National Sports Council of Tanzania

vishale yaagwa

#Mashindano ya Vishale Afrika Masharika# *Wazazi watakiwa kuwapa watoto wao nafasi ya kushiriki michezo mbalimbali* Afisa Michezo wa Baraza la Michezo la Taifa (BMT) Charles Maguzu amewaasa wazazi kutokuwa wabaguzi wa michezo ambayo wanataka watoto wao washiriki badala yake wawaruhusu watoto hao kushiriki michezo mbalimbali ikiwemo mchezo wa Vishale (Darts). Maguzu ameyasema hayo siku ya leo Novemba 09, 2023 wakati wa hafla ya kukabidhi bendera kwa kikosi cha timu ya Taifa ya Mchezo wa vishale ambacho kinatarajiwa leo kwenda jijini Mombasa nchini Kenya kwa ajili ya kushiriki kwenye mashindano ya Afrika Mashariki yanayoanza tarehe 10 hadi Novemba 12, 2023. Maguzu alisema kuwa matarajio ya Serikali ni kwamba kikosi hicho kitarudi na ushindi na kueleza kwamba wana imani wachezaji waliopata fursa wamepatikana kihalali na watakwenda kufanya vizuri na kurudi na ushindi. "Kwa niaba ya Serikali tuwapongeze viongozi kwa juhudi za kukuza mchezo huu na wadhamini waendelee kuwaamini na kuwashika mkono na kuwataka wakafanye vizuri katika mashindano hayo," alisema Maguzu . Aidha, ametoa rai kwa viongozi wa mchezo huo kuhakikisha unaenea kwenye maeneo mbalimbali na kuchezwa katika ngazi ya shule Ili kupata wachezaji wengi watakaoshiriki Mashindano ya ndani na kimataifa. Naye Nahodha wa timu yaTaifa ya Mchezo huo Johakim Mollel, àmesema wamejipanga kufanya vizuri katika mashindano hayo na kueleza kuwa, wanakwenda kupambana, kushindana na sio kushiriki katika mashindano hayo. Msafara wa kikosi hicho unaundwa na watu nane wakiwemo wachezaji sita wanaume wakiwa wanne ambao ni Noah Issa, Johakim Mollel, Yohana Kisau na John Mlay huku wanawake wakiwa wawili Happynes Modah na Irene Kihupi sambamba na viongozi wawili. Mashindano hayo yatahusisha nchi tano ikiwemo mwenyeji Kenya, Uganda Tanzania, Rwanda na Burundi.

Vyama na Mashirikisho watakiwa kuhakiki taarifa zao

Vyama na Mashirikisho watakiwa kuhakiki taarifa zao

Msimu wa Tano wa Mashindano ya Riadha ya Wanawake Novemba 24 - 26, 2023 Jijini Dar es salaam.

Katibu Mkuu Msigwa ateta na Mabondia

Katibu mkuu wa Wizara ya Sanaa, Utamaduni na Michezo, Gerson Msigwa mapema asubuhi ya Novemba Mosi amekutana mabondia walioshinda mapambano yao ya mikanda ya ubingwa wa Baraza la Ngumi Duniani, WBC na ubingwa wa Kamisheni ya Ngumi za Kulipwa nchini TPBRC katika ofisi za Baraza la Michezo BMT.

Mabondia hao ambao ni Fadhili Majiha aliyeshinda mkanda wa Ubingwa wa WBC Afrika alioshinda kwa kumshinda Bongani Mahlangu wa Afrika Kusini wakati Pius Mpenda akishinda mkanda wa WBC Peace nchini Uturuki kwa kumchapa Dauren Yeleussino wa Kazakhstan huku Ibrahim Class akishinda ubingwa wa Taifa wa TPBRC dhidi ya Xiao Tau Su wa China.

Msigwa amewataka mabondia hao kuhakikisha wanaweza kujitunza ili waendelee kufanya vizuri katika mapambano yao wanayocheza kimataifa huku akitoa ahadi ya serikali chini ya Rais Dkt. Samia Suluhu Hassan kuendelea kuwaunga mkono kwenye mchezo huo.

Katibu Mkuu wa Wizara ya Utamaduni, Sanaa na Michezo Gerson Msigwa akipokea taarifa fupi ya BMT kutoka kwa Katibu Mtendaji Bi. Neema Msitha leo Novemba 01, 2023 wakati alipokutana na Menejimenti ya Baraza hilo akiwa katika ziara yake ya kwanza katika taasisi hiyo baada ya kuteuliwa na Mhe. Rais wa awamu sita Dkt. Samia Suluhu kuongoza Wizara hiyo.

Katibu Mkuu Gerson Msigwa Novemba Mosi, 2023 akiwa katika picha ya pamoja na watumishi wa Baraza la Michezo la Taifa (BMT) wakati wa ziara yake kikazi katika Taasisi hiyo inayosimamia michezo siku chache baada ya kuteuliwa na Mhe. Rais Dkt. Samia Suluhu Hassan kuongoza Wizara ya Utamaduni, Sanaa na Michezo.