26/09/2026
انقلابی کمیونسٹ پارٹی کے ہفتہ وار انقلابی نشست کے سلسلے میں پارٹی کے ریجنل آفس میں ’’ایک سوال، ایک بحث‘‘ کے عنوان سے ایک کھلی، دوستانہ اور باہمی گفتگو کا اہتمام کیا گیا۔
نشست میں طلبہ، نوجوانوں اور محنت کش ساتھیوں نے بھرپور شرکت کی، جہاں ہر شریک کو اپنی جانب سے سوال اٹھانے، اپنی رائے پیش کرنے اور مختلف موضوعات پر کھل کر گفتگو کرنے کا موقع ملا۔
نشست کے دوران مختلف سیاسی، نظریاتی اور سماجی سوالات پر سیر حاصل بحث ہوئی۔ گفتگو کا دائرہ سیاست اور نظریات سے لے کر انقلاب، قومی سوال، خواتین کے سوال، موجودہ اور پرانے سماجی ڈھانچوں، سماجی رشتوں کی تبدیلی، ایک نئے سماج کی تعمیر اور اس پورے عمل میں عوامی اعتماد کی بحالی جیسے اہم موضوعات تک پھیلا رہا۔ اس کے ساتھ یہ سوال بھی زیرِ بحث آیا کہ آج کے عہد میں محنت کشوں، نوجوانوں اور عام عوام کے حقیقی مسائل کو انقلابی سیاست سے کس طرح جوڑا جائے اور ایک ایسے نئے سماج کی تعمیر کے لیے کن بنیادی تبدیلیوں کی ضرورت ہے جہاں انسانی ضروریات، برابری اور اجتماعی مفاد کو مرکزیت حاصل ہو۔
نشست میں گفتگو کسی ایک مقرر یا پہلے سے طے شدہ لیکچر تک محدود نہیں رہی، بلکہ شرکاء کے سوالات، مختلف نقطۂ نظر اور تجربات نے بحث کو آگے بڑھایا۔ سوال اٹھانے، اختلاف کرنے اور اجتماعی طور پر سماج، اس کے مسائل اور اس کی انقلابی تبدیلی کے امکانات کو سمجھنے کی اس کوشش نے نشست کو مزید بامعنی اور دلچسپ بنا دیا۔
