Komuna e Podujevës

Hapet Nënstacioni i Policisë në fshatin Orllan

Të mërkurën është bërë hapja e Nënstacionit të Policisë në fshatin Orllan. Në këtë ceremoni mori pjesë kryetari i Komunës, Shpejtim Bulliqi, ministri në detyrë i Punëve të Brendshme, Xhelal Sveçla, drejtori i përgjithshëm i Policisë, Gazmend Hoxha e zyrtarë tjerë.

Kryetari Bulliqi u shpreh i lumtur që ky objekt, i cili ishte në pronësi të Komunës së Podujevës, i është dhënë në shfrytëzim Policisë së Kosovës për ngritjen e kapaciteteve të saj dhe rritjen e sigurisë në këtë pjesë të komunës.

“Mbetemi të përkushtuar për të mbështetur Policinë e Kosovës dhe për të krijuar kushtet sa më të mira për punën e zyrtarëve policorë, me qëllim ofrimin e sigurisë dhe rendit për të gjithë qytetarët”, tha ai.

04.06.2026, Podujevë
Zyra për Marrëdhënie me Publikun dhe Informim

Rikujtim: Komuna e Podujevës do të nisë ciklin e dëgjimeve buxhetore për Kornizën Afatmesme Buxhetore 2027-2029

Të gjitha dëgjimet buxhetore fillojnë në orën 18:00 dhe do të mbahen sipas këtij kalendari:

8 qershor në fshatin Kërpimeh – objekti i shkollës
9 qershor në fshatin Lluzhan - objekti i shkollës
10 qershor në fshatin Orllan - objekti i shkollës
11 qershor në Podujevë – salla e Kuvendit Komunal
12 qershor në Podujevë – salla e Kuvendit Komunal

25.05.2026, Podujevë
Zyra për Marrëdhënie me Publikun dhe Informim

Njoftim: Komuna e Podujevës do të nisë ciklin e dëgjimeve buxhetore për Kornizën Afatmesme Buxhetore 2027-2029 - Komuna Podujeve Të gjitha dëgjimet buxhetore fillojnë në orën 18:00 dhe do të mbahen sipas këtij kalendari: 8 qershor në fshatin Kërpimeh – objekti i shkollës 9 qershor në fshatin Lluzhan – objekti i shkollës 10 qershor në fshatin Orllan – objekti i shkollës 11 qershor në Podujevë – salla e ...

Nënshkruhet marrëveshja për financimin e sistemit të ujitjes të tokave bujqësore në Komunën e Podujevës

Kryetari i Komunës, Shpejtim Bulliqi dhe ministri në detyrë i Bujësisë, Pylltarisë dhe Zhvillimit Rural, Armend Muja, nënshkruan tri marrëveshje që kanë të bëjnë me zhvillimin e bujqësisë dhe infrastrukturës rurale në Podujevë.

Marrëveshja e parë parasheh bashkëfinancimin e projektit të sistemit të ujitjes së tokave bujqësore në Komunën e Podujevës. Sipas kësaj marrëveshjeje, do të ndërtohen 80 kilometra rrjet të ujitjes, i cili do të mbulojë rreth 70 km² tokë bujqësore në 10 zona.

Pastaj marrëveshja për përfundimin e projektit të Parkut bujqësor në fshatin Sfeçël, i cili ka filluar të ndërtohet vitin e kaluar, si dhe ndryshimi dhe plotësimi i marrëveshjes së mirëkuptimit për projektin “Ndërtimi i kanalit të ujitjes në Lupç të Poshtëm”.

Kryetari Bulliqi theksoi se këto projekte do të krijojë kushte më të mira për fermerët dhe do të rrisin prodhimtarinë bujqësore.

“Ky është një hap i rëndësishëm drejt zhvillimit të mëtejshëm dhe krijimit të kushteve sa më të mira për bujqit tanë! E falenderoj ministrin Armend Muja për mbështetjen dhe bashkëpunimin në realizimin e këtyre projekteve me rëndësi të madhe për Podujevën”, tha kryetari Bulliqi.

Më pas kryetari Bulliqi dhe ministri Muja gjatë ditës ishin edhe në fshatin Lupç të Poshtëm, ku u lëshua në funksion kanali i ujitjes.

Bulliqi tha se me këtë projekt afro 100 hektarë tokë bujqësore në fshatin Lupç të Poshtëm nga sot fermerët do të mund t’i ujisin kulturat bujqësore.

“Ky projekt është pjesë e angazhimit tonë të vazhdueshëm për mbështetjen e fermerëve dhe zhvillimin e bujqësisë në Podujevë, ndërsa investime të ngjashme do të realizohen edhe në zona të tjera të komunës sonë”, deklaroi kryetari Bulliqi.

Edhe ministri Muja theksoi se këto projekte do të ndikojnë drejtpërdrejt në forcimin e sektorit bujqësor dhe zhvillimin rural afatgjatë.

03.06.2026, Podujevë
Zyra për Marrëdhënie me Publikun dhe Informim

Miratohet kërkesa për financimin e 1.2 milionë euro në rrjetin e ujësjellësit në Podujevë

Ministria e Ekonomisë e ka miratuar kërkesën për financimin e investimeve kapitale për ndërmarrjet publike. Në këtë vendim për Kompaninë Rajonale të Ujësjellësit (KRU) “Prishtina” është miratuar shuma prej 1.2 milionë eurove (bashkëfinancim) që do të investohen në rrjetin e ujësjellësit në Komunën e Podujevës.

Nga kjo shumë, 700 mijë euro (bashkëfinancim) janë paraparë për shtrirjen e gypit të ri OD 400mm nga Fabrika e përpunimit të ujit në Shajkoc deri në qytetin e Podujevës në gjatësi prej 8.5 km. Pastaj 300 mijë euro (bashkëfinancim) për shtrirjen e gypit të ri OD 250mm nga gypi i çelikut DN 400 deri në fshatrat Sfeçël, Gllamnik dhe Llapashticë. Dhe 220 mijë euro (bashkëfinancim) ndërtimi i rrjetit të ujësjellësit për fshatrat Katunishtë dhe Llapashticë.

Kryetari i Komunës, Shpejtim Bulliqi, e vlerësoi të rëndësishëm këtë investim, pasi sipas tij, do të përmirësojë ndjeshëm furnizimin me ujë të pijshëm në Podujevë.

“Shpreh mirënjohjen time për ministren Artane Rizvanolli dhe kryeshefin ekzekutiv të KRU ‘Prishtina’, Arsim Fetahu, për mbështetjen dhe angazhimin e tyre në realizimin e këtyre projekteve shumë të rëndësishëm për Komunën e Podujevës”, theksoi Bulliqi.

03.06.2026, Podujevë
Zyra për Marrëdhënie me Publikun dhe Informim

Nënkryetari Restelica priti në takim përfaqësues nga BiBeku

Nënkryetari i Komunës, Fahri Restelica, së bashku me Drejtorin e Arsimit, Avni Fetahu, kanë pritur në takim përfaqësues nga BiBeku, Jugen Kosemund, Driton Berisha, përfaqësues i projektit, Fatmir Emini, Drejtor i IAAP “Fan S. Noli”, dhe TOT Prof. Lavdim Selmani, i certifikuar nga GIZ dhe LuxDev.

Në takim u diskutua zhvillimi i mësimit dual në IAAP “Fan S. Noli” në Podujevë, duke përfshirë progresin, sfidat dhe përfitimet për nxënësit.

IAAP “Fan S. Noli” është pjesë e mësimit dual që nga viti 2023, fillimisht me profilet Instalues elektrik dhe Automekanik, ndërsa në vitin shkollor 2025/2026 ka diplomuar gjenerata e parë me 26 nxënës. Aktualisht, ofron edhe profilet: Teknik i paneleve solare fotovoltaike dhe Rrobaqepësi.

Gjatë takimit u theksua rëndësia e bashkëpunimit ndërmjet shkollave dhe sektorit privat për përgatitjen profesionale të të rinjve.

Në fund të takimit, nënkryetari Restelica falënderoi të gjithë partnerët për bashkëpunimin, duke theksuar se “mbështetja e bizneseve është thelbësore për suksesin e të rinjve tanë dhe zhvillimin e arsimit profesional”.

02.06.2026, Podujevë
Zyra për Marrëdhënie me Publikun dhe Informim

Filloi asfaltimi i rrugëve në fshatrat Balloc, Shtedim dhe Livadicë

Në kuadër të projekteve infrastrukturore, sot është asfaltuar rruga "9 Vëllezërit" dhe rruga "Kaçanolli (Lagjja e Mehanëve) në fshatin Balloc, ndërkohë që gjatë ditës do të nisë asfaltimi edhe në disa rrugica tjera në fshatrat Shtedim dhe Livadicë.

Drejtori për Planifikim Urban dhe Mbrojtje të Mjedisit, Ahmet Ahmeti, i ka përcjell nga afër punimet që po realizohen në këto rrugë. Ai tha se asfaltimi i këtyre rrugëve pritet të përfundojë deri nesër.

Përveç dy rrugëve në fshatin Balloc, me këtë kontratë parashihet asfaltim i rrugës "Ajet Vuqa" me dy akse (I dhe II) dhe rrugës "Luigj Gurakuqi" në fshatin Shtedim dhe rrugëve "Mic Sokoli", "Hazir Fetahu" me dy akse dhe "Dibra e Madhe" në fshatin Livadicë.

02.06.2026, Podujevë

Zyra për Marrëdhënie me Publikun dhe Informim

Shënohet 1 Qershori – Dita e Fëmijëve

Sot, në sheshin “Katër Dëshmorët” në Podujevë, u shënua 1 Qershori – Dita Ndërkombëtare e Fëmijëve, përmes një programi të pasur dhe plot aktivitete argëtuese për më të fëmijët.

Në këtë aktivitet morën pjesë Kryetari i Komunës, Shpejtim Bulliqi, dhe Drejtoresha e Kulturës, Rinisë dhe Sportit, Valbona Ibishi.

Drejtoria për Kulturë, Rini dhe Sport kishte përgatitur një varg aktivitetesh të larmishme, duke përfshirë maskota për fëmijë, lojëra argëtuese, valle tradicionale, këngë dhe recitime, si dhe performanca muzikore me violinë, piano dhe kitarë. Po ashtu, fëmijët patën mundësi të shijojnë aktivitete të baletit, valleve moderne, pikturës dhe kreativitetit, si dhe ndeshje sportive.

Pjesë e programit ishte edhe shfaqja teatrale për fëmijë “Lepuri nga Poli i Veriut”, e cila u mbajt në Teatrin “Avdush Hasani”.

Fëmijët e pranishëm e shijuan në maksimum këtë ditë festive, duke kaluar momente të bukura dhe të mbushura me argëtim.

Pas aktiviteteve, Drejtoresha e Kulturës, Rinisë dhe Sportit, Valbona Ibishi, ndau mirënjohje për fëmijët pjesëmarrës në program, ndërsa për të pranishmit u shpërndanë edhe duksa, pije dhe çokollata.

01.06.2026, Podujevë
Zyra për Marrëdhënie me Publikun dhe Informim

Kuvendi i Komunës miratoi Propozim-Vendimin për dhënien në shfrytëzim afatshkurtër Ministrisë së Punëve të Brendshme – Policisë së Kosovës, ish objektin e Gjendjes Civile në fshatin Orllan

Kuvendi i Komunës së Podujevës ka mbajtur mbledhje urgjente, të cilën e udhëhoqi kryesuesi i Kuvendit, Isak Shabani. Në këtë mbledhje morën pjesë edhe nënkryetari Fahri Restelica, drejtorët e drejtorive komunale dhe përfaqësues të mediave.

Drejtori i Shërbimeve Publike, Mbrojtje dhe Shpëtim, Bahri Selimi, tha se arsyeja e thirrjes së kësaj mbledhje është shqyrtimi i Propozim Vendimit për dhënien në shfrytëzim afatshkurtër Ministrisë së Punëve të Brendshme – Policisë së Kosovës, ish objektin e Gjendjes Civile në fshatin Orllan.

Ai sqaroi se ky objekt aktualisht nuk është duke u shfrytëzuar për shërbime të gjendjes civile dhe, si i tillë, paraqet mundësi të mirë për t’u vënë në funksion të institucioneve të sigurisë. Sipas tij, dhënia në shfrytëzim e këtij objekti për Policinë e Kosovës do të kontribuonte në përmirësimin e kushteve të punës dhe rritjen e prezencës policore në atë zonë.

Drejtori Selimi shtoi se stacioni policor në Orllan ka funksionuar në kushte jo të mira për shkak të vjetërsisë së objektit. Duke theksuar rëndësinë strategjike të kësaj zone përgjatë brezit kufitar, ai potencoi se aktualisht mbulueshmëria me policë ka qenë e kufizuar, ndërsa me dhënien në shfrytëzim të këtij objekti pritet që numri i policëve në atë zone të rritet dukshëm.

Në fund, drejtori Selimi kërkoi nga anëtarët e Kuvendit që të mbështesin këtë pikë të rendit të ditës, duke e konsideruar si të rëndësishme për rritjen e sigurisë dhe përmirësimin e shërbimeve policore në atë zonë.

Pas diskutimeve nga anëtarët e subjekteve të ndryshme politike, kjo pikë u përkrah njëzëri dhe u miratua nga Kuvendi i Komunës.

01.06.2026, Podujevë
Zyra për Marrëdhënie me Publikun dhe Informim

Ftesë për Mbledhje Urgjente të Kuvendit të Komunës së Podujevës