Urdu Designed Poetry

پیار کا پہلا خط لکھنے میں وقت تو لگتا ہے
نئے پرندوں کو اُڑنے میں وقت تو لگتا ہے

جسم کی بات نہیں تھی اُن کے دل تک جانا تھا
لمبی دوری طے کرنے میں وقت تو لگتا ہے

گانٹھ اگر لگ جائے تو پھر رشتے ہوں یا ڈوری
لاکھ کریں کوشش کھلنے میں وقت تو لگتا ہے

ہم نے علاجِ زخمِ دل تو ڈھونڈ لیا لیکن
گہرے زخموں کو بھرنے میں وقت تو لگتا ہے

ہستی مل ہستی

اے دوست ذرا اور قریبِ رگِ جاں ہو
کیا جانے کہاں تک شبِ ہجراں کا دھواں ہو

میں ایک زمانے سے تمہیں ڈھونڈ رہا ہوں
تم ایک زمانے سے خدا جانے کہاں ہو

میں اُس کو ترے نام سے تعبیر کروں گا
وہ پُھول جسے قربتِ شبنم بھی گراں ہو

شاید یہ میری آنکھ سے گِرتا ہوا آنسو
احباب کی بھولی ہوئی منزل کا نشاں ہو

ساحر صدیقی

تجھے قریب سمجھتے تھے گھر میں بیٹھے ہوۓ
تری تلاش میں نکلے تو شہر پھیل گیا

عباس تابش

تراش کر مرے بازو اڑان چھوڑ گیا
ہوا کے پاس برہنہ کمان چھوڑ گیا

رفاقتوں کا مری اس کو دھیان کتنا تھا
زمیں لے لی مگر آسمان چھوڑ گیا

عجیب شخص تھا بارش کا رنگ دیکھ کے بھی
کھلے دریچے پہ اک گلدان چھوڑ گیا

جو بادلوں سے بھی مجھ کو چھپاۓ رکھتا تھا
بڑھی ہے دھوپ تو بے سائبان چھوڑ گیا

نکل گیا کہیں ان دیکھے پانیوں کی طرف
زمیں کے نام کھلا دربان چھوڑ گیا

عقاب کو تھی غرض فاختہ پکڑنے سے
جو گر گئ تو یونہی نیم جان چھوڑ گیا

نجانے کون سا آسیب دل میں بستا ہے
کہ جو بھی ٹھہرا وہ آخر مکان چھوڑ گیا

عقب میں گہرا سمندر ہے سامنے جنگل
کہ اس انتہا پہ مرا مہربان چھوڑ گیا...!

پروین شاکر

کیسے بھولیں گی بھلا گزری ہوئی رات کا دکھ
فاحشاؤں کو ہے جسموں پہ نشانات کا دکھ
۔
مطمئن ہوں ترے جانے سے بہ ظاہر لیکن
کھا رہا ہے مجھے اندر سے اسی بات کا دکھ
۔
ہم ہیں دنیا میں نہ فردوس میں ہوں گے اک ساتھ
اس طرف طبقے ہیں اُس سمت ہے درجات کا دکھ
۔
ایک تو وہ ہے جو آتا ہے مرے حصے میں
باقی اس گھر میں اترتا ہے مضافات کا دکھ
۔
دور کی سوچنے والوں میں بہت بیٹھا ہوں
ان کی صحبت میں ملا ہے مجھے خدشات کا دکھ
۔
تیری آنکھوں سے سوا برسی ہیں آنکھیں میری
تیرے دکھ سے کہیں بڑھ کر ہے مری ذات کا دکھ
۔
ایک وہ شخص محبت سے اگر دیکھے شاہ
بھول جاؤں میں زمانے کی ہر اک بات کا دکھ
۔
شاہ زیب عکس.

پیشگوئی کرنے والے کو رہا
حادثے کے واقعی ہونے کا غم

ادریس بابر

۔
خیال و خواب، یقیں، وہم اور تنہائی
نمٹ رہا تھا ترا لمس ان درندوں سے
۔
افراسیاب کامل

کیا ستم ہے کہ ہجر کے دن بھی
زندگی میں شمار ہوتے ہیں

تسنیم بانو

رگوں کی رہداریاں سلامت
یہ درد چلنے کا راستہ ہے

ذی شان حیدر نقوی

اب مجھ کو اہتمام سے کیجے سپرد خاک
اکتا چکا ہوں جسم کا ملبہ اٹھا کے میں

دلاور علی آزر

نعت رسول مقبولﷺ

دلِ مضطر کا ہے اصرار بڑی مشکل ہے
کیسے ہو درد کا اظہار بڑی مشکل ہے

لاج رکھ لیجئے سرکار بڑی مشکل ہے
ہے بپا حشر کا بازار بڑی مشکل ہے

کوئی محسن ہے نہ غم خوار بڑی مشکل ہے
ایک سے ایک ہے بیزار بڑی مشکل ہے

کیسے پہنچوں گا میں اُس پار بڑی مشکل ہے
موجِ ساحل بھی ہے منجدھار بڑی مشکل ہے

دامنِ عفو ہے درکار بڑی مشکل ہے
اشک بہتے ہیں لگاتار بڑی مشکل ہے

یہ الگ بات اطبا بھی نہ پہچان سکے
میں مدینے کا ہوں بیمار بڑی مشکل ہے

سلکِ گوہر نہیں بنتا ہے یہ موتی آقا
چشمِ گریاں کا ہر اِک تار بڑی مشکل ہے

میری کشتی کا ہلاؔل آج نگہباں ہے خدا
بادباں کوئی نہ پتوار بڑی مشکل ہے

ڈاکٹر سیّد ہلاؔل جعفری​