Aseer Pravasi Sangam

30/10/2026

28/10/2026

#നോർക്ക കെയർ ഇൻഷുറൻസ് #പ്രീമിയം #വർധന #പിൻവലിക്കണം: #അസീർപ്രവാസിസംഘം*

കമ്മീസ് മുഷൈത്ത്: പ്രവാസികൾക്ക് ആശ്വാസമാകേണ്ട നോർക്ക കെയർ ഇൻഷുറൻസ് പദ്ധതിയിലെ പ്രീമിയം വർധന പിൻവലിക്കണമെന്നും താങ്ങാനാവുന്ന നിരക്കിൽ ചികിത്സാ പരിരക്ഷ ഉറപ്പാക്കണമെന്നും അസീർ പ്രവാസി സംഘം ആവശ്യപ്പെട്ടു. പ്രവാസികളുടെ ആരോഗ്യസുരക്ഷ ലക്ഷ്യമിട്ട് ഇടതുപക്ഷ സർക്കാർ ആവിഷ്കരിച്ച ക്ഷേമപദ്ധതിയുടെ അടിസ്ഥാന ലക്ഷ്യങ്ങളെ ദുർബലപ്പെടുത്തുന്ന നടപടികളാണ് നിലവിലെ യുഡിഎഫ് സർക്കാരിന്റെ ഭാഗത്തുനിന്നുണ്ടാകുന്നതെന്ന് സംഘടന കുറ്റപ്പെടുത്തി.

സാധാരണക്കാരായ പ്രവാസികൾക്കും അവരുടെ കുടുംബങ്ങൾക്കും ഉയർന്ന ചികിത്സാച്ചെലവിൽനിന്ന് സംരക്ഷണം നൽകുക എന്ന ലക്ഷ്യത്തോടെയാണ് നോർക്ക കെയർ ഇൻഷുറൻസ് പദ്ധതി ആരംഭിച്ചത്. വർധിച്ചുവരുന്ന ചികിത്സാച്ചെലവ് പ്രവാസി കുടുംബങ്ങളെ സാമ്പത്തിക പ്രതിസന്ധിയിലാക്കുന്ന സാഹചര്യത്തിൽ, കുറഞ്ഞ പ്രീമിയത്തിൽ ആരോഗ്യ ഇൻഷുറൻസ് ലഭ്യമാക്കിയത് വലിയ ആശ്വാസമായിരുന്നു. പ്രവാസികളുടെ ക്ഷേമം ഉറപ്പാക്കേണ്ടത് സർക്കാരിന്റെ ഉത്തരവാദിത്വമാണെന്ന നിലപാടിന്റെ ഭാഗമായാണ് പദ്ധതി നടപ്പിലാക്കിയത്.

നോർക്ക പദ്ധതിയിലുള്ള വിശ്വാസത്തെ തുടർന്ന് നിരവധി പ്രവാസികൾ നിലവിലുണ്ടായിരുന്ന സ്വകാര്യ ഇൻഷുറൻസ് പോളിസികൾ ഉപേക്ഷിച്ച് പുതിയ പദ്ധതിയിൽ അംഗങ്ങളായി. എന്നാൽ, പ്രീമിയം വർധന ഇവരെ കടുത്ത പ്രതിസന്ധിയിലാക്കിയിരിക്കുകയാണ്. ഉയർന്ന നിരക്കിൽ നോർക്ക ഇൻഷുറൻസ് തുടരാൻ കഴിയാത്തവർക്കുപോലും പഴയ സ്വകാര്യ ഇൻഷുറൻസ് പോളിസികളിലേക്ക് മുൻ വ്യവസ്ഥകളോടെ മടങ്ങാൻ കഴിയുമെന്ന് ഉറപ്പില്ല. സർക്കാർ പിന്തുണയുള്ള പദ്ധതിയെ ആശ്രയിച്ച പ്രവാസികളെ ഇത്തരമൊരു പ്രതിസന്ധിയിലേക്ക് തള്ളിവിടുന്നത് നീതീകരിക്കാനാവില്ലെന്നും സംഘടന ചൂണ്ടിക്കാട്ടി.

പ്രത്യേകിച്ച്, പ്രായം കൂടുന്നതിനനുസരിച്ച് ചികിത്സയുടെ ആവശ്യകത വർധിക്കുന്ന മുതിർന്ന പ്രവാസികൾക്ക് പ്രീമിയം കുത്തനെ ഉയരുന്നത് വലിയ തിരിച്ചടിയാണ്. വർഷങ്ങളോളം വിദേശത്ത് കഠിനാധ്വാനം ചെയ്ത് കുടുംബത്തിന്റെയും നാടിന്റെയും പുരോഗതിക്കായി സംഭാവന നൽകിയ പ്രവാസികളുടെ ആരോഗ്യസുരക്ഷ സാമ്പത്തിക താൽപര്യങ്ങൾക്ക് വിട്ടുകൊടുക്കരുത്. ക്ഷേമപദ്ധതികളുടെ വിജയത്തെ നിർണയിക്കേണ്ടത് ലാഭമല്ല, മറിച്ച് അവ ഗുണഭോക്താക്കൾക്ക് നൽകുന്ന സുരക്ഷയും ആശ്വാസവുമാണെന്നും അസീർ പ്രവാസി സംഘം അഭിപ്രായപ്പെട്ടു.

അന്യായമായ പ്രീമിയം വർധന അടിയന്തരമായി പിൻവലിക്കുക, നോർക്ക കെയർ പദ്ധതിയുടെ പ്രവാസിക്ഷേമ സ്വഭാവം സംരക്ഷിക്കുക, മുതിർന്ന പ്രവാസികൾക്കും കുറഞ്ഞ വരുമാനക്കാർക്കും സർക്കാർ സഹായത്തോടെ താങ്ങാനാവുന്ന നിരക്കിൽ ഇൻഷുറൻസ് പരിരക്ഷ ഉറപ്പാക്കുക തുടങ്ങിയ ആവശ്യങ്ങളാണ് സംഘടന മുന്നോട്ടുവെച്ചത്. നിലവിലുള്ള അംഗങ്ങൾക്ക് ചികിത്സാ പരിരക്ഷയിൽ തടസ്സമുണ്ടാകാതെ പോളിസി പുതുക്കാനുള്ള സൗകര്യം ഏർപ്പെടുത്തണമെന്നും പ്രവാസി സംഘടനകളുമായി ചർച്ച നടത്തി പ്രശ്നങ്ങൾക്ക് പരിഹാരം കാണണമെന്നും അസീർ പ്രവാസി സംഘം ആവശ്യപ്പെട്ടു.

24/10/2026

#അസീർപ്രവാസിസംഘം #വിദ്യാഭ്യാസ #മേന്മാ #പുരസ്‌കാര #വിതരണത്തിന് #തുടക്കമായി*

അസീർ: അസീർ പ്രവാസി സംഘം അംഗങ്ങളുടെ മക്കളിൽ എസ്.എസ്.എൽ.സി, പ്ലസ് ടു പരീക്ഷകളിൽ ഉന്നത വിജയം കൈവരിക്കുന്ന വിദ്യാർഥികൾക്കായി ഏർപ്പെടുത്തിയിട്ടുള്ള 'വിദ്യാഭ്യാസ മേന്മാ പുരസ്‌കാരം 2026' വിതരണത്തിന് തുടക്കമായി.
'
വിദ്യാഭ്യാസ രംഗത്ത് മികവ് പുലർത്തുന്ന വിദ്യാർഥികളെ പ്രോത്സാഹിപ്പിക്കുക, അവരുടെ നേട്ടങ്ങളെ അംഗീകരിക്കുക, തുടർപഠനത്തിന് കൂടുതൽ പ്രചോദനം നൽകുക എന്നീ ലക്ഷ്യങ്ങളോടെയാണ് അസീർ പ്രവാസി സംഘം ഈ പുരസ്‌കാര പദ്ധതി നടപ്പിലാക്കുന്നത്. പ്രവാസി കുടുംബങ്ങളിലെ കുട്ടികളുടെ വിദ്യാഭ്യാസ മുന്നേറ്റത്തിന് പിന്തുണ നൽകുന്നതിനൊപ്പം പഠനത്തിൽ മികച്ച നേട്ടങ്ങൾ കൈവരിക്കാൻ മറ്റു വിദ്യാർഥികൾക്കും പ്രചോദനമേകുക എന്നതും പദ്ധതിയുടെ പ്രധാന ലക്ഷ്യമാണ്.

*അസീർ പ്രവാസി സംഘം കമ്മീസ് ഈസ്റ്റ് യൂണിറ്റ് അംഗമായ കൃഷ്ണ കുമാറിൻ്റെ മകൾ കൃഷ്ണ പ്രിയക്ക് സി.പി.ഐ (എം) ചിറക്കര ലോക്കൽ കമ്മറ്റി അംഗവും ബ്ലോക്ക് പഞ്ചായത്ത് അംഗവുമായ ദീപു സംഘടനയുടെ മൊമ്മൻ്റോയും ക്യാഷ് പ്രൈസും കൈമാറി.*

എൻ ശശി, '
അജയകുമാർ
(സി.പി.എം ചിറക്കര ബ്രാഞ്ച് മെമ്പർ)
ശിവൻകുട്ടി പിള്ള
(മൈലക്കാട് ബ്രാഞ്ച് മെമ്പർ) എന്നീ സഖാക്കളും ചടങ്ങിൽ സംബന്ധിച്ചു.

23/10/2026

#ജനാധിപത്യ #സംരക്ഷണ #പോരാട്ടത്തിന് #ഐക്യദാർഢ്യവുമായി #അസീർപ്രവാസിസംഘം ലഹദ് #ഏരിയസമ്മേളനം*

ലഹദ്: അസീർ
ഇന്ത്യൻ ജനാധിപത്യം ഇന്ന് നേരിടുന്ന വെല്ലുവിളികളെ ഫലപ്രദമായി നേരിടാൻ ജനാധിപത്യ - മതനിരപേക്ഷ കക്ഷികളുടെ ഐക്യനിര രൂപപെടണമെന്ന് അസീർ പ്രവാസി സംഘം രക്ഷാധികാരി ബാബു പരപ്പനങ്ങാടി പ്രസ്താവിച്ചു.

ഭരണഘടനാ സ്ഥാപനങ്ങളുടെ സ്വതന്ത്രമായ പ്രവർത്തനത്തിനായി നടപടികൾ സ്വീകരിക്കണമെന്നും കേന്ദ്ര സർക്കാരിന്റെയും തിരഞ്ഞെടുപ്പ് കമ്മീഷന്റെയും ജനാധിപത്യ വിരുദ്ധമായ നടപടികൾക്കെതിരായി സമൂഹത്തിൽ ഉയരുന്ന പ്രതിഷേധങ്ങളെ അടിച്ചമർത്താൻ ശ്രമിക്കാതെ തിരഞ്ഞെടുപ്പ് പ്രക്രിയയുടെ നിഷ്പക്ഷതയും വിശ്വാസ്യതയും ഉറപ്പാക്കാനുള്ള നടപടികൾ സ്വീകരിക്കുകയാണ് വേണ്ടതെന്നും അദ്ധേഹം ആവശ്യപ്പെട്ടു.

അസീർ പ്രവാസി സംഘം ലഹദ് ഏരിയാ സമ്മേളനം ഉത്ഘാടനം ചെയ്ത് സംസാരിക്കുകയായിരുന്നു ബാബു പരപ്പനങ്ങാടി.

രാവിലെ 9.30 ന് ലഹദ് ഓഡിറ്റോറിയത്തിൽ പ്രത്യേകം സജ്ജീകരിച്ച സ: കോടിയേരി ബാലകൃഷ്ണൻ നഗറിൽ വെച്ച് സ: മുസ്തഫ കൂമ്മുളളിയുടെ സ്വാഗത പ്രസംഗത്തോടെ ആരംഭിച്ച സമ്മേളനത്തെ മണികണ്ഠൻ, അൻസാരി, ഉണ്ണി KB എന്നിവരടങ്ങുന്ന പ്രസീഡിയം നിയന്ത്രിച്ചു.

സുനിൽ കുമാർ (രക്തസാക്ഷി പ്രമേയം ) ജോൺസൺ ( അനുശോചന പ്രമേയം ) മനോജ് കണ്ണൂർ (ഏരിയ റിപ്പോർട്ട് ), സാബു വരവ് ചിലവുകൾ) സുരേഷ് മാവേലിക്കര (സംഘടന റിപ്പോർട്ട് ) എന്നിവ അവതരിപ്പിച്ചു.

തുടർന്ന് അടുത്ത ഘട്ടത്തിലേക്കുള്ള ഭാരവാഹികളുടെ പാനൽ പ്രസിഡൻ്റ് അബ്ദുൾ വഹാബ് കരുനാഗപള്ളി അവതരിപ്പിച്ചു.

ഭാരവാഹികളായി മണികണ്ഠൻ ചെഞ്ചുരുളി (സെക്രട്ടറി) ,റസാഖ് ചെർപ്പുള്ളശ്ശേരി (പ്രസിഡൻ്റ്) അൻസാരി ട്രഷറർ) സാബു ( റിലീഫ് കൺവീനർ) ,നൗഷാദ് അലി (ജോ. സെക്രട്ടറി) ,ഉണ്ണി KB (വൈസ് പ്രസിഡൻ്റ്) പ്രകാശ് കിഴിശ്ശേരി ജോ. ട്രഷറർ) എന്നിവരേയും മുസ്തഫ കൂമുള്ളി, ജോൺസൺ എന്നിവരെ റിലീഫ് കമ്മറ്റി അംഗങ്ങളായും തിരഞ്ഞെടുത്തു.

മുഖ്യ തിരഞ്ഞെടുപ്പ് കമ്മീഷണർ ഗ്യാനേഷ് കുമാറിന്റെ രാജി ആവശ്യപ്പെട്ട് ഡൽഹിയിൽ ഇടതുപക്ഷ രാഷ്ട്രീയ കക്ഷികളും എസ്.എഫ്.ഐ ഉൾപ്പെടെയുള്ള വിദ്യാർഥി സംഘടനകളും നടത്തുന്ന ജനാധിപത്യ സംരക്ഷണ പോരാട്ടത്തിന് സമ്മേളനം ഐക്യദാർഢ്യം പ്രഖ്യാപിച്ചു.

സമ്മേളനത്തിനെ അഭിവാദ്യം ചെയ്ത് രക്ഷാധികാരി സമിതി അംഗങ്ങളായ പൊന്നപ്പൻ ,സുധീരൻ, നിസാർ, രാജഗോപാൽ, റഷീദ് എന്നിവരും കേന്ദ്ര കമ്മറ്റി അംഗങ്ങളായ സലീം കൽപ്പറ്റ, രജ്ജിത്ത് വർക്കല, രാജൻ കായംകുളം, രാജേഷ്, അബ്ദുസലാം, അനിൽ, നൂർദ്ധീൻ, വിശ്വനാഥൻ, സുരേന്ദ്രൻ, ശൈലേഷ് ,ശങ്കർ കടാശ്ശേരി എന്നിവർ സംസാരിച്ചു.