10/13/2026
SIGA KEI VANUASO
“Nida tu vata e vuvu na wai” na cakacakavata kei na duavata ena rawati vakavinaka kina na veika era tuvatuvakā kina na lewe i Vanuaso; qo e dua na mala ni Vosa e rogo toka ena kena qaravi na Soqo ni Siga kei Vanuaso ka vakayacori ena koro o Vanuaso, Gau, Lomaiviti ena ika9 ni Okotova, 2026.
Na inaki levu ga ni soqo qo ena nodra mai duavata na Yavusa e va, ena kumuni soli me tarai cake kina na nodra valenilotu. E va taucoko na Yavusa ena lomanikoro o Vanuaso: Yavusa Turaga, Yavusa Qalitu ratou Batibalavu, Yavusa Qalilevu Batileka kei na Yavusa Nasoqo eratou Tunidau/Gonedau.
Na soqo qo era bau tuvalaka tale ga me siga tale ga ni nodra mai vakaraitaka kina na veika era kilai tani kina, oya ena vakaraitaki cakacakaniliga mai na voivoi kei na niu, kakana vakaviti, serenivanua, vakatunuloa, buiniga kei na vosa.
Bau tiki tale ga ni soqo qo na nodra mai marautaka na gonevuli e Mateiwelagi na siga ni tugalala e Viti, ra bau vakaraitaka tale tu ga eso na qito Vakaviti na “coka vuvu”, vakaraitaki isulusulu, vosa kei na serekali.
Nida raica lesu na soqo e qaravi, qaravi na tau soli vakaYavusa kei na kena veisisivi eso era dui mai vakaraitaka.
Ena veisisivi :
1) Buiniga ratou taura na ulu ni icovi na Yavusa Qalitu;
2) Serenivanua: Yavusa Nasoqo (Tunidau);
3) Vakatunuloa: Yavusa Nasoqo (Tunidau)
4) Kakana Vakaviti: Yavusa Nasoqo (Tunidau);
5) Cakacakaniliga Voivoi : Yavusa Turaga;
6) Cakacakaniliga Niu: Yavusa Nasoqo (Tunidau);
7) Veisisivi Vosa: Yavusa Nasoqo (Tunidau).
