Komuna Istog

Për nder të 1 Qershorit – Ditës Ndërkombëtare të Fëmijëve, Drejtoria për Kulturë, Rini dhe Sport e Komunës së Istogut organizoi festivalin “Fëmijët Këndojnë”.

Ky aktivitet mblodhi fëmijë të talentuar nga komuna, të cilët interpretuan këngë dhe pika artistike, duke sjellë gëzim, kreativitet dhe atmosferë festive për të pranishmit.

Drejtoresha e Drejtorisë për Kulturë, Rini dhe Sport, Era Rexhaj, përgëzoi pjesëmarrësit për paraqitjet e tyre dhe ritheksoi rëndësinë e mbështetjes së talenteve të reja përmes aktiviteteve kulturore dhe artistike.

Festivali u shndërrua në një festë të bukur për fëmijët, duke shënuar në mënyrë dinjitoze 1 Qershorin.

Me rastin e 1 Qershorit – Ditës Ndërkombëtare të Fëmijëve, Drejtoria për Mirëqenie Sociale e Komunës së Istogut organizoi një aktivitet simbolik kushtuar fëmijëve, duke promovuar rëndësinë e mbështetjes dhe përfshirjes së tyre në shoqëri. Në kuadër të Drejtorisë për Mirëqenie Sociale ofrohen shërbime logopedike, psikologjike dhe sociale për fëmijët me nevoja të veçanta, me qëllim përmirësimin e cilësisë së jetës së tyre dhe mbështetjen e zhvillimit të gjithanshëm.
Drejtoresha e Drejtorisë për Mirëqenie Sociale, Merita Bytyçi, theksoi se Komuna e Istogut mbetet e përkushtuar në ofrimin e shërbimeve gjithëpërfshirëse dhe në krijimin e mundësive të barabarta për fëmijët me nevoja të veçanta. Me këtë rast, u përcollën urimet më të përzemërta për të gjithë fëmijët me rastin e 1 Qershorit, duke u dëshiruar një fëmijëri të lumtur, të sigurt dhe plot mundësi për zhvillim.

Shënimi i 1 Qershorit – Dita Ndërkombëtare e Fëmijëve

Me rastin e shënimit të 1 Qershorit – Dita Ndërkombëtare e Fëmijëve, Sektori për të Drejtat e Njeriut dhe Komunitete - Drejtoria për Administratë Komunale, në bashkëpunim me Drejtorinë për Arsim dhe Ekipin për të Drejtat e Fëmijës mbajti një takim përmbyllës me përfaqësuesit e Asamblesë Komunale të Fëmijëve në Istog me rastin e përfundimit të mandatit të tyre dyvjeçar.

Në shënim të 1 Qershorit – Ditës Ndërkombëtare të Fëmijëve, Komuna e Istogut shpreh mirënjohje dhe falënderim të sinqertë për përfaqësuesit e Asamblesë Komunale të Fëmijëve, të cilët me përkushtim, përgjegjësi dhe angazhim përfunduan me sukses mandatin e tyre.

Në këtë takim përmbyllës përfaqësueseve të Asamblesë Komunale të Fëmijëve iu ndanë mirënjohje për angazhimin, përkushtimin dhe kontributin e dhënë duke përfaqësuar me përgjegjësi zërin e fëmijëve, si dhe duke dhënë ide, mendime dhe iniciativa në funksion të përmirësimit të komunitetit gjatë mandatit të tyre për periudhën 2024 - 2026.

U mbajt mbledhja e 6-të e Kuvendit

Kryesuar nga kryesuesi i kuvendit Enver Rugova, është mbajtur mbledhja e 6-të e rregullt e legjislacionit të VIII-të të Kuvendit Komunal. Në mbledhje kanë marrë pjesë Nënkryetari i Komunës Genc Ademaj si dhe anëtarët e asamblesë komunale.
Pikë e rendit të ditës ishte: arsyetimi i mungesave në mbledhje, shqyrtimi dhe miratimi i procesverbalit nga mbledhja e kaluar, njoftim me Qarkoren Buxhetore nr.1 të Ministrisë së Financave për kufijtë preliminar të përgatitjes së Kornizës Afatmesme Buxhetore 2027-2029, shqyrtimi dhe miratimi i Plotësim – Ndryshimit të Rregullores për Taksa Ngarkesa dhe Gjoba, bartja e mjeteve të pashpenzuara buxhetore të hyrave të bartura nga viti fiskal 2025, dhe të hyrat e tejkaluara në vitin 2026, projektet e reja kapitale në bashkëfinancim me komunitetin për vitin fiskal 2026-2027, shqyrtimi dhe miratimi i Plotësim – Ndryshimit të Rregullores për Orarin e Punës për Subjektet Afariste, Hoteliere, Prodhuese, Zejtare dhe Shërbyese në Komunën e Istogut si dhe miratimi i planit të punës së KKSB-së për vitin 2026.

Të gjitha këto pika të ditës u miratuan nga anëtaret e kuvendit.

Urimi i Kryetarit të Komunës, z. Ilir Ferati, për Kurban Bajramin

Të dashur qytetarë,

Me rastin e festës së Kurban Bajramit, ju përcjell urimet më të sinqerta për shëndet, paqe, harmoni dhe begati në familjet tuaja.

Kjo festë na kujton vlerat e solidaritetit, respektit dhe kujdesit për njëri-tjetrin.
Uroj që këto ditë festive t’i kaloni pranë më të dashurve tuaj, me zemër të mbushur me gëzim e mirësi.

Gëzuar Kurban Bajramin!

NJOFTIM

Të dashur qytetarë, të Komunës së Istogut ju informojmë se të gjitha mbetjet nga therja e Kurbanëve mund t’i dërgoni në pikat grumbulluese ku janë vendosur kontejner special:

• Istog ( te Tregu rr.Nënë Tereza ),
• Vrellë ( te rruga e Bjeshkës ),
• Banjë ( rr. Onix, Shfmu “Trepça” ),
• Gurrakoc ( rr. Podguri, 300m largë fushës sportive “Sela” në drejtim të Rakosh*t ),
• Rakosh ( rr. Mema, te rruga e Kerrninës ),
• Saradran ( rr. Rusolia ),
• Zallq ( rr. Sokol Mehmetaj afër Urës së Gurit ),
• Studenicë ( te Pishat ).

Drejtoria e Inspekcionit Komunal së bashku me K.R.M Ambienti në Istog, kanë paraparë planin për mbledhjen e mbetjeve nga therja e Kurbanëve me kontejner special, ku të gjitha këto mbetje do të groposen në vendet adekuate.

Ju bëjmë apel të gjithëve që mbetjet mos të hudhën në vende jo adekuate për shkak të higjienës dhe mundësisë së kundërmimit.

Vërejtje: Për mos përfilljen e këtij njoftimi, Drejtoria e Inspekcionit do të merr masa konform Ligjeve në fuqi.

Ju faleminderit për mirëkuptim!

Urime Kurban Bajrami!

Sot në Istog u përuruan investimet e realizuara në Banesat Sociale dhe në Çerdhen “Gëzimi Ynë” në Istog, projekte të financuara nga Bashkimi Evropian përmes Fondit të Kosovës për Efiçiencë të Energjisë (FKEE) në bashkëpunim me Komunën e Istogut.

Në këtë aktivitet morën pjesë drejtori i Arsimit Naim Behlulaj, drejtorë komunalë, ministrja në detyrë Artane Rizvanolli, drejtoresha menaxhuese e FKEE-së Njomza Hoxha, si dhe përfaqësues të zyrës së Bashkimit Evropian.

Falë bashkëpunimit ndërmjet Kryetarit Ilir Ferati dhe FKEE-së, në këto objekte janë realizuar investime të rëndësishme si ndërrimi i dritareve, rregullimi i fasadës dhe punime të tjera që ndikojnë në përmirësimin e kushteve, rritjen e sigurisë dhe efikasitetit energjetik.

Të pranishmit vlerësuan rëndësinë e këtyre projekteve dhe bashkëpunimin ndërinstitucional në realizimin e tyre.

U mbajt mbledhja e Komitetit për Komunitete
Është mbajtur mbledhja e Komitetit për Komunitete të cilën e kryesoj kryesuesja e këtij komiteti Blerina Hajrizaj, ku pikë e rendit të ditës ishte:

1. Arsyetimi i mungesave në mbledhje,
2. Shqyrtimi dhe miratimi i procesverbalit nga mbledhja e kaluar,
3. Shqyrtimi dhe miratimi i Plotësim – Ndryshimit të Rregullores për Taksa Ngarkesa dhe Gjoba.
4. Raporti i rregullt i punës së ZKKK.

Drejtoria për Kulturë, Rini dhe Sport e Komunës së Istogut, në bashkëpunim me OSCE Mission in Kosovo, organizoi takimin me temën “Formimi i Këshillave Lokale të Rinisë: Nga Korniza Ligjore deri te Zbatimi në Nivel Komunal”.
Takimin e përshëndetën Drejtori i Qendrës Rajonale të OSBE-së në Pejë Cristiano Barale si dhe Drejtoresha për Kulturë, Rini dhe Sport në Komunën e Istogut Era Rexhaj.
Gjatë takimit u diskutua për hapat konkretë drejt themelimit dhe funksionalizimit të Këshillave Lokale të Rinisë, rolin e komunave në këtë proces, si dhe mekanizmat institucionalë e financiarë për mbështetjen e tyre. Pjesë e agjendës ishte edhe puna në grupe komunale, ku u hartuan propozime dhe hapa fillestarë për krijimin e këshillave rinore në nivel lokal.