08/10/2026
خیبرپختونخوا کا معدنی شعبہ بحران میں — حکومت ، سیاسی، ریاستی ادارے اور بنیادی حقوق کی تنظیمیں کیوں خاموش ہیں؟ مائن اونرز کو دیوار سے کیوں لگایا جارہا ھے۔
ملک سے وفاداری کا حلف، مگر نظام کی ناانصافی کے خلاف آواز — مائن اونرز آخر کس طرف جائیں؟
خیبرپختونخوا کا معدنی شعبہ آج شدید بحران سے گزر رہا ہے۔ یہ صرف مائن اونرز کا مسئلہ نہیں بلکہ روزگار، سرمایہ کاری، برآمدات اور صوبائی معیشت کا سوال ہے۔
ایک مائن اونر پہلے ضلعی انتظامیہ، محکمہ معدنیات، جنگلات، ریونیو، سیکیورٹی اور دیگر اداروں کے چکر کاٹتا ہے۔ سالہا سال این او سیز اور اجازت ناموں کے لیے جدوجہد کرتا ہے، اپنی جمع پونجی لگاتا ہے، ملکی سرمایہ کار تلاش کرتا ہے، سڑکیں اور بنیادی ڈھانچہ بناتا، مشینری لاتا اور مزدور بھرتی کرتا ہے۔
مگر پاکستان کا بینکنگ نظام مائن اونرز کو مائننگ کے لیے قرض فراہم نہیں کرتا۔ اس کے باوجود مائن اونر اپنا اور نجی سرمایہ خطرے میں ڈال کر منصوبہ شروع کرتا ہے، لیکن کام چلنے کے بعد ایک نوٹیفیکیشن یا انتظامی فیصلے سے پورا منصوبہ اچانک رک جاتا ہے۔
آخر اس ضائع ہونے والی سرمایہ کاری کا ذمہ دار کون ہے.....؟
بارڈر اور دور دراز علاقوں میں این او سیز، سیکیورٹی، راستوں اور مختلف اداروں کی رکاوٹیں الگ ہیں۔دسری طرف دہشت گردی کی لپیٹ میں الگ نقصانات،ہزاروں ایکڑ رقبہ جنگلات کے نام پر متنازع ہونے سے برسوں کی سرمایہ کاری خطرے میں پڑ جاتی ہے۔
غیر ملکی سرمایہ کاروں کو پاکستان لانے، انہیں سرمایہ کاری پر آمادہ کرنے اور اعتماد دلانے کے بعد جب ان کے سامنے رکاوٹوں کی دیوار کھڑی کردی جائے تو صرف سرمایہ نہیں، پاکستان کا اعتماد بھی ضائع ہوتا ہے۔
دوسری طرف عام مائن اونرز کا مؤقف ہے کہ قانونی مائننگ کرنے والوں کو قدم قدم پر مشکلات کا سامنا ہے، جبکہ غیر قانونی مائننگ کے خلاف مؤثر کارروائی کے حوالے سے بھی سنگین سوالات موجود ہیں۔
اب تین ماہ سے blasting material کے بحران نے رہی سہی کسر بھی پوری کردی ہے۔ 4000 مائنز بند، تین لاکھ مزدور بے روزگار، ٹرانسپورٹ کھڑی، processing units متاثر، exports متاثر اور 14 ارب روپے کی صوبائی ریونیو شدید خطرے میں ہے۔
ایک ہی ملک، ایک ہی قانون، مگر blasting material کے حوالے سے صوبوں میں مختلف عملی پالیسیاں آخر کیوں۔۔۔۔۔۔۔۔؟
بند مائن کا نقصان صرف مائن اونر کا نہیں ہوتا۔ سرمایہ پھنس جاتا ہے، مشینری کھڑی رہتی ہے، مزدور بے روزگار ہوتے ہیں، ٹرانسپورٹر متاثر ہوتے ہیں اور بند منصوبوں پر ماہانہ لاکھوں روپے کے اخراجات جاری رہتے ہیں۔
اور اگر محکمہ معدنیات کے اختیارات محدود ہوں، فیصلے کہیں اور سے چلیں، transfer/posting کا سلسلہ دوسروں کے ھاتھوں میں ھوں ۔اور ہر چند ماہ بعد نیا بحران پیدا ہو تو سرمایہ کار آخر کس پر اعتماد کرے؟
مائن اونرز نے پاکستان سے وفاداری کا حلف اٹھایا ہے۔ ان کی آواز ریاست کے خلاف نہیں، بلکہ اپنے حقوق، روزگار اور قانونی سرمایہ کاری کے تحفظ کے لیے ضرور ہے۔
مائن اونرز برادری اپنی روداد حکومت تک پہنچا چکے ہیں۔
اب سوال ہے:
کہ اس سنگین صورت حال پر سیاسی جماعتیں، سیکیورٹی ادارے، بنیادی حقوق کی تنظیمیں، تاجر برادری اور دیگر متعلقہ ادارے خاموش کیوں ہیں؟
کیا اس شعبے کے مکمل مفلوج ہونے کا انتظار کیا جارہا ہے؟
خیبرپختونخوا کے پہاڑوں میں معدنیات آج بھی موجود ہیں، مگر اگر یہی صورتحال رہی تو سرمایہ کار اور مائن اونر کہاں جائیں گے؟
منجانب:
شیر بندی خان مروت
چیئرمین، فرنٹیئر مائن اونرز ایسوسی ایشن خیبرپختونخواہ۔
