22/08/2017
Luta ita-nian folin duni, atu sakrifísiu asu’uain matebian sira-nian folin nafatin, ita tenke fó onra ba sira.
Liuhosi frente armada, klandestina no diplomátika mak ita hamrik hasoru okupasaun estranjeira no ita harii Timor Leste independente, livre no demokrátiku. Biar frente klandestina no diplomátika importante tebes ba ita nia rezisténsia, luta armada ne’ebé mak asu’uain sira kaer-metin iha ai-laran mak determina susesu ba ita-nia luta ukun-an. Asu’uain sira nia lala’ok iha ai-laran mak hamanas ita nia luta, sira mak fó esperansa ba ita hotu, iha sidade no aldeira, iha rai-laran ka rai liur, sira mak hametin ita-nia mehi atu moris iha patria livre.
Maibé asu’uain FALINTIL sira-nia luta, Frente klandestina no diplomátika ninia luta labele la’o ba oin sé ita la iha Komandu Luta ida de’it. Hafoin ita nia aman nasionalismu Nicolau Lobato mate, Xanana Gusmão, Komandante-en-xefe FALINTIL, organija fila-fali forsa sira no hosi tinan 1981, hahú kaer lideransa no brane no dedikasaun tomak.
Biar hetan kaptura no dadur iha Cipinang, Xanana Gusmão hato’o nafatin povu nia mehi no hakarak hosi kadeia laran, Xanana Gusmão merese ita nia respeitu no estima. Ha’u hakarak mós foti aas hahalok Dr. Mari Alkatiri nian nu’udar fundadór nasionalismu no FALINTIL nian, merese mós foti aas Dr Jose Ramos Horta, veteranu ida ne’ebé mak sai lalenok ba ita nia luta libertasaun nasionál iha tasi-balun. Ha’u hakarak temi mós ita-nia veteranu seluk ida Dr Roque Rodrigues, ita-nia primeiru embaixador iha rai liur.
Iha tinan-24 nia laran, FALINTIL luta hasoru okupasaun ho apoiu uitoan liuhosi rai liur, tanba moris iha 1975 atu defende povu, FALINTIL konsege hala’o duni ninia kna’ar, biar ema barak mate no iha mudansa bebeik kona-ba oinsá organiza-an atu kontinua luta nafatin
Estadu iha devér atu rekoñese no valorize kontribuisaun hosi veteranus no kombatentes libertasaun nasionál no tenke mós garante protesaun espesiál liuhosi polítika insersaun sosiál no programa apoiu, iha área saúde, edukasaun, no formasaun tékniku-profesionál, empregu, asesu ba kréditu no liu hosi mós atividade atu bele hetan rendimentu. Atu bele hetan rendimentu objetivu rendementu sira ne’e, ita tenke fila fali estatutu ba veteranus kombatentes libertasaun nasionál.
Veteranu barak la hetan dala atu estuda iha eskola no universidade sira. Sira aprende iha ai-laran, dook hosi aldeia no sidade, sá kna’ar mak sira halo iha área edukasaun? Kna’ar boot tebtebes. Veteranu sira bele konta sira nia esperiénsia, pesial no kolletiva, susar sira ne’ebé sira hasoru, sira-nia kna’ar, saida mak sira sente, saida mak sira halo, sá esperiénsia vida mka halo sira sai forte liu no halo sira konsege aprende hosi sira-nia knar loro-loron nian! Esperiénsia sira nia ne’e mak forma karáter guerilleiru sira-nian no sira tenke hato’o ba joven sira.
Patriotism, solidariedade, korájen, espiritu misaun no vontade atu manán, la’ós valor sira ne’ebé veteranu de’it mak tenke iha, valór sira ne’e importante mós ba profisaun ne’ebé de’it no ba organizasaun públika ka privada sira atu funsiona ho di’ak. Ita-nia solidariedade ohin loron nian hatudu kompetisaun ne’ebé hali’is liuliu interese hanesan ho estadu no nasaun nian. Tanba ne’e, espíritu veteranu sira-nian, ne’ebé haburas iha luta tinan 24 nia laran, mak espíritu ida ne’ebé tenke hatama no hametin iha eskola sira, iha estadu, iha desportu, atu hetan beibeik susesu, atu bele la’o ba oin, iha ita-nia servisu ne’ebé de’it no iha ita-nia relasaun ho ema hotu-hotu.
Nasaun ne’ebé la fó valór ba ninia pasadu lahatene nia mai hosi ne’ebé no lahatene nia atu bá ne’ebé!
Estadu tenke tau aas bebeik sentimentu patriotism no tenke tau matan ba istória rezisténsia povu Timor-Leste nian hasoru okupasaun no oinsá ita loke odamatan ba mundu.
La iha povu ida bele haburas-an sein edukasaun. Ita nia joven sira presiza hatene oinsá ita manán fali ita-nia independénsia, oinsa ita halo funu, oinsá ita uza ita-nia matanek rasik atu hamosu buat foun, oinsá ita hanoin no halo planu ba ita-nia lala’ok sira. Liuliu kona-ba buat di’ak sira ne’ebé ita hamosu ho ita-nia hamosu ho ita-nia dedikasaun tomak, ita nia espíritu sakrifísiu, ita-nia vontade atu manán, ita-nia nesesidade atu haburas espíritu nasionalismu no patriotismu. Tanba ita halo omenájen ba loron eróis FALINTIL nian, ha’u hakarak aproveita loron ohin, halo tinan haat nulu resin rua, atu hatama iha ajenda nasionál knar foun ida, ne’ebé ha’u fó importánsia no valór estratéjiku ba vida jovens sira-nian no ba ita-nia povu tomak. Knaar foun ne’e mak Servisu Síviku Nasionál.
Tamba sosiedade ohin loron nian simu maka’as no babeibeik influénsia oioin hosi rai sira seluk, ita bele haree dadaun katak ema mós haliis liuliu ona ba sira-nia an rasik, la hanoin kaúza públika ka preukupasaun hotu-hotu nian, la iha sentimentu patriótiku, la iha sentiment katak ita ida-idak pertense ba povu ida, nasaun ida ba servisu Síviku nasionál ne’ebé loke dalabn ba integra joven sira, mane no feto, atu ida-idak fo ninia kbiit no matenek no aprende valór solidariedade ka fó-liman ba malu ba hadi’a no haburas rai ida ne’e, nu’udar sidadaun. Liuhosi knaar oioin ne’ebé estadu mak organiza, joven sira bele aprende mós valór sira ne’e.
Nune’e ha’u hato’o dezafiu foun ida ba governu foun, instituisaun sira, sosiedade sivíl, espesialista no personalidade relevante sira atu hahú iha nível nasionál, kona-ba servisu síviku nasionál, asuntu ida ne’ebé sei iha implikasaun iha estruturaa no vida institusionál estadu nian, tamba sei muda maka’as kultura no tradisaun atu hahú haree liuliu ba valór koletivu no interese estadu nian.
Povu iha de’it direitu atu harii estadu independente, se nia bele defende-an.
Atu bele hasoru ameasa, hamenus risku, hasees-an hosi violénsia armada no hatún presaun polítika, ita-nia nasaun tenke iha polítika ida ba defeza militár.
Ita-nia glorioza Forsas Armadas, FALINTIL-Forsas Defesa Timor-Leste (F-FDTL), ne’ebé mai no haburas-an hosi FALINTIL, hatudu ona saída mak forsas halo di’ak horiluk no sei halo ohin loron ho dedikasaun tomak. Iha prosesu hakfilak hosi FALINTIL ba F-FDTL, buat barak mai hosi vizaun no lideransa Major-Jeneral Taur Matan Ruak nian.
Ita iha Forsas Defesas atu serve Timor-Leste no timoroan sira, sira defende povu no estadu nia interese, iha momentu ne’ebé de’it, iha fatin ne’ebé de’it. Ezemplu rezisténsia FALINTIL nian hasoru okupasaun estranjeira mak inspirasaun bo baze ba F-FDTL haburas-an babeibeik.
Iha tinan sanulu resin lima ikus liu, iha akontesimentu barak iha rai li’ur no iha rai-laran, ne’ebé hamosu situasaun oioin iha rai-laran. Iha tinan hirak ne’e, F-FDTL, ho determinasaun, sakrifísiu no umildade, hatene hakat limitasaun no difikuldade ne’ebé hasoru iha dalan no ita-nia forsas fó-an tomak atu hakfilak dezafiu sira ba susesu.
Maibé atu bele kumpre ho di’ak sira-nia misaun, F-FDTL presiza ema sira ne’ebé fó laran tomak, kualifikadu ho ho treinu di’ak, ita presiza fó atensaun ba kualifikasaun, formasaun no profisionalizasaun ema nian atu instituisaun ne’e bele hamosu babeibeik lideransa kompetente, komandantes oin-foun ho kualifikasaun di’ak no nune’e, it abele halo tranzisaun neineik ho babeibeik entre líder sira hosi jerasaun tuan no líder sira hosi jerasaun foun.
Relasaun Timor-Leste hot asi bele fatór ida ba dezenvolvementu nasionál. Fronteira maritime loos ida bele fó benefisiu oioin no barak tebes ba ekonomia Timor-Leste nian. Haree ba importánsia ba ita-nia soberania no autoridade estadu nian, haree ba importánsia ba ita-nia soberania no autoridade estadu nian, Timor-Leste presiza harii Sistema Autoridade Marítima ida atu garante seguransa ba atividades ekonómikas ba ema sira ne’ebé hala’o kna’ar iha tasi laran no atu prezerva ita-nia rekursus, no mós atu hala’o vijilánsia no fiskalizasaun ba área sira ne’ebé tama iba soberania no juridisaun Timor-Leste nian. Ita hotu hanoin foufoun kedas katak importante tebes haburas F-FDTL. Ida ne’e ezijénsia nasionál ida ba ha’u, nuudar Prezidente Repúblika, ida ne’e kestaun boot tebes ida no ita tenke hala’o duni. Tamba ne’e, ita presiza haree nafatin dokumentu sira ne’ebé bele fó dalan ba hadi’a Forsa Defesa no Seguransa Nasionál, atu harii Sistema Autoridade Marítima ho hatama tan ekipamentu ba forsas tuir Lei Programasaun Militár no Infraestruturas.
Timor-Leste demokrátika hatudu foin lalais ne’e ninia maturidade polítika, sívika no vontade koletiva atu haforsa Estadu-de-Direitu Demokrátiku.
Prezidente Repúblika mak defensór principal ba Estadu-de-Direitu, estabilidade polítika no sosiál ho laran haksolok tebes mak ha’u akompaña prosesi diálogu ne’ebé hala’o ho espíritu patriótiku aas, atu buka-hetan konsensu nasionál ida molok harii Governu Konstitusionál foun ba Timor Leste, governu ida ne’ebé hakoak ema hotu, ne’ebé metin, no ukun atu hatán ba povu ninia hakarak.
Timor-Leste labele haluha ninia oan sira ne’ebé mate ba rai ida ne’e.
Ba militár sira hotu, veteranu sira, mártir sira no família sira ne’ebé fó sira-nia vida ba libertasaun Timor Leste no simu sakrifísiu luta nian, ha’u husu atu simu omenájen hosi Estadu no Povu tomak.
FALINTIL-FDTL, nu’udar erdeiru FALINTIL nian, ne’ebé simu devér espesiál atu defende, onra no promove valór sira iha ita-nia sosiedade laran, bele sente orgullu ba hahalok hotu-hotu ne’ebé halo ona no sei halo ba ita-nia rai doben. Timor-Leste no Timoroan hotu-hotu tenke hatudu respeitu no gratidaun ba FALINTIL-FDTL.
Nu’udar Prezidente Repúblika no Komandante Supremu, Ha’u hato’o omenájen no respeitu F-FDTL ho povu Timor-Leste tomak nia naran.
Prezidente-da-Repúblika Francisco Guterres Lú Olo, nia diskursu iha loron FALINTIL halo tinan-42, Loron-20 Fulan-Agostu.
19/11/2019
24/09/2017
22/08/2017
03/02/2017
04/12/2016
04/12/2016
21/11/2016
05/11/2016
28/09/2016
21/08/2016