Bodi ya Usajili wa Wataalam wa Mipangomiji -TPRB

Karibuni Wakurugenzi wa Makampuni ya Upangajimiji

KARIBUNI KAMPUNI ZA MIPANGOMIJI

*TPRB YAKUTANA NA WATAALAMU WA MIPANGOMIJI MKOA WA IRINGA, YAWAHIMIZA KUZINGATIA MAADILI NA VIWANGO VYA TAALUMA*

Uongozi wa Bodi ya Usajili wa Wataalam wa Mipangomiji (TPRB) umefanya kikao kazi na Maafisa na Wataalam wa Mipangomiji wa Mkoa wa Iringa kikiwa na lengo la kukumbushana masuala muhimu yanayohusu taaluma ya Mipangomiji.

Kikao hicho ambacho kimefanyika leo Alhamisi Februari 05, 2026 mkoani Iringa kimeongozwa na Kaimu Msajili wa TPRB, TP. Martha Mkupasi.

Akizungumza katika kikao hicho, TP. Mkupasi ambaye aliambatana na wataalamu wa kutoka TPRB, amewahimiza wataalam hao kuzingatia maadili ya taaluma, sheria, kanuni na miongozo inayosimamia taaluma ya mipangomiji, amesisitiza kuwa utekelezaji wa majukumu yao una mchango mkubwa katika uendelevu na ustawi wa jamii.

Kikao hicho ni mwendelezo wa utakelezaji wa mikakati ya TPRB ya kuhakikisha wataalamu na kampuni za mipangomiji zinazingatia sheria, kanuni na miongozo katika utoaji wa huduma.

TAARIFA KWA UMMA

WATUMISHI WA TPRB WASHIRIKI ZOEZI LA UPANDAJI MITI KUMTAKIA 'HAPPY BIRTHDAY' RAIS SAMIA

Watumishi wa Bodi ya Usajili wa Wataalam wa Mipangomiji (TPRB) wameungana na Watanzania wengine katika zoezi la upandaji miti, ikiwa ni sehemu ya kumtakia heri ya Siku ya Kuzaliwa Rais wa Jamhuri ya Muungano wa Tanzania, Mheshimiwa Dkt. Samia Suluhu Hassan, pamoja na kuendeleza ajenda ya ulinzi wa mazingira kwa maendeleo endelevu ya Taifa.

Zoezi hilo limefanyika leo Jumanne, Januari 27, 2026, katika Ofisi za TPRB zilizopo Mji wa Serikali Mtumba jijini Dodoma, ambapo watumishi walipanda miti mbalimbali ikiwa ni mkakati wa kuhifadhi na kulinda mazingira ikiwa ni kutekeleza kauli mbiu ya ‘ Uzalendo ni Kutunza Mazingira, Shiriki Kupanda Miti'

Kampeni hiyo ya upandaji miti ni sehemu ya kuunga mkono maono ya Rais Samia ya kulinda na kuhifadhi mazingira ikiwa inaakisi upangaji miji endelevu unaoendana na uhifadhi wa mazingira na rasilimali asilia, ambapo kabla ya watumishi wa TPRB kushiriki zoezi hilo lilizinduliwa na Waziri wa Ardhi, Nyumba na Maendeleo ya Makazi Mhe. Dkt Leonard Akwilapo na Naibu wake Mhe. Kaspar Mmuya kwenye Ofisi za Wizara zilizopo eneo la Mtumba jijini Dodoma.

_
_
_

TPRB YATOA TUZO KWA WANAFUNZI WATATU VINARA CHUO KIKUU ARDHI

Bodi ya Usajili wa Wataalam wa Mipangomiji (TPRB) imetoa tuzo kwa wanafunzi watatu waliofanya vizuri zaidi katika somo la Taaluma ya Mipangomiji (Professional Practice) katika Chuo Kikuu Ardhi (Ardhi University), ikiwa ni sehemu ya jitihada zake za kutambua na kuhamasisha wanafunzi kufanya vizuri zaidi na kuwa na wataalamu wenye weledi wa hali ya juu katika taaluma ya Mipangomiji.

Tuzo hizo zimetolewa tarehe 16/12/2025 katika hafla ya utoaji tuzo za kitaaluma iliyofanyika katika Jengo la Arch Plaza, Chuo kikuu Ardhi. Mgeni Rasmi katika utoaji wa tuzo hizo alikuwa Prof. Evaristo Joseph Liwa, Makamu Mkuu wa Chuo Kikuu Ardhi.

Tuzo hizo zimetolewa kwa wahitimu wa mwaka 2025 wa shahada ya kwanza, katika fani tatu tofauti za mipangomiji k**a mwendelezo wa dhamira ya Bodi hiyo ya kuhamasisha ubora, nidhamu, uadilifu na weledi miongoni mwa wanafunzi wanaoingia soko la ajira na kufanya kazi za taaluma ya mipangomiji nchini.

Wahitimu hao walitunukiwa tuzo maalum ijulikanayo k**a “TPRB Final Year Best Student in Professional Practice Subject Award 2025”, baada ya kuonyesha kiwango cha juu cha ufaulu katika mwaka 2025. Kupitia tuzo hizo, TPRB inalenga kuwatia moyo wanafunzi kujenga misingi imara katika taaluma ya mipangomiji.

Tuzo hizo zilikabidhiwa na Afisa Mipangomiji Mwandamizi, TP. Mdoe Mjema kwa niaba ya Msajili wa Bodi ya Usajili wa wataalamu wa Mipangomiji.

Wahitimu waliotunukiwa tuzo hizo ni pamoja na Mary Jonas aliyekuwa akifanya kozi ya BSc. Housing and Infrastructure Planning; Doreen Litayunga kozi ya BSc. Regional Development Planning; pamoja na Leonel P Mollel aliyefanya kozi ya BSc. Urban and Regional Planning.

UMEHUISHA LESENI?

KAMATI YA ELIMU, MAFUNZO NA WELEDI YA TPRB YAFANYA KIKAO CHA USAJILI WA WATAALAMU WAPYA WA MIPANGOMIJI

Kamati ya Elimu, Mafunzo na Weledi ya Bodi ya Usajili wa Wataalam wa Mipangomiji (TPRB) imefanya kikao chake cha 37 kujadili maombi ya usajili wa wataalamu wapya wa mipangomiji kwa kipindi cha robo ya kwanza kwa mwaka wa fedha 2025/2026.

Kikao hicho cha siku mbili kimeanza Jumatatu Oktoba 13, 2025 katika Ofisi za Bodi zilizopo Mji wa Serikali Mtumba, jijini Dodoma na kuhitimishwa leo Jumanne.

Kikao hicho kimeongozwa na Mwenyekiti wa Kamati, TP. Dkt. Regina John na Katibu ambaye ni Kaimu Msajili wa TPRB, TP. Martha Mkupasi, ambapo wajumbe walipokea na kujadili maombi 21 ya usajili wa wataamu wapya wa mipangomiji.

Pia, kikao hicho kilipokea na kilijadili mwenendo wa utekelezaji wa majukumu ya kusimamia taaluma na maendeleo ya taaluma, changamoto zilizojitokeza pamoja na mikakati ya kuboresha weledi na ufanisi katika taaluma ya mipangomiji.

Miongoni mwa taarifa zilizowasilishwa ni mapendekezo ya utatuzi wa changamoto za uendelezaji wa viwanda katika Mkoa wa Pwani.

Aidha, kikao hicho kilipokea taarifa ya uchambuzi wa kina wa namna ya kuwapatia mafunzo wataalamu wa mipangomiji ambao hawakupata fursa ya kupitia module za mafunzo kwa vitendo ili kuinua uwezo wao katika kutekeleza majukumu ya mipangomiji na kuwapatia sifa za kuweza kusajiliwa kwa kuzingatia mahitaji ya soko la ajira.

Mwenyekiti wa Kamati, TP. Dkt. Regina John, aliwapongeza wajumbe kwa uchambuzi makini wa hoja mbalimbali na kuhimiza kuendelea kuweka mkazo katika kuinua ubora wa elimu, mafunzo na weledi katika fani ya mipangomiji, akisisitiza kuwa taaluma hiyo ni nguzo muhimu katika maendeleo endelevu ya miji na vijiji nchini.