04/10/2026
SHIRKA DIYAAR-GAROWGA SOO DHAWAYNTA QAXOOTIGA IYO SOOMAALIDA KASOO LAABANAYA DALKA YEMEN.
Wasiiru-dawlaha Wasaaradda Arrimaha Gudaha Puntland, Mudane Yuusuf Maxamed Wacays Dhedo, Agaasimaha Guud ee Wasaaradda Arrimaha Gudaha, Maxamed Cali Faarax Farmayeeri, Guddoomiyaha Gobolka Bari, Nabadoon Maxamed Ibraahim Xaaji Faarax, Taliyaha Qaybta Booliska Gobolka Bari, G/sare Siciid Aadan Siciid, Xoghayaha Dowladda Hoose ee Degmada Boosaaso, Maxamuud Cabdullaahi Axmed Kawte iyo Kaaliyaha Xoghayaha Dowladda Hoose Maxamuud Muuse Xasan Camo ayaa wadajir uga qaybgalay shir looga hadlayey diyaar-garowga soo dhawaynta qulqulka qaxootiga ka imaanaya dalka Yemen iyo Soomaalida kasoo laabanaysa dalkaasi, kuwaas oo toddobaadyada soo socda kusoo wajahan magaalada Boosaaso.
Shirka waxaa isugu yimid bah-wadaagta ka shaqaysa soo dhawaynta, diiwaangelinta, ilaalinta iyo adeegyada muhiimka ah ee loo fidiyo dadka kasoo laabanaya dalka Yemen. Bah-wadaagta ayaa ka kooban Wasaaradaha kala duwan ee Puntland, hay’adaha amniga, Dowladda Hoose ee Degmada Boosaaso iyo hay’adaha madaxa-bannaan ee ka shaqeeya arrimaha qaxootiga iyo adeegyada bulshada.
Sidoo kale, kulanka waxaa ka qaybgalay madax sare oo ka socday Hay’adda Qaramada Midoobay u qaabilsan Qaxootiga ee UNHCR iyo hay’adaha kale ee ka shaqeeya arrimaha qaxootiga, dib-u-laabashada iyo adeegyada muhiimka u ah dadkaasi, isuduwayaal,Saraakiil iyo Agaasimayaal ka tirsan Dowladda Hoose.
Intii uu kulanku socday, waxaa si qoto dheer looga hadlay qorshaha diyaar-garowga iyo sidii si wadajir ah loo waafajin lahaa adeegyada kala duwan ee loo baahan yahay, iyadoo muhiimad gaar ah la siinayo in adeegyada muhiimka ah lagu mideeyo hal goob oo loogu talagalay qaabilaadda dadka kasoo laabanaya Yemen.
Qorshahan ayaa lagu fulinayaa xarunta qaabilaadda qaxootiga ee Boosaaso, taas oo ay hoggaaminayso Wasaaradda Arrimaha Gudaha Puntland iyo Dowladda Hoose ee Degmada Boosaaso, iyadoo ay ka qayb qaadanayaan dhammaan bah-wadaagta ay khusayso.
Kulanka ayaa sidoo kale diiradda lagu saaray sidii loo xoojin lahaa isku-xirka hay’adaha kala duwan, loo diyaarin lahaa adeegyada aasaasiga ah, loona hubin lahaa in dadka soo laabanaya ay helaan qaabilaad nidaamsan iyo adeegyo muhiim ah marka ay magaalada Boosaaso soo gaaraan.
Mas’uuliyiinta iyo hay’adaha ka qaybgalay kulanka ayaa adkeeyey muhiimadda ay leedahay in dhammaan dhinacyada ay khusayso ay si dhow u wada shaqeeyaan, si loogu diyaar garoobo baahida ka dhalan karta soo laabashada tirada badan ee Soomaalida iyo qulqulka qaxootiga ee la filayo toddobaadyada soo socda.
Qorshahan wadajirka ah ayaa qayb ka ah dadaallada lagu xaqiijinayo in magaalada Boosaaso ay si habsami leh ugu diyaar garowdo soo dhawaynta dadka kasoo laabanaya Yemen, iyadoo la isku dubbaridayo adeegyada, amniga, caafimaadka, diiwaangelinta iyo baahiyaha kale ee muhiimka u ah dadka soo laabanaya.
