظامات کو سراہتے ہوئے ہدایت کی کہ امتحان کے اختتام تک تمام انتظامات کی مؤثر نگرانی جاری رکھی جائے تاکہ امیدوار بلا خوف و دباؤ پرسکون ماحول میں اپنا امتحان مکمل کر سکیں۔

19/09/2026

پریس ریلیز

ایم ڈی کیٹ ٹیسٹ کے انتظامات مکمل، 16 ہزار 502 سے زائد امیدوار شرکت کریں گے

کمشنر پشاور ریاض خان محسود کی زیرِ صدارت اہم اجلاس، سکیورٹی و سہولیات کا جائزہ

19 امتحانی مراکز پر واک تھرو گیٹس، خواتین پولیس اہلکار بھی تعینات ہوں گی

پیسکو کی 28 فیڈرز پر ٹیسٹ کے دوران بلا تعطل بجلی کی فراہمی کی یقین دہانی

طلبہ کو پرسکون ماحول اور بہترین سہولیات کی فراہمی،

پشاور: کمشنر پشاور ڈویژن ریاض خان محسود کی زیرِ صدارت صوبائی دارالحکومت پشاور میں 20 ستمبر بروز اتوار منعقد ہونے والے ایم ڈی کیٹ ٹیسٹ کے انتظامات، سکیورٹی، ٹریفک اور امیدواروں کو سہولیات کی فراہمی کے حوالے سے اہم اجلاس منعقد ہوا۔ اجلاس میں ضلعی انتظامیہ پشاور، پولیس، پیسکو، خیبر میڈیکل کالج انتظامیہ، ریسکیو 1122، انٹیلیجنس بیورو اور اسپیشل برانچ کے افسران نے شرکت کی۔

اجلاس میں کمشنر پشاور کو ایم ڈی کیٹ ٹیسٹ کے لیے کیے گئے انتظامی و سکیورٹی اقدامات پر تفصیلی بریفنگ دی گئی۔ حکام نے بتایا کہ ٹیسٹ میں 16 ہزار 502 سے زائد امیدوار شرکت کریں گے، جن میں 8 ہزار 226 طالبات شامل ہیں۔ امیدواروں کی تعداد کے مطابق تمام ضروری انتظامات مکمل کر لیے گئے ہیں۔

ٹیسٹ کے دوران بجلی کی بلا تعطل فراہمی یقینی بنانے کے لیے پیسکو کو 28 متعلقہ فیڈرز کی فہرست فراہم کر دی گئی ہے، جبکہ پیسکو حکام نے ٹیسٹ کے دوران ان فیڈرز پر لوڈشیڈنگ نہ کرنے کی یقین دہانی کرائی۔

ٹیسٹ کو شفاف بنانے اور نقل کی روک تھام کے لیے پاکٹ گائیڈز کی خرید و فروخت پر پابندی عائد کی گئی ہے، جبکہ خلاف ورزی کرنے والوں کے خلاف کارروائی کرتے ہوئے پاکٹ گائیڈز تحویل میں لی گئی ہیں۔ امتحانی مراکز کے اطراف غیر متعلقہ افراد کے جمع ہونے اور کھڑے ہونے پر دفعہ 144 کے تحت پابندی عائد ہے۔

اجلاس میں فیصلہ کیا گیا کہ ایم ڈی کیٹ ٹیسٹ کی شفافیت، سکیورٹی اور امیدواروں کو سہولیات کی فراہمی کے لیے تمام دستیاب وسائل بروئے کار لائے جائیں گے۔ اسسٹنٹ کمشنرز کی سربراہی میں خصوصی ٹیمیں تشکیل دی گئی ہیں جو امتحانی مراکز کا دورہ کریں گی اور انتظامات، سہولیات اور نقل کی روک تھام کی نگرانی کریں گی۔

سکیورٹی کے لیے تمام 19 امتحانی مراکز کے داخلی راستوں پر واک تھرو گیٹس نصب کیے جائیں گے، جبکہ مرد پولیس اہلکاروں کے ساتھ خواتین پولیس اہلکار بھی مراکز کے باہر تعینات ہوں گی۔ ٹریفک کی روانی برقرار رکھنے کے لیے خصوصی ٹریفک پلان بھی ترتیب دیا گیا ہے۔

امیدواروں کی بروقت امتحانی مراکز تک رسائی کے لیے ٹرانس پشاور کو اضافی بسیں چلانے کی ہدایات جاری کر دی گئی ہیں۔ امیدواروں اور والدین کو ٹریفک کے دباؤ سے بچنے کے لیے ذاتی گاڑیاں لانے کے بجائے پبلک ٹرانسپورٹ استعمال کرنے کی ہدایت کی گئی ہے۔

کمشنر پشاور ریاض خان محسود نے متعلقہ افسران کو ہدایت کی کہ ایم ڈی کیٹ ٹیسٹ کے کامیاب انعقاد کے لیے پوری دلجمعی سے فرائض انجام دیے جائیں اور غیر ضروری سختی سے مکمل گریز کیا جائے۔ انہوں نے واضح کیا کہ امتحانی مراکز کے دوروں کے دوران کوئی باوردی اہلکار یا سرکاری افسر امتحانی ہال میں داخل نہیں ہوگا تاکہ طلبہ کو ہراساں کیے بغیر انہیں پرسکون اور پُراعتماد ماحول فراہم کیا جا سکے اس سلسلے میں ہر ممکن سہولیات فراہم کی جائیں گی۔

کمشنر پشاور ڈویژن ریاض خان محسود نے کسی بھی مشکل یا ہنگامی صورتحال میں متعلقہ حکام کو براہِ راست ان سے رابطہ کرنے کی ہدایت کرتے ہوئے کہا کہ وہ خود بھی ایم ڈی کیٹ ٹیسٹ کے دوران مختلف امتحانی مراکز کے اچانک دورے کرکے انتظامات اور امیدواروں کو فراہم کی جانے والی سہولیات کا جائزہ لیں گے۔

13/09/2026

12/09/2026

پریس ریلیز

صوبائی دارالحکومت پشاور اور قبائلی ضلع خیبر کو منشیات کے عادی افراد سے پاک کرنے اور ان کی بحالی اور علاج کے لیے آپریشن جلد شروع کرنے کا فیصلہ

پشاور: وزیر اعلیٰ خیبر پختونخوا سہیل آفریدی کی خصوصی ہدایت پر صوبائی دارالحکومت پشاور اور قبائلی ضلع خیبر میں منشیات کے عادی افراد کے علاج، بحالی اور انہیں معاشرے کا مفید شہری بنانے کے لیے بھرپور آپریشن اور بحالی پروگرام جلد شروع کرنے کا فیصلہ کیا گیا ہے۔

اس حوالے سے کمشنر پشاور ڈویژن ریاض خان محسود اور صوبائی وزیر برائے سماجی بہبود ملک لیاقت علی خان کی زیرِ صدارت اہم اجلاس منعقد ہوا، جس میں ڈپٹی کمشنر پشاور، ڈپٹی کمشنر قبائلی ضلع خیبر، ڈائریکٹر سوشل ویلفیئر، ڈسٹرکٹ آفیسر سوشل ویلفیئر پشاور، ڈسٹرکٹ آفیسر سوشل ویلفیئر قبائلی ضلع خیبر اور دیگر متعلقہ محکموں کے انتظامی افسران نے شرکت کی۔

اجلاس میں صوبائی وزیر سماجی بہبود کو دنیا کے سب سے بڑے بحالی پروگرام’’نشے سے پاک پشاور‘‘ مہم کے پہلے چار ادوار کے حوالے سے تفصیلی بریفنگ دی گئی۔ بریفنگ میں بتایا گیا کہ پبلک پرائیویٹ پارٹنرشپ کے تحت اب تک 4,800 سے زائد منشیات کے عادی افراد کا کامیاب علاج اور بحالی کی جا چکی ہے۔ اور کامیاب علاج کے بعد صحتیاب افراد معمول کی زندگی بسر کر رہے ہیں، بحالی پروگرام کو ملکی اور بین الاقوامی سطح پر بھرپور پزیرائی حاصل ہوئی

اجلاس میں فیصلہ کیا گیا کہ پشاور اور قبائلی ضلع خیبر کو منشیات کے عادی افراد سے پاک کرنے، ان کے علاج، بحالی اور معاشرے میں دوبارہ باعزت زندگی کی طرف لانے کے لیے بھرپور آپریشن اور بحالی پروگرام جلد سے جلد شروع کیا جائے گا۔

اس مقصد کے لیے ڈائریکٹر سوشل ویلفیئر کو نجی بحالی مراکز کی خدمات حاصل کرنے کے لیے 24 گھنٹوں کے اندر اشتہار جاری کرنے کی ہدایت کی گئی، جبکہ منشیات کے عادی افراد کے علاج اور بحالی کے لیے نجی بحالی مراکز کو پبلک پرائیویٹ پارٹنرشپ کے تحت شامل کیا جائے گا۔

اجلاس میں واضح کیا گیا کہ بحالی مراکز کے معیار، رجسٹریشن اور مریضوں کے ساتھ برتاؤ پر کسی قسم کا سمجھوتہ نہیں کیا جائے گا۔ قوائد و ضوابط کی پاسداری نہ کرنے، غیر معیاری، غیر رجسٹرڈ یا اور دیگر غیر قانونی و پرتشدد واقعات میں ملوث بحالی مراکز کے خلاف سخت کارروائی کرتے ہوئے انہیں بند کیا جائے گا۔

اجلاس میں متعلقہ اداروں کو ہدایت کی گئی کہ منشیات کے عادی افراد کی نشاندہی، انہیں بحالی مراکز تک منتقلی، علاج، بحالی اور بعد ازاں معاشرے میں دوبارہ انضمام کے عمل کو مربوط اور مؤثر بنایا جائے۔

کمشنر پشاور ڈویژن ریاض خان محسود اور صوبائی وزیر سماجی بہبود ملک لیاقت علی خان نے اس عزم کا اعادہ کیا کہ منشیات کے خلاف جنگ صرف گرفتاریوں تک محدود نہیں بلکہ علاج، بحالی اور متاثرہ افراد کو دوبارہ باعزت زندگی فراہم کرنا بھی حکومت کی اولین ترجیحات میں شامل ہے۔

اجلاس میں فیصلہ کیا گیا کہ اس مقصد کے لیے تمام دستیاب وسائل بروئے کار لائے جائیں گے، متعلقہ اداروں کے درمیان باہمی رابطے مزید مؤثر بنائے جائیں گے اور منشیات کے خاتمے کے لیے دور رس، پائیدار اور نتیجہ خیز اقدامات جاری رکھے جائیں گے۔

حکومت خیبر پختونخوا کا عزم ہے کہ نوجوان نسل کو منشیات کی لعنت سے محفوظ بنا کر ایک صحت مند، محفوظ اور منشیات سے پاک معاشرے کی تشکیل یقینی بنائی جائے گی۔

02/09/2026

🎓 پشاور میں معیاری تعلیم کی جانب ایک اور اہم قدم!

صوبائی وزیر تعلیم، ابتدائی و ثانوی تعلیم ارشد ایوب خان اور کمشنر پشاور ڈویژن ریاض خان محسود کی پشاور میں نئے قائم ہونے والے سیفائر انٹرنیشنل سکول (SIS) کی افتتاحی تقریب میں شرکت۔

تقریب میں معیاری تعلیم، جدید تعلیمی سہولیات اور نوجوان نسل کے روشن مستقبل کے عزم کا اظہار کیا گیا۔

31/08/2026

نشے کے عادی افراد کی بحالی کے لیے اہم پیش رفت
وزیراعلیٰ خیبر پختونخوا سہیل آفریدی کی خصوصی ہدایات پر کمشنر پشاور ڈویژن ریاض خان محسود کی زیر صدارت مہم کے جلد آغاز کے حوالے سے اجلاس

مہم کا آغاز پشاور اور قبائلی ضلع خیبر سے کرنے کا فیصلہ
سڑکوں پر موجود نشے کے عادی افراد کا پبلک پرائیویٹ پارٹنرشپ کے تحت بحالی مراکز میں علاج کیا جائے گا
نشے کے عادی افراد کی بحالی کے لیے مشترکہ آپریشن اور مؤثر نگرانی کا فیصلہ

وزیراعلیٰ خیبر پختونخوا سہیل آفریدی کی خصوصی ہدایات پر کمشنر پشاور ڈویژن ریاض خان محسود کی زیرِ صدارت نشے کے عادی افراد کے علاج، بحالی اور معاشرے میں دوبارہ فعال کردار کے حوالے سے اہم اجلاس منعقد ہوا۔

اجلاس میں سیکرٹری سوشل ویلفیئر، ڈائریکٹر اینٹی نارکوٹکس، ڈائریکٹر سوشل ویلفیئر، ضلعی انتظامیہ پشاور و قبائلی ضلع خیبر، ڈسٹرکٹ آفیسر سوشل ویلفیئر پشاور سمیت دیگر متعلقہ افسران نے بذریعہ ویڈیو لنک شرکت کی۔

اجلاس میں فیصلہ کیا گیا کہ نشے کے عادی افراد کے علاج و بحالی کے لیے تمام قانونی و انتظامی تقاضے، بشمول اشتہار کے اجراء، جلد مکمل کیے جائیں گے تاکہ مہم کا باقاعدہ جلد آغاز ممکن بنایا جا سکے۔ مہم کا ابتدائی مرحلہ صوبائی دارالحکومت پشاور اور قبائلی ضلع خیبر سے کیا جائے گا۔

مہم پبلک پرائیویٹ پارٹنرشپ کے تحت چلائی جائے گی، جبکہ ضلعی انتظامیہ، پولیس، محکمہ ایکسائز، محکمہ اینٹی نارکوٹکس اور سول ڈیفنس مشترکہ کارروائی کے ذریعے سڑکوں پر موجود نشے کے عادی افراد کو تحویل میں لے کر بحالی مراکز منتقل کریں گے۔

بہتر اور دیرپا نتائج کے حصول کے لیے علاج کا دورانیہ چار ماہ سے بڑھا کر پانچ ماہ کرنے کی تجویز بھی زیرِ غور آئی۔ اس کے علاوہ اسسٹنٹ کمشنرز کی سربراہی میں تشکیل دی جانے والی ٹیمیں بحالی مراکز کے اچانک دورے کرکے مریضوں کے علاج، خوراک اور دیگر سہولیات کا باقاعدگی سے جائزہ لیں گی۔

مہم کے لیے فنڈز کی دستیابی اور اخراجات کے انتظام کی ذمہ داری محکمہ سوشل ویلفیئر کے سپرد ہوگی۔

اجلاس سے خطاب کرتے ہوئے کمشنر پشاور ڈویژن ریاض خان محسود نے کہا کہ انسانیت کی فلاح و بہبود اور معاشرے کو منشیات کی لعنت سے پاک کرنے کے لیے وزیراعلیٰ خیبر پختونخوا سہیل آفریدی کی خصوصی دلچسپی قابلِ تحسین ہے۔ انہوں نے متعلقہ افسران کو ہدایت کی کہ وزیراعلیٰ کی ہدایات پر من و عن عملدرآمد یقینی بناتے ہوئے مہم کا جلد آغاز کیا جائے اور اس کی کامیابی کے لیے تمام دستیاب وسائل بروئے کار لائے جائیں۔

30/08/2026

کمشنر پشاور ڈویژن ریاض خان محسود نشے سے پاک خیبرپختونخوا مہم کے آغاز کے حوالے سے منعقدہ تقریب سے خطاب کر رہے ہیں

29/08/2026

پریس ریلیز

وزیر اعلیٰ خیبر پختونخوا سہیل آفریدی کی ہدایات پر خیبر پختونخوا میں ڈرگ فری مہم شروع کرنے کا فیصلہ،

ڈرگ فری خیبر پختونخوا پروگرام کا باقاعدہ آغاز اگلے ماہ سے کیا جائے گا

سرکاری و نجی بحالی مراکز کے ذریعے منشیات کے عادی افراد کا علاج، منشیات فروشوں کے خلاف بھرپور کریک ڈاؤن کا فیصلہ

ڈرگ فری پشاور مہم کے تین مراحل میں اب تک 4,830 افراد کا کامیاب علاج، صحتیاب افراد معمول کی زندگی گزار رہے ہیں: کمشنر پشاور ڈویژن ریاض خان محسود

پشاور: خیبر پختونخوا میں منشیات کے خلاف ڈرگ فری مہم شروع کرنے کا فیصلہ کیا گیا ہے،
اس سلسلے میں قبائلی ضلع خیبر میں وزیراعلیٰ خیبر پختونخوا سہیل آفریدی کی رہائش گاہ پر ایک پروقار تقریب منعقد ہوئی، جس کے مہمان خصوصی کمشنر پشاور ڈویژن ریاض خان محسود تھے۔ تقریب میں ممبر قومی اسمبلی قبائلی ضلع خیبر اقبال آفریدی، ممبر صوبائی اسمبلی عبدالغنی آفریدی، اسپیشل سیکریٹری وزیراعلیٰ عدیل صافی، وزیراعلیٰ کے بھائی نوید آفریدی، ڈپٹی کمشنر قبائلی ضلع خیبر شاہد علی، ڈسٹرکٹ پولیس آفیسر قبائلی ضلع خیبر وقار احمد، محکمہ سوشل ویلفیئر، محکمہ ایکسائز، اینٹی نارکوٹکس فورس، سول سوسائٹی اور علاقہ عمائدین نے شرکت کی۔

تقریب میں ڈرگ فری خیبر پختونخوا پروگرام کے آغاز کے حوالے سے اہم امور پر تفصیلی غور کیا گیا،

مقررین نے ڈرگ فری پشاور مہم کے کامیاب تجربے اور حاصل ہونے والے نتائج کو سراہتے ہوئے اس عزم کا اظہار کیا کہ پشاور میں اختیار کی گئی حکمت عملی اور تجربات سے استفادہ کرتے ہوئے خیبر پختونخوا کے دیگر اضلاع میں بھی منشیات کے خاتمے کے لیے مربوط اور مؤثر اقدامات کیے جائیں گے۔

پروگرام کے تحت پبلک پرائیویٹ پارٹنرشپ کے ذریعے سرکاری و نجی بحالی مراکز میں منشیات کے عادی افراد کے علاج اور بحالی کو یقینی بنایا جائے گا، جبکہ منشیات فروشوں کے خلاف بھی مؤثر کارروائی اور بھرپور کریک ڈاؤن کیا جائے گا۔

تقریب سے خطاب کرتے ہوئے کمشنر پشاور ڈویژن ریاض خان محسود نے کہا کہ ڈرگ فری پشاور مہم کے تینوں مراحل میں اب تک 4,830 منشیات کے عادی افراد کا کامیاب علاج اور بحالی کی جا چکی ہے، جبکہ صحتیاب ہونے والے افراد اب معمول کی زندگی گزار رہے ہیں۔

انہوں نے کہا کہ ڈرگ فری خیبر پختونخوا مہم ایک انسانیت دوست اور معاشرے کی بہتری کے لیے انتہائی اہم اقدام ہے۔ منشیات کے خلاف جنگ صرف حکومت کی نہیں بلکہ پورے معاشرے کی مشترکہ ذمہ داری ہے۔

کمشنر پشاور ڈویژن ریاض خان محسود نے کہا کہ حکومت، انتظامیہ، پولیس، متعلقہ اداروں، بحالی مراکز، سول سوسائٹی اور عوام کے باہمی تعاون سے خیبر پختونخوا کو منشیات کی لعنت سے پاک کرنے کے ہدف کے حصول کے لیے بھرپور اقدامات کیے جائیں گے۔

انہوں نے کہا کہ ڈرگ فری خیبر پختونخوا مہم کے آغاز کے بعد منشیات کے عادی افراد کی بحالی کے ساتھ ساتھ منشیات کے کاروبار میں ملوث عناصر کے خلاف بھی سخت کارروائی کی جائے گی، تاکہ معاشرے کو اس لعنت سے نجات دلائی جا سکے۔

کمشنر ریاض خان محسود نے ڈرگ فری خیبرپختونخوا مہم شروع کرنے پر وزیر اعلیٰ خیبر پختونخوا سہیل آفریدی جبکہ تقریب کے انعقاد پر نوید آفریدی، ایم این اے اقبال آفریدی اور ایم پی اے عبدالغنی آفریدی کا شکریہ بھی ادا کیا۔

20/08/2026

پشاور ڈویژن محفل حسنِ قرأت و نعت خوانی؛ نمایاں پوزیشن حاصل کرنے والے طلبہ میں انعامات تقسیم

پشاور: صوبائی حکومت کی ہدایات کی روشنی محکمہ اوقاف کے زیر اہتمام میں عشرہ رحمت اللعالمین کے سلسلے میں سٹی کونسل ہال پشاور میں محفل حسنِ قرأت و نعت خوانی کا انعقاد کیا گیا، جس میں پشاور ڈویژن کے تمام پانچوں اضلاع پشاور، نوشہرہ، چارسدہ، قبائلی ضلع مہمند اور ضلع خیبر سے تعلق رکھنے والے طلبہ نے بھرپور شرکت کی۔

تقریب میں شیخ الحدیث مولانا احسان اللہ، مولانا یوسف شاہ، مفتی محمد ظفر مہمان خصوصی ایڈیشنل کمشنر پشاور محمد ریاض، اے ڈی سی فنانس محمد اصغر سورانی، اسسٹنٹ کمشنر پشاور سٹی ذیشان نجیب، ایڈیشنل اسسٹنٹ کمشنرز اور دیگر شرکاء نے شرکت کی۔

حسنِ قرأت کے مقابلے میں قاری احمد، ضلع چارسدہ نے پہلی، قاری محمد احتشام پشاور نے دوسری، جبکہ قاری محمد الیاس، ضلع پشاور نے تیسری پوزیشن حاصل کی۔

نعت خوانی کے مقابلے میں آمنہ فرید، ضلع پشاور نے پہلی، محمد ساحل، ضلع چارسدہ نے دوسری جبکہ مہران حسن، ضلع خیبر نے تیسری پوزیشن حاصل کی۔

مہمانانِ گرامی نے نمایاں پوزیشن حاصل کرنے والے طلبہ میں انعامات تقسیم کیے۔ اس موقع پر مقررین نے سیرت النبی ﷺ اور آپ ﷺ کی تعلیمات و اسوۂ حسنہ پر روشنی ڈالتے ہوئے نوجوان نسل کو سیرتِ طیبہ پر عمل پیرا ہونے کی تلقین کی۔
عشرہ رحمت اللعالمین کے سلسلے میں پشاور ڈویژن کے تمام پانچوں اضلاع پشاور، نوشہرہ، چارسدہ قبائلی ضلع مہمند اور ضلع خیبر میں اضلاع کی سطح پر مقابلوں کا انعقاد کیا گیا تھا جس میں نمایاں پوزیشن حاصل کرنے والوں کے مابین ڈویژن کی سطح پر مقابلے کا انعقاد کیا گیا

19/08/2026

سرکاری کرایہ نامہ پر سختی سے عملدرآمد

کمشنر پشاور ڈویژن/چیئرمین آر ٹی اے ریاض خان محسود کی ہدایت پر سیکریٹری آر ٹی اے قیصر خان نے پشاور کے نجی بس اڈوں کا دورہ کیا اور سرکاری کرایہ نامہ پر عملدرآمد کا جائزہ لیا۔

بس اڈوں اور گاڑیوں میں کرایہ نامہ نمایاں طور پر آویزاں کرنے اور مسافروں سے مقررہ کرایہ وصول کرنے کی ہدایت کی گئی۔ زائد کرایہ وصول کرنے یا خلاف ورزی کی صورت میں قانون کے مطابق سخت کارروائی عمل میں لائی جائے گی۔