07/10/2026
*UDHIBITI WA EWURA KATIKA EACOP WAVUTIA WABUNGE WA UGANDA*
Kamati ya Mazingira na Maliasili ya Bunge la Uganda imevutiwa na namna Mamlaka ya Udhibiti wa Huduma za Nishati na Maji (EWURA) inavyosimamia ushiriki wa wazawa katika Mradi wa Bomba la Mafuta Ghafi la Afrika Mashariki (EACOP).
Ujumbe wa Kamati hiyo, ukiongozwa na Makamu Mwenyekiti wake, Mheshimiwa Ann Maria Nankabirwa, umetembelea EWURA kwa lengo la kujifunza na kubadilishana uzoefu kuhusu udhibiti wa mradi huo unaohusisha Tanzania na Uganda.
Majadiliano yamejikita katika kuwezesha wananchi na kampuni za ndani kunufaika na fursa za ajira, utoaji wa bidhaa na huduma, pamoja na ukuzaji wa ujuzi.
Mheshimiwa Nankabirwa amesisitiza umuhimu wa kutenga bajeti ya kutosha ili EWURA na Mamlaka ya Petroli ya Uganda (PAU) ziweze kufanya kaguzi za pamoja mara kwa mara kwa kuzingatia mpango wa ukaguzi. Ameeleza kuwa hatua hiyo itaimarisha ufuatiliaji wa utekelezaji wa masharti ya ushiriki wa wazawa katika mradi.
Kwa upande wake, Kaimu Mkurugenzi Mkuu wa EWURA, Gerald Maganga, ameishukuru Kamati kwa ziara na maoni yaliyotolewa, akieleza kuwa Mamlaka itafanyia kazi hoja na maoni yote ili kuboresha usimamizi wake.
Ziara hiyo imeimarisha ubadilishanaji wa uzoefu na ushirikiano katika kuhakikisha utekelezaji wa EACOP unaleta manufaa kwa wananchi wa nchi hizi mbili.
