Royal Embassy of Cambodia to Vietnam

នៅរសៀលថ្ងៃទី១២ ខែធ្នូ ឆ្នាំ២០២៥ កញ្ញា យ៉ាន សាក់សេដ្ឋា លេខាធិការទី១ នៃស្ថានទូតកម្ពុជាប្រចាំសាធារណរដ្ឋសង្គមនិយមវៀតណាម បានទៅទទួលស្វាគមន៍ និស្សិតអាហារូបករណ៍កម្ពុជា ចំនួន១០០នាក់ នៅព្រលានយន្តហោះអន្តរជាតិណយបៃ ដែលត្រូវមកបន្តការសិក្សាថ្នាក់បរិញ្ញាបត្រនៅសាធារណរដ្ឋសង្គមនិយមវៀតណាម។

កម្ពុជា-វៀតណាម ឯកភាពបន្តជំរុញទំនាក់ទំនង និងកិច្ចសហប្រតិបត្តិការទ្វេភាគី ឱ្យកាន់តែរឹងមាំ

នារសៀលថ្ងៃទី២៨ ខែវិច្ឆិកា ឆ្នាំ២០២៥, សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានអនុញ្ញាតឱ្យ ឯកឧត្តម Bui Thanh Son ឧបនាយករដ្ឋមន្ត្រីនៃសាធារណរដ្ឋសង្គមនិយមវៀតណាម ចូលជួបសម្ដែងការគួរសម និងពិភាក្សាការងារ នៅវិមានសន្តិភាព។

ក្នុងឱកាសនៃជំនួប, ឯកឧត្តមឧបនាយករដ្ឋមន្ត្រីនៃសាធារណរដ្ឋសង្គមនិយមវៀតណាម បានថ្លែងអំណរគុណយ៉ាងជ្រាលជ្រៅចំពោះសម្ដេចបវរធិបតី ដែលបានអនុញ្ញាតឱ្យរូបឯកឧត្តម និងគណៈប្រតិភូ ចូលជួបសម្ដែងការគួរសម និងពិភាក្សាការងារ នាឱកាសនេះ។ ជាមួយគ្នានេះ, ឯកឧត្តមឧបនាយករដ្ឋមន្ត្រី ក៏បានកោតសរសើរ និងវាយតម្លៃខ្ពស់ចំពោះការសម្រេចបាននូវសមិទ្ធផលជាច្រើនរបស់កម្ពុជា នាពេលកន្លងមក និងមានជំនឿយ៉ាងមុតមាំថា ក្រោមការដឹកនាំប្រកបដោយភាពឈ្លាសវៃ និងចក្ខុវិស័យវែងឆ្ងាយរបស់សម្ដេចបវរធិបតី កម្ពុជានឹងបន្តសម្រេចបាននូវសមិទ្ធផលថ្មីៗ ក៏ដូចជាការអភិវឌ្ឍប្រទេសជាតិកាន់តែរីកចម្រើនបន្ថែមទៀត។ ចំពោះទំនាក់ទំនង និងកិច្ចសហប្រតិបត្តិការទ្វេភាគី កម្ពុជា-វៀតណាម, ឯកឧត្តមឧបនាយករដ្ឋមន្រ្តី ក៏បានសម្ដែងនូវការពេញចិត្ត និងវាយតម្លៃខ្ពស់ចំពោះភាពរីកចម្រើននៃទំនាក់ទំនង និងកិច្ចសហប្រតិបត្តិការទ្វេភាគីដ៏ល្អប្រសើរលើគ្រប់វិស័យ។ ឯកឧត្តមឧបនាយករដ្ឋមន្ត្រី ក៏បានកត់សម្គាល់ផងដែរថាការផ្លាស់ប្ដូរដំណើរទស្សនកិច្ចគ្រប់កម្រិតរបស់គណៈប្រតិភូ នៃប្រទេសទាំងពីរ បានរួមចំណែកដល់ការពង្រឹង និងពង្រីកទំនាក់ទំនង និងកិច្ចសហប្រតិបត្តិការទ្វេភាគី ឱ្យកាន់តែរឹងមាំ និងរីកចម្រើនបន្ថែមទៀត។

ជាការឆ្លើយតប, សម្ដេចបវរធិបតីបានសម្ដែងនូវសេចក្ដីសោមនស្សរីករាយ និងស្វាគមន៍ចំពោះឯកឧត្តមឧបនាយករដ្ឋមន្ត្រី និងគណៈប្រតិភូ ដែលបានអញ្ជើញមកបំពេញទស្សនកិច្ចនៅកម្ពុជានាឱកាសនេះ។ ឆ្លៀតក្នុងឱកាសនេះ, សម្ដេចបវរធិបតី បានសម្តែងការចូលរួមមរណទុក្ខជាមួយរដ្ឋាភិបាល និង ប្រជាជនវៀតណាម ចំពោះការបាត់បង់ជីវិត និងការខូចខាតទ្រព្យសម្បត្តិរបស់ប្រជាជនវៀតណាម ដែលបណ្តាលមកពីគ្រោះទឹកជំនន់ នាពេលថ្មីៗនេះ។ សម្ដេចបវរធិបតីក៏បានគូសបញ្ជាក់ដោយការពេញចិត្ត និងរីករាយចំពោះវឌ្ឍនភាពដ៏ល្អ នៃទំនាក់ទំនង និងកិច្ចសហប្រតិបត្តិការទ្វេភាគីលើគ្រប់វិស័យ ព្រមទាំង បាន លេីកទឹកចិត្តដល់ក្រសួង -ស្ថាប័ន និង អាជ្ញាធរពាក់ព័ន្ធ ជាពិសេសរដ្ឋបាលថ្នាក់ក្រោមជាតិនៃបណ្តាខេត្តជាប់ព្រំដែននៃប្រទេសទាំងពីរ បន្តជំរុញ ទំនាក់ទំនង និងកិច្ចសហប្រតិបត្តិការ ជាមួយគ្នាឱ្យកាន់តែល្អប្រសេីរបន្ថែមទៀត ព្រមទាំងប្រែក្លាយតំបន់ព្រំដែន ជាព្រំដែនសន្តិភាព មិត្តភាព និង វិបុលភាព។

សម្ដេចបវរធិបតី និងឯកឧត្តមឧបនាយករដ្ឋមន្ត្រីនៃសាធារណរដ្ឋសង្គមនិយមវៀតណាម បានពិភាក្សាគ្នាអំពីការបន្តជំរុញទំនាក់ទំនង និងកិច្ចសហប្រតិបត្តិការទ្វេភាគី កម្ពុជា-វៀតណាម ឱ្យកាន់តែរឹងមាំ លើវិស័យសំខាន់ៗមួយចំនួន រួមមាន ជាអាទិ៍៖ សេដ្ឋកិច្ច, ពាណិជ្ជកម្ម, ការពារជាតិ និងសន្តិសុខ, អប់រំ, សុខាភិបាល, វប្បធម៌, ទេសចរណ៍, ក៏ដូចជាការតភ្ជាប់ហេដ្ឋារចនាសម្ព័ន្ធ នៃប្រទេសទាំងពីរ សម្រាប់ជាឧត្តមប្រយោជន៍របស់ប្រជាជន នៃប្រទេសទាំងពីរ៕

#ហ៊ុនម៉ាណែត #កម្ពុជា #សន្តិភាពនៅកម្ពុជា

ថ្ងៃទី២៣ ខែវិច្ឆិកា ឆ្នាំ២០២៥ លោកជំទាវជា គឹមថា ឯកអគ្គរាជទូតកម្ពុជាប្រចាំសាធារណរដ្ឋសង្គមនិយមវៀតណាម និងមន្រ្តីស្ថានទូត បានចូលរួមកម្មវិធី 12th International Culinary Culture Festival 2025 “Trip of Flavors “ ដែលរៀបចំដោយក្រសួងការបរទេសវៀតណាម ក្រោមអធិបតីភាព លោកជំទាវ NGO Phuong Ly ភរិយាឯកឧត្តម អគ្គលេខាធិការបក្សវៀតណាម ដោយមានការចូលរួមពីថ្នាក់ដឹកនាំក្រសួងការទេសវៀតណាម ក្រុមហ៊ុនឯកជននានា និងស្ថានទូតជាច្រើនប្រចាំប្រទេសវៀតណាម។
ស្ថានទូតកម្ពុជា ក៏បានដាក់បង្ហាញនំបញ្ចុក បង្អែមខ្មែរ ក្រមា ផលិតផលខ្មែរ និងបានសម្តែងរបាំគោះអង្រែ ​ដោយសមាគមនិស្សិតកម្ពុជា ចូលរួមក្នុងកម្មវិធីខាងលើនេះផងដែរ។

នៅល្ងាចថ្ងៃទី១៥ ខែវិច្ឆិកាឆ្នាំ២០២៥ លោកជំទាវ ជា គឹមថា ឯកអគ្គរាជទូតកម្ពុជា ប្រចាំសាធារណរដ្ឋសង្គមនិយមវៀតណាម បានអញ្ជើញចូលរួមកម្មពិធីជំនួបមិត្តភាពនិស្សិតកម្ពុជា-វៀតណាម ឆ្នាំ២០២៥ ក្រោមប្រធានបទការផ្សារភ្ជាប់ថ្ងៃនេះ ស្ថិរភាពថ្ងៃអនាគត ដែលរៀបចំដោយគណៈកម្មាធិការមជ្ឈិមសមាគមមិត្តភាពកម្ពុជា-វៀតណាម សហកាជាមួយគណៈកម្មាធិការប្រជាជនខេត្ត និងសាកលវិទ្យាល័យវេជ្ជសាស្រ្ត និងឱសថសាស្រ្តថៃប៊ិញ ក្រោមអធិបតីភាព លោកជំទាវ Nguyen Thi Thanh អនុប្រធានរដ្ឋសភាវៀតណាម និងជាប្រធានគណៈកម្មាធិការមជ្ឈិមសមាគមមិត្តភាពវៀតណាម-កម្ពុជា ដែលមានការចូលរួមពីអភិបាលខេត្តថៃប៊ិញ នាយកសាកលវិទ្យាល័យវេជ្ជសាស្រ្ត និងឱសថសាស្រ្តខេត្តថៃប៊ិញ និងសមាគមនិស្សិតកម្ពុជាមកពីទីក្រុងហូជីមិញ ទីក្រុងហាណូយ និងនិស្សិតមកពីប្រទេសឡាវដែលកំពុងសិក្សានៅថៃប៊ិញ ។

នៅថ្ងៃទី ១៣-១៤ ខែវិច្ឆិកា ឆ្នាំ២០២៥ លោកជំទាវ ជា គឹមថា ឯកអគ្គរាជទូតកម្ពុជាប្រចាំសាធារណរដ្ឋសង្គមនិយមវៀតណាម បានអញ្ជើញអមដំណើរ ឯកឧត្ដម នាយឧត្តមសេនីយ៍ ទៀ សីហា ឧបនាយករដ្ឋមន្ដ្រី រដ្ឋមន្រ្តីក្រសួងការពារជាតិកម្ពុជា ក្នុងឱកាសដែលឯកឧត្ដម ដឹកនាំគណប្រតិភូជាន់ខ្ពស់ អញ្ជើញចូលរួមកម្មវិធីជំនួបប្រាស្រ័យទំនាក់ទំនងការពារព្រំដែនជាតិកម្ពុជា-វៀតណាមលើកទី២ ជាមួយនឹងគណៈប្រតិភូយោធាជាន់ខ្ពស់ក្រសួងការពារជាតិវៀតណាម ដឹកនាំដោយឯកឧត្តម នាយឧត្តមសេនីយ៍ ហ្វាន វ៉ាន់យ៉ាង រដ្ឋមន្រ្ដីក្រសួងការពារជាតិវៀតណាម ដែលមានសកម្មភាពរួមមានលំហាត់សុខាភិបាលយោធារួមគ្នាកងទ័ពទាំងពីរ បញ្ចុះបឋមសីលាសាងសង់អាគារសិក្សា លាបពណ៌បង្គោលព្រំដែនលេខ១៧១ និងដាំដើមឈើអនុស្សាវរីយ៍ ។

កម្មវិធីនេះបានប្រពឹត្តទៅនៅថ្ងៃទី១៣ វិច្ឆិកា ២០២៥ នៅច្រកទ្វារអន្តរជាតិម៉ុកបាយ ខេត្តតៃនិញ ប្រទេសវៀតណាម និងថ្ងៃទី១៤ វិច្ឆិកា ២០២៥
បានប្រព្រឹត្តទៅនៅច្រកទ្វារអន្តរជាតិបាវិត ខេត្តស្វាយរៀង ប្រទេសកម្ពុជា ។

នៅល្ងាចថ្ងៃទី៨ ខែវិច្ឆិកា ឆ្នំា២០២៥ លោកជំទាវ ជា គឹមថា ឯកអគ្គរាជទូតកម្ពុជា ប្រចាំនៅសាធារណរដ្ឋសង្គមនិយមវៀតណាមព្រមទំាងមន្ដ្រីស្ថានទូត បានចូលរួមពិធីខួបលើកទី ៧២ នៃទិវាបុណ្យឯករាជ្យជាតិកម្ពុជាដែលសហការរៀបចំដោយសមាគមនិស្សិតកម្ពុជានៅសាធារណរដ្ឋសង្គមនិយមវៀតណាម ដោយមានការចូលរួមពីតំណាងក្រសួងអប់រំវៀតណាម គណៈគ្រប់គ្រងអន្តេវាសិកដ្ឋាន អា ៣ តំណាងសមាគមមិត្តភាពមជ្ឈឹមវៀតណាម-កម្ពុជាសមាគមមិត្តភាពកូនកាត់ និងនិស្សិតបរទេស ដែលមានអ្នកចូលរួមប្រមាណ៣៥០នាក់។