Ofisi ya Taifa ya Ukaguzi

05/10/2026

CAG ATOA TUZO MAALUMU KWA WAKAGUZI WALIOFANYA VIZURI KWENYE UKAGUZI WA MWAKA WA FEDHA 2024/25.

Mdhibiti na Mkaguzi Mkuu wa Hesabu za Serikali (CAG), Bw. Charles E. Kichere, ametoa tuzo kwa Wakaguzi waliofanya vizuri katika Tuzo za CAG za Kazi Bora za Ukaguzi kwa Mwaka wa Fedha 2024/25, katika hafla iliyofanyika Oktoba 5, 2026, Makao Makuu ya NAOT, Dodoma.

Katika kipengele cha Ukaguzi wa Fedha na Uzingatiaji (Financial and Compliance Audit), nafasi ya kwanza imekwenda kwa timu iliyofanya Ukaguzi wa matumizi ya Mamlaka ya Mapato Tanzania (TRA) kwa Mwaka wa Fedha 2024/25.

Nafasi ya pili katika kipengele cha Ukaguzi wa Fedha na Uzingatiaji (Financial and Compliance Audit) imekwenda kwa timu iliyofanya Ukaguzi wa Halmashauri ya Wilaya ya Kilosa kwa Mwaka wa Fedha 2024/25.

Kwa upande wa kipengele cha Ukaguzi wa Ufanisi na Ukaguzi Maalumu, tuzo ya mshindi imekwenda kwa timu iliyofanya Ukaguzi katika Mamlaka ya Udhibiti wa Huduma za Nishati na Maji (EWURA), kuhusu utekelezaji wa miradi ya nishati jadidifu inayohusisha nishati ya jua, upepo na bayogesi kwa Mwaka wa Fedha 2024/25.

Tuzo hizo, zinalenga kutoa motisha kwa Wakaguzi ili kuendelea kuimarisha ubora wa kazi za Ukaguzi, pamoja na kutambua na kuthamini ubora, uadilifu na ubunifu katika utekelezaji wa kazi za Ukaguzi.

Pichani ni baadhi ya matukio yaliyojiri wakati wa hafla ya utoaji wa tuzo.

25/09/2026

UKAGUZI, UFUATILIAJI NA TATHMINI KUIMARISHA MAENDELEO KWA WANANCHI

Wadau wanaoshiriki kwenye Kongamano la Tano la Kitaifa la Ufuatiliaji na Tathmini (MEL) wameeleza kuwa kazi za Ukaguzi zinazofanywa na Mdhibiti na Mkaguzi Mkuu wa Hesabu za Serikali (CAG), zina mchango mkubwa katika kuimarisha shughuli za ufuatiliaji na tathimini (monitoring and evaluation) sambamba na kuimarisha uwazi na uwajibikaji katika usimamizi wa rasilimali za umma.

Maoni hayo yametolewa na baadhi ya Wadau wanaoshiriki katika Kongamano la Tano la Kitaifa la Ufuatiliaji na Tathmini (MEL) wakati walipotembelea Banda la Ofisi ya Taifa ya Ukaguzi (NAOT) katika kongamano la hilo linalofanyika kuanzia Septemba 22 hadi 26, 2026 jijini Arusha.

Akitoa maoni yake mara baada ya kutembelea Banda la NAOT, Bw. Emmanuel Mallya kutoka Chuo Kikuu Huria cha Tanzania (OUT) amesema kupitia elimu na mijadala ya Kongamano hilo ameongeza uelewa kuhusu nafasi ya kazi za Ukaguzi na mchango wa Ripoti za Ukaguzi wa CAG katika kuwezesha kazi za tathimini na ufuatiliaji.

Kwa upande wake, Bw. James Mallya kutoka Tume ya Usuluhishi na Uamuzi (CMA) amesema uwazi wa taarifa za Ukaguzi unatoa fursa muhimu kwa Wadau wote katika mnyororo wa uwajibikaji nchini kushirikiana kwa pamoja katika usimamizi wa uwajibikaji hususani kupitia kazi za ufuatiliaji na thathimini.

Jambo hilo limeungwa mkono na Bi. Levina Tobias kutoka Ofisi ya Mageuzi ya Kilimo (ATO) ambae amesema mada ya Ukaguzi wa Ufanisi katika Kongamano hilo imemsaidia kuelewa uhusiano baina ya Ukaguzi wa Ufanisi na masuala ya Ufuatiliaji na Tathmini, pamoja na umuhimu wa kutumia taarifa za Ukaguzi katika kuboresha utendaji na usimamizi wa rasilimali za umma.

Katika picha ni matukio mbalimbali kuhusiana na Kongamano hilo.

07/09/2026

01/09/2026

WAKAGUZI NAOT WASHIRIKI WARSHA YA KIKANDA YA AFRIKA MASHARIKI KUIMARISHA UBORA NA UKAGUZI

Wakaguzi kutoka Ofisi ya Taifa ya Ukaguzi (NAOT) wanashiriki katika Warsha maalumu ya Kikanda ya Afrika Mashariki jijini Arusha, inayolenga kuimarisha Usimamizi wa Ubora na Ukaguzi wa Utendaji katika Taasisi Kuu za Ukaguzi (SAIs).

Akizungumza wakati wa kufungua warsha hiyo kwa niaba ya Mdhibiti na Mkaguzi Mkuu wa Hesabu za Serikali (CAG), Mkurugenzi wa Utawala na Menejimenti ya Rasilimali Watu, Bw. Novati Mfalamagoha, amesema kuwa ushirikiano wa Ukaguzi Kikanda ni nguzo muhimu katika kukabiliana na changamoto zinazofanana zinazozikabili Taasisi Kuu za Ukaguzi ndani ya Afrika Mashariki na kwamba fursa hii ni muhimu kwa Wakaguzi kubadilishana ujuzi na uzoefu ili kuzidi kujenga mifumo imara ya usimamizi wa ubora wa Ukaguzi.

Warsha hiyo inawakutanisha Wakaguzi kutoka Mataifa ya Tanzania, Kenya, Rwanda na Uganda, pamoja na wawezeshaji kutoka Ofisi ya Taifa ya Ukaguzi ya Sweden inalenga pamoja na masuala mengine kubadilishana uzoefu ili kuzidi kuzijengea uwezo Taasisi Kuu za Ukaguzi za Afrika Mashariki katika maeneo mbalimbali k**a vile kuimarisha mifumo ya Ukaguzi.

25/08/2026

Heri ya Sikukuu ya Maulid.

20/08/2026

CAG NA OFISI YA UKAGUZI YA IRAN WAFANYA MAZUNGUMZO YA USHIRIKIANO WA KAZI ZA UKAGUZI WAKATI WA MKUTANO WA 19 WA MWAKA WA INTOSAI WGFACML, ARUSHA

Mdhibiti na Mkaguzi Mkuu wa Hesabu za Serikali (CAG) wa Jamhuri ya Muungano wa Tanzania, Bw. Charles E. Kichere na Naibu Rais wa Taasisi Kuu ya Ukaguzi ya Jamhuri ya Kiislamu ya Iran (Supreme Audit Court of the Islamic Republic of Iran-SAC), Bw. Esmaeil Zarei Koosha, wamefanya mkutano maalumu jijini Arusha, wakati wa Mkutano wa 19 wa Mwaka wa Kikundi Kazi cha INTOSAI cha Kupambana na Rushwa na Utakatishaji Fedha (WGFACML) ambapo kwa pamoja wamejadili na kubadilishana uzoefu wa kazi za Ukaguzi.

Ujumbe wa NAOT uliongozwa na CAG, Bw. Charles E. Kichere, huku ujumbe wa Iran ukiongozwa na Naibu Rais wa SAC, Bw. Esmaeil Zarei Koosha na Balozi wa Jamhuri ya Kiislamu ya Iran nchini Tanzania, Mhe. Mohammad Javad HemmatPanah, pamoja na Wabunge wa Bunge la Jamhuri ya Kiislamu ya Iran na Maafisa waandamizi wa SAC.

Katika mazungumzo hayo, pande zote mbili zilijadili namna ya kuimarisha ushirikiano kati ya Taasisi hizo Kuu za Ukaguzi katika maeneo yenye maslahi ya pamoja yanayohusu ukaguzi wa sekta ya umma.

Akizungumza katika mkutano huo, CAG amesisitiza dhamira ya NAOT ya kujenga ushirikiano wenye tija na unaolenga matokeo na Taasisi Kuu za Ukaguzi kutoka mataifa mbalimbali. Amebainisha kuwa mkutano huo umeweka msingi wa uhusiano wenye matarajio makubwa ya ushirikiano kati ya NAOT na SAC.

19/08/2026

CAG AWAKARIBISHA WASHIRIKI WA MKUTANO WA KIMATAIFA WA 19 WA WGFACML JIJINI, ARUSHA

Mdhibiti na Mkaguzi Mkuu wa Hesabu za Serikali (CAG), Bw. Charles E. Kichere amewakaribisha washiriki wa mkutano unaofanyika jijini Arusha, Tanzania, kuanzia tarehe 18 hadi 20 Agosti 2026, unaolenga kuimarisha ushirikiano na kubadilishana uzoefu katika mapambano dhidi ya rushwa, utakatishaji fedha (money laundering) na masuala mengine yanayohusiana na uadilifu na uwajibikaji katika usimamizi wa rasilimali za umma.

Mkutano huo wa 19 wa Mwaka wa Kikundi Kazi cha INTOSAI cha Kupambana na Rushwa na Utakatishaji Fedha (WGFACML) unawakutanisha wawakilishi wa Taasisi Kuu za Ukaguzi (Supreme Audit Institutions), Taasisi ya Kuzuia na Kupambana na Rushwa (TAKUKURU), Mamlaka ya Udhibiti wa Ununuzi wa Umma Tanzania (PPRA) pamoja na Wadau mbalimbali wa Utawala Bora na mapambano dhidi ya Rushwa.

Miongoni mwa Viongozi na wageni wanaoshiriki ni pamoja na Mkuu wa Sekretarieti ya WGFACML, Bw. Ahmed Almongy ambae anamwakilisha Rais wa Taasisi Kuu ya Ukaguzi ya Misri (ASA) na Mwenyekiti wa WGFACML, Balozi wa Jamhuri ya Kiislamu ya Iran nchini Tanzania, Mhe. Mohammad Javad HemmatPanah, Naibu Mkurugenzi Mkuu wa TAKUKURU, Bi. Neema Mwakalyelye pamoja na Mkurugenzi Mkuu PPRA, Bw. Dennis Simba.

Mkutano huo ambao unahudhuriwa na wawakilishi wa Taasisi Kuu za Ukaguzi kutoka nchi mbalimbali Duniani unajikita katika kujadili namna ya kutoa mapendekezo ya kiukaguzi yatakayoimarisha mifumo ya kuzuia na kupambana na rushwa na utakatishaji fedha, pamoja na kukuza uwazi, uwajibikaji na matumizi sahihi ya rasilimali za umma. PPRA_Tanzania TAKUKURU.TZ CAG