04/10/2026
تعلیمی اداروں پر حملہ ناقابلِ قبول ررژ گرائمر اسکول بلیدہ پر فائرنگ تعلیم دشمنی کی بدترین مثال ہے
مرکزی ترجمان: بی ایس او پجار
مرکزی ترجمان بی ایس او پجار نے بلیدہ کے علاقے میناز میں واقع ررژ گرائمر اسکول پر نامعلوم شرپسند عناصر کی جانب سے فائرنگ اور اسکول میں نصب سی سی ٹی وی کیمروں کو نقصان پہنچانے کے واقعے کی شدید ترین الفاظ میں مذمت کرتے ہوئے کہا ہے کہ تعلیمی اداروں کو نشانہ بنانا نہ صرف تعلیم دشمنی بلکہ معاشرے کے مستقبل پر حملہ ہے۔
مرکزی ترجمان نے کہا کہ اسکول علم، شعور اور مستقبل کی تعمیر کے مراکز ہوتے ہیں۔ ان اداروں کو خوف و ہراس کا نشانہ بنانا کسی بھی صورت قابلِ قبول نہیں۔ بلیدہ جیسے علاقے میں جہاں طلبہ و طالبات پہلے ہی مختلف مشکلات کے باوجود حصولِ تعلیم کے لیے کوشاں ہیں، ایسے واقعات تعلیمی ماحول کو سبوتاژ کرنے کی خطرناک کوشش ہیں۔
بی ایس او پجار سمجھتا ہے کہ تعلیمی اداروں کے تحفظ اور طلبہ کے لیے پُرامن تعلیمی ماحول کی فراہمی ریاست اور متعلقہ انتظامیہ کی بنیادی ذمہ داری ہے۔ اگر تعلیمی ادارے ہی محفوظ نہیں رہیں گے تو معاشرے میں تعلیم، شعور اور ترقی کے خواب کو کیسے شرمندۂ تعبیر کیا جا سکتا ہے؟
مرکزی ترجمان نے حکومت اور ضلعی انتظامیہ سے مطالبہ کیا کہ واقعے کی فوری، شفاف اور غیر جانب دارانہ تحقیقات کی جائیں اور فائرنگ و توڑ پھوڑ میں ملوث عناصر کو فی الفور گرفتار کرکے قانون کے مطابق سخت کارروائی عمل میں لائی جائے۔ اسکول اور دیگر تعلیمی اداروں کی سکیورٹی کو بھی یقینی بنایا جائے تاکہ طلبہ، اساتذہ اور والدین میں پائی جانے والی تشویش کا ازالہ ہو۔
مرکزی ترجمان نے واضح کیا کہ بی ایس او پجار تعلیم دشمنی، تعلیمی اداروں کو خوف زدہ کرنے اور طلبہ کے مستقبل سے کھیلنے کی کسی بھی کوشش پر خاموش نہیں رہے گی۔ تعلیمی اداروں کے تحفظ اور پُرامن تعلیمی ماحول کے لیے تنظیم اپنی آواز بلند کرتی رہے گی اور حکومت کی جانب سے مؤثر کارروائی نہ ہونے کی صورت میں تنظیم آئینی و پُرامن احتجاج سمیت اپنے آئندہ کے لائحۂ عمل کا اعلان کرے گی۔
مرکزی ترجمان
بی ایس او پجار
