12/10/2026
DC KAMBANGWA APONGEZA JITIHADA ZA KAMATI YA MAAFA KATIKA KUJIWEKA TAYARI KUKABILIANA NA ATHARI ZA MVUA ZA EL NIÑO
Mkuu wa Wilaya ya Mbulu, Mhe. Mbwana Kambangwa, amepongeza jitihada zinazochukuliwa na Kamati ya kukabiliana na Maafa ya Halmashauri ya Wilaya katika kubaini maeneo hatarishi na kuandaa mikakati ya kukabiliana na athari zinazoweza kusababishwa na mvua za El Niño.
Mhe. Kambangwa ametoa pongezi hizo leo tarehe 12/10/2026 wakati wa ziara ya kutembelea maeneo yenye changamoto ndani ya Wilaya ya Mbulu, akiwa ameambatana na Katibu Tawala wa Wilaya, Kamati ya Usalama ya Wilaya, Mkurugenzi Mtendaji wa Halmashauri pamoja na timu ya kukabiliana na maafa, kwa lengo la kujionea hali halisi ya maeneo hayo na kutathmini hatua zinazochukuliwa katika kujiandaa kukabiliana na athari za mvua kubwa.
Akizungumza wakati wa ziara hiyo, Mkuu wa Wilaya alisema, “Nipongeze jitihada mlizochukua na mnazoendelea kuchukua kwa kuainisha maeneo hatarishi na kutoa uelewa kwa wananchi. Elimu iendelee kutolewa kupitia mikutano ya vijiji ili wananchi wafahamu namna ya kujikinga na kuchukua tahadhari dhidi ya athari zinazoweza kusababishwa na mvua kubwa.”
Aidha, amesisitiza umuhimu wa kuendelea kutoa elimu kwa wananchi kuhusu maeneo hatarishi, kuzingatia taarifa za tahadhari zinazotolewa na mamlaka husika na kuchukua hatua mapema ili kupunguza uwezekano wa kutokea kwa madhara kwa maisha ya watu, mali na miundombinu.
Mkuu wa Wilaya ameeleza kuwa ushirikiano kati ya viongozi, wataalamu na wananchi ni muhimu katika kuimarisha maandalizi ya kukabiliana na maafa. Hivyo, ameitaka Kamati ya kukabiliana na Maafa kuendelea kuratibu hatua za tahadhari na kuhakikisha elimu inawafikia wananchi kupitia mikutano ya vijiji na njia nyingine za mawasiliano.
Timu ya kukabiliana na maafa inaendelea kushirikiana na viongozi na wadau husika katika kubaini changamoto zilizopo katika maeneo mbalimbali na kuhamasisha wananchi kuchukua hatua za kujikinga na athari za mvua kubwa.
