11/03/2026
إذا حكتلك زوجتك ( عادي)
مش دايماً معناها عادي!
خلينا احكيلك شو ممكن يكون ورا بعض الكلمات اللي بنسمعها في العلاقة الزوجية:
1. لما تحكيلك: عادي
ممكن تكون زعلانة ومستنية منك تنتبه وتسألها شو فيها مش تمر عن الموضوع وكأنه ما صار إشي
جرب تحكيلها:
حاسس إنك متضايقة في إشي حابة تحكيلي عنه؟
2. لما تحكيلك: براحتك
ممكن تكون مشكلتها مش بالقرار نفسه ممكن كانت بتتمنى تشاركها فيه وتحس إن رأيها مهم عندك
جرب تحكيلها:
رأيك بهمني خلينا نحكي بالموضوع ونقرر مع بعض
3. لما تحكيلك: ولا يهمك
ممكن تكون انزعجت من موقف لكن مش حابة تدخل بنقاش أو تعاتبك في هاللحظة
جرب تحكيلها:
بعرف إنه ممكن يكون الموقف ضايقك وبهمني أعرف شو حسيتي
4. لما تحكيلك: خلص انسى الموضوع
ممكن تكون تعبت من النقاش أو حست انكم مش فاهمين بعض
جرب تحكيلها:
خلينا نهدى شوي بس ما بدي نترك الموضوع بدون ما نفهم بعض
5. لما تحكيلك: ما في إشي
ممكن تكون مش جاهزة تحكي أو مش عارفة كيف تعبر عن اللي مضايقها
جرب تحكيلها:
تمام مش رح أضغط عليك بس لما تحبي تحكي انا جاهز
💚 بس انتبه لنقطة مهمة:
مش كل (عادي) معناها زعل ومش كل (براحتك) وراها عتب
إحنا مش مطلوب منا نقرأ أفكار بعض ولا نتوقع من الطرف الثاني يفهم كل إشي من دون ما نحكي
العلاقة الصحية بدها طرف ينتبه ويسأل وطرف يتعلم يعبر عن مشاعره بوضوح
التفاهم مش إنك تعرف شو بقلب شريكك من كلمة
💜التفاهم إنك تهتم تعرف وتسأل وتسمع💜
احكيلي بصراحة:
أي كلمة من هدول بتستخدميها أكثر لما تكوني زعلانة؟ (عادي ولا براحتك ولا ما في اشي….؟
ابعتي البوست لشريكك يمكن يفتح بينكم حوار💚
#عزيزة #زواج #استشارة #اهتمام
