13/10/2026
💚 ما كل دواء بنشتريه، بنكون عارفين قصتو...
مرات بنمشي الصيدلية، نشتري العلاج، ونرجع البيت مطمئنين إننا عملنا الحاجة الصح عشان صحتنا وصحة الناس البنعزّهم. ❤️
لكن في حاجة مهمة لازم ننتبه ليها...
💊 الدواء ما مجرد حبوب أو قطرة أو شراب.. الدواء أمانة، وراه صحة إنسان، وأمل زول منتظر ينصح ويرجع لحياته الطبيعية.
الدواء غير المسجل أو مجهول المصدر ممكن تكون جودتو غير مضمونة، أو يكون اتخزّن بطريقة غلط، أو ما يحتوي على الكمية الصحيحة من المادة الفعالة.
وده ممكن يخلي العلاج ما يجيب النتيجة المطلوبة، وأحياناً يعرّض صحة المريض للخطر.
🌿 وعشان نحافظ على صحتنا، في حاجات مهمة لازم نتذكرها:
💚 اشتري دواءك من صيدلية موثوقة، واسأل الصيدلي عن مصدره لو عندك أي شك.
💚 اتأكد من تاريخ الصلاحية وسلامة العبوة، لأن سلامة الدواء بتبدأ من جودتو وطريقة حفظو.
💚 ما تغيّر دواءك ولا جرعتك من نفسك! حتى لو حسّيت إنك بقيت أحسن، أو حسّيت إنو العلاج ما جاب نتيجة. ارجع لطبيبك، لأنو هو البقدر يحدد إذا كنت محتاج تغيّر العلاج أو تعدّل الجرعة.
💚 وما تهمل مواعيد المراجعة الدورية. المتابعة مع الطبيب مهمة عشان يطمن على استجابتك للعلاج، ويتأكد إنو الأمور ماشّة بصورة صحيحة، ويكتشف أي مشكلة بدري.
💚 وما تنسى إنو كل دواء عندو طريقة استخدام وجرعة مناسبة، والزيادة أو النقصان من غير توجيه طبي ممكن يضرّك بدل ما ينفعك.
❤️ لأننا كلنا عندنا زول غالي علينا، بنتمنى نشوفه بصحة وعافية، ونفرح برجعتو لحياتو الطبيعية.
خلينا نهتم بمصدر الدواء، ونلتزم بالعلاج، وما نهمل المتابعة الطبية.
💚 صحتك غالية، وصحة الناس البتحبهم أمانة تستحق مننا كل اهتمام.
الدواء أمانة.. والوعي بيحمي صحتنا. 💊
د/ عمر عوض
للعيون
