Instituti Pedagogjik i Kosovës

Instituti Pedagogjik i Kosovës realizoi simpoziumin shkencor me temë “Gjithëpërfshirja në sistemin arsimor në Kosovë: sfidat dhe përparësitë”

Instituti Pedagogjik i Kosovës (IPK) organizoi simpoziumin shkencor me temë “Gjithëpërfshirja në sistemin arsimor në Kosovë: sfidat dhe përparësitë”, duke mbledhur përfaqësues institucionalë, ekspertë të arsimit, organizata ndërkombëtare dhe profesionistë të fushës për të diskutuar zhvillimet dhe sfidat e arsimit gjithëpërfshirës në vend.

Punimet e simpoziumit i hapi udhëheqësja e Divizionit për Edukim të Hershëm dhe Arsim Fillor, znj. Mevlude Aliu Gashi, ndërsa fjalën hyrëse e mbajti drejtori i IPK-së, z. Murteza Osdautaj. Aktiviteti u moderua nga znj. Lirije Bytyqi-Beqiri.

Gjatë sesioneve tematike u prezantuan analiza dhe hulumtime mbi gjendjen aktuale të arsimit gjithëpërfshirës në Kosovë, sfidat në zbatim, politikat mbështetëse dhe perspektivat institucionale për avancimin e një sistemi arsimor më të barabartë dhe më mbështetës për të gjithë fëmijët.

Në kuadër të simpoziumit, znj. Sahare Reçica Havolli nga IPK-ja prezantoi gjetjet e hulumtimeve të saj lidhur me aspektet e gjithëpërfshirjes në arsim. Ndërkaq, znj. Salihe Gajtani Osmankaq nga Ministria e Arsimit dhe Shkencës trajtoi përparësitë në zhvillimin e politikave mbështetëse për arsimin gjithëpërfshirës.

Kontribut të veçantë dha edhe z. Arben Damoni nga Ministria e Digjitalizimit dhe Administratës Publike, i cili prezantoi modelin “Ngjarja jetësore – Lindja e fëmijës”, duke theksuar rëndësinë e tij në funksion të gjithëpërfshirjes dhe qasjes së hershme institucionale ndaj fëmijëve.

Në simpozium u prezantuan edhe praktikat dhe përvojat e organizatave ndërkombëtare. Nga UNICEF prezantoi znj. Dafina Krasniqi, ndërsa nga Save the Children znj. Lulavere Behluli, të cilat folën për mbështetjen dhe angazhimin e organizatave që përfaqësojnë në promovimin e arsimit gjithëpërfshirës në Kosovë.

Përvojat dhe sfidat në nivel lokal u trajtuan nga kryetari i Kolegjiumit të Drejtorëve të DKA-ve, z. Muhamet Gjoka, ndërsa z. Burim Sylejmani prezantoi praktika konkrete dhe modele mbështetëse të zbatuara në shkolla.

Gjatë diskutimeve u identifikuan një sërë sfidash, përfshirë mungesën e koordinimit ndërinstitucional, mungesën e qendrave diagnostikuese për fëmijët, identifikimin dhe vlerësimin e vonshëm të nevojave të fëmijëve, numrin e pamjaftueshëm të stafit profesional mbështetës, pabarazitë në ofrimin e shërbimeve ndërmjet komunave dhe shkollave, si dhe mungesën e infrastrukturës dhe materialeve didaktike adekuate.

Në përmbyllje, simpoziumi riafirmoi rëndësinë e bashkëpunimit institucional dhe profesional për ndërtimin e një sistemi arsimor gjithëpërfshirës, që garanton mbështetje dhe mundësi të barabarta për çdo fëmijë në Kosovë.

Në nder të 250-vjetorit të Pavarësisë së Shteteve të Bashkuara të Amerikës, Instituti Pedagogjik i Kosovës organizoi një ngjarje profesionale që solli në qendër reflektimin mbi lidershipin institucional, transformimin teknologjik, dhe të ardhmen e institucioneve publike.

Ngjarja u mbajt në Bibliotekën Kombëtare të Kosovës, me temën “Udhëheqja e institucioneve publike në kohën e ndryshimeve të shpejta teknologjike: një perspektivë amerikane”, në kuadër të Programit Fulbright Specialist dhe iniciativës Freedom 250, të mbështetur nga Ambasada e Shteteve të Bashkuara të Amerikës në Kosovë.

Në aktivitet, ushtruesi i detyrës së drejtorit të Institutit Pedagogjik të Kosovës, z. Murteza Osdautaj, dhe koordinatorja e projektit, Amantina Pervizaj Kelmendi, theksuan rëndësinë e këtij angazhimi për fuqizimin e dialogut profesional, zhvillimit institucional dhe bashkëpunimit ndërkombëtar në arsim, duke shprehur mirënjohje për mbështetjen e vazhdueshme të Ambasadës Amerikane.

Pjesa qendrore e aktivitetit u shënua nga fjalimi i prof. Gina Whalen, eksperte e Programit Fulbright dhe profesoreshë në Penn State University, e cila solli një perspektivë amerikane mbi lidershipin publik në kohë ndryshimesh teknologjike. Në fjalimin e saj u theksua se teknologjia nuk është vetëm ndryshim teknik, por edhe ndryshim njerëzor dhe institucional, ndërsa institucionet publike duhet të modernizohen duke ruajtur etikën, besimin publik dhe fokusin te njeriu.
Në vijim, u zhvillua diskutim interaktiv me pjesëmarrësit mbi sfidat dhe mundësitë që sjell transformimi teknologjik për institucionet publike dhe sistemin arsimor në Kosovë.

Performanca muzikore nga pianisti Shpëtim Mehmeti i dha ngjarjes një dimension reflektues dhe artistik, në harmoni me frymën dhe mesazhin e saj.
Në aktivitet morën pjesë përfaqësues të institucioneve publike dhe arsimore, partnerë institucionalë, komuniteti profesional, si dhe përfaqësues nga Ambasada e Shteteve të Bashkuara të Amerikës në Kosovë.

Kjo ngjarje shënoi edhe përmbylljen e aktiviteteve të realizuara në kuadër të Programit Fulbright Specialist në Institutin Pedagogjik të Kosovës, duke reflektuar mbi vlerën e shkëmbimit profesional dhe hapjen e mundësive të reja për bashkëpunime të ardhshme në shërbim të zhvillimit të arsimit në Kosovë.

Instituti Pedagogjik i Kosovës realizoi takim konsultativ me komunitetin arsimor në Pejë

Në kuadër të Programit Fulbright Specialist, të mbështetur nga Ambasada e Shteteve të Bashkuara të Amerikës në Kosovë, Instituti Pedagogjik i Kosovës, së bashku me eksperten e Fulbright, prof. Gina Whalen, realizoi një takim konsultativ me përfaqësues të komunitetit arsimor në Komunën e Pejës.

Takimi u organizua në bashkëpunim me Drejtorinë Komunale të Arsimit në Pejë, nën mikpritjen e drejtorit Komunal të Arsimit, z. Naser Gega, dhe mblodhi përfaqësues të shkollave fillore dhe të mesme: drejtorë shkollash, mësimdhënës, pedagogë, psikologë, bashkëpunëtorë profesionalë dhe përfaqësues të tjerë të institucioneve arsimore.

Qëllimi i takimit ishte krijimi i një hapësire të hapur profesionale për dialog mbi realitetin arsimor, në nivel lokal dhe shkollor, nevojat dhe sfidat e shkollave, zhvillimin profesional, orientimin në karrierë, si dhe rolin këshillues, hulumtues dhe mbështetës të Institutit Pedagogjik të Kosovës në raport me komunat dhe shkollat.

Gjatë diskutimit u theksuan rëndësia e zhvillimit profesional të bazuar në nevojat konkrete të shkollave, forcimi i komunikimit ndërmjet institucioneve arsimore, dhe përdorimi i përvojave nga praktika shkollore, si bazë për reflektim, planifikim dhe rekomandime të ardhshme.

Prof. Gina Whalen ndau me pjesëmarrësit perspektiva nga përvoja amerikane, veçanërisht lidhur me mbështetjen e nxënësve, orientimin në karrierë dhe mundësitë që shkollat të krijojnë hapësira më të strukturuara për zhvillimin e interesave dhe potencialit të tyre.

Takimi u zhvillua në formë bashkëbisedimi, me pyetje, përgjigje dhe reflektime nga pjesëmarrësit, duke ofruar një pasqyrë të rëndësishme mbi sfidat, nevojat dhe mundësitë për bashkëpunim të mëtejshëm ndërmjet IPK-së, Drejtorisë Komunale të Arsimit dhe shkollave në komunën e Pejës.

Instituti Pedagogjik i Kosovës realizoi vizitë profesionale në Universitetin e Prizrenit “Ukshin Hoti”

Në kuadër të Programit Fulbright Specialist, të mbështetur nga Ambasada e Shteteve të Bashkuara të Amerikës në Kosovë, Instituti Pedagogjik i Kosovës, së bashku me eksperten Fulbright, prof. Gina Whalen, realizoi vizitë profesionale në Universitetin e Prizrenit “Ukshin Hoti”.

Gjatë vizitës u zhvillua fillimisht takim me Rektorin dhe udhëheqjen e Universitetit, me të cilët u diskutua për forcimin e bashkëpunimit ndërinstitucional dhe mundësitë për iniciativa të përbashkëta në fushën e arsimit, hulumtimit dhe zhvillimit profesional.

Më pas, u realizua takim me dekanët dhe stafin akademik, me të cilët u trajtuan mundësitë për bashkëpunim akademik, shkëmbim përvojash, ndërkombëtarizim të mësimdhënies dhe përfshirje të studentëve në forma të reja të të nxënit bashkëpunues. Në këtë kuadër, prof. Gina Whalen prezantoi edhe mundësitë e bashkëpunimit përmes programit EDGE të Penn State University.

Në kuadër të vizitës ishte edhe një diskutim i hapur me studentë, gjatë të cilit ata patën mundësi të njihen me përvoja akademike ndërkombëtare, të parashtrojnë pyetje, dhe të diskutojnë për mundësitë e përfshirjes në bashkëpunime të ardhshme akademike.

Vizita u përmbyll me një tryezë profesionale me aktorë të komunitetit arsimor në rajonin e Prizrenit. Morën pjesë përfaqësues të arsimit, mësimdhënës, pedagogë, psikologë, koordinatorë të cilësisë dhe profesionistë të tjerë të fushës. Diskutimi u fokusua në pedagogjinë, inovacionin, zhvillimin profesional, zbatimin e kurrikulës, sfidat aktuale në arsim dhe mundësitë e bashkëpunimit ndërmjet IPK-së, universitetit, shkollave dhe komunitetit arsimor.

Instituti Pedagogjik i Kosovës falënderon Universitetin e Prizrenit “Ukshin Hoti” për mikpritjen dhe bashkëpunimin, si dhe të gjithë pjesëmarrësit për kontributin e tyre në këtë aktivitet profesional.

Kjo vizitë paraqet një hap të rëndësishëm drejt forcimit të dialogut profesional dhe zgjerimit të bashkëpunimit institucional, në funksion të cilësisë dhe zhvillimit të arsimit në Kosovë.

Njoftim për shtyrjen e afatit për dorëzimin e abstrakteve, deri më datën 30 maj 2026

Instituti Pedagogjik i Kosovës (IPK) njofton të gjithë të interesuarit se e ka zgjatur afatin e paraqitjes me abstrakte. Për të marrë pjesë në konferencën shkencore ndërkombëtare vjetore, me temën kryesore: Zhvillimi profesional i mësimdhënësve në karrierë: praktikat, sfidat dhe mundësitë, abstraktet mund të dorëzohen deri më 30 maj 2026.

Konferenca vjetore e Institutit Pedagogjik të Kosovës 2026

Linke me rëndësi:
Instituti Pedagogjik i Kosovës:
https://ipkmasht.rks-gov.net/

Informata për konferencën:
https://ipkmasht.rks-gov.net/zhvillimi-profesional-i.../

Linku për regjistrim në konferencë:
https://tinyurl.com/ipk-regjistrohu

Konferenca vjetore e Institutit Pedagogjik të Kosovës 2026!
Linqe me rëndësi:
Instituti Pedagogjik i Kosovës:
https://ipkmasht.rks-gov.net/

Informata për konferencën:
https://ipkmasht.rks-gov.net/zhvillimi-profesional-i-mesimdhenesve-ne-karriere-praktikat-sfidat-dhe-mundesite/

Linku për regjistrim në konferencë:
https://tinyurl.com/ipk-regjistrohu

7 MARSI, DITA E MËSUESIT

(Një urim dhe përkushtim për mësuesit shqiptarë)



Çdo 7 mars është një përkujtues i rrugës së vështirë nëpër të cilën kanë kaluar arsimi dhe historia jonë. Çdo përvjetor dhe shënim i kësaj date është një moment reflektimi dhe kujtimi për kontributin e pafundmë të qindra-mijëra mësuesve, të cilët, në momente dhe periudha historike të ndryshme, e trasuan rrugën e ndërtimit të kombit, të historisë dhe të lirisë sonë.

Kjo festë nuk është një ditë simbolike. Për më shumë, 7 marsi është një ditë, në të cilën, së paku një herë në vit, duhet të mendojmë për mësuesit tanë dhe t’i falënderojmë ata për tërë mundin, kontributin dhe sakrificën e tyre në të gjitha periudhat e ndërtimit tonë njerëzor, intelektual dhe kombëtar.

Duke i menduar sakrificat, mundin dhe përpjekjet titanike të mësuesve tanë, duhet të mendojmë për të tashmen dhe për të ardhmen.

Në të gjitha këto përudha, tash dhe në të ardhmen, ne duhet ta kuptojmë se të qenit mësues nuk është profesion, por është një mision fisnik, që ka për detyrë të ndërtojë të ardhmen tonë, shtetin tonë dhe lirinë tonë.

Mësuesi është krijues i njerëzve dhe i kombeve.

Mësuesi është ai që t’i hapë horizontet e jetës dhe të drejton drejt dijes, prosperitetit kombëtar dhe lirisë.

Mësuesi është personi i cili duhet t’i tregojë dhe t’i ndërtojë te gjeneratat e reja bazat e humanizmit, të dijes dhe të atdhedashurisë.

Mësuesi është udhërrëfyesi ynë dhe i fëmijëve tanë. Mësuesit kanë mision edukimin dhe zhvillimin e fëmijëve e të atdheut. Ata janë ndërtuesit e gjeneratave që do të trashëgojnë shtetin dhe të ardhmen. Prandaj, mësuesi duhet të ketë rol fondamental në shoqërinë njerëzore, sidomos në vendin tonë.

Ne duhet të bëjmë ç’është e mundur që mësuesi ynë të ketë status të dinjitetshëm shoqëror dhe vend të nderuar në shtetin dhe shoqërinë tonë. Ne duhet ta kuptojmë se pa një mësues të aftë dhe të nderuar nga populli dhe shteti, nuk mund të ndërtojmë njerëz, të cilët do të ndërtojnë të ardhmen tonë dhe të atdheut.

Në këtë 7 mars është momenti t’i nderojmë të gjithë mësuesit tanë të vërtetë, të cilët na dhanë dritë dhe na i hapën rrugët e jetës. Shteti duhet të bëjë gjithçka që ata të konsiderohen thesar kombëtar dhe, të njëjtit, të kenë status të veçantë shoqëror.

Në anën tjetër, institucionet tona edukative duhet të bëjnë gjithçka që është në dorën e tyre që mësuesit e ardhshëm të pajisen me të gjitha shkathtësitë pedagogjike dhe profesionale, që të jenë në gjendje të zhvillojnë më tutje arsimin dhe të garojnë me përgatitjen e tyre profesionale me të gjithë mësuesit e botës.

Instituti Pedagogjik i Kosovës do të ofrojë hulumtime, shërbime, përvojë dhe dije për mësuesit dhe të gjitha institucionet e palët e interesuara, me të vetmin qëllim që shteti dhe kombi ynë të jenë në gjendje që fëmijëve tanë t’ua ofrojnë një mësimdhënie që nuk do të dallojë për asgjë me shërbimet arsimore të vendeve më të zhvilluara të botës.

Gëzuar të gjithë mësuesve shqiptarë, kudo që janë!

Certifikohen mësimdhënësit e Kaçanikut dhe të Hanit të Elezit

Instituti Pedagogjik i Kosovës ka certifikuar mësimdhënësit e komunës së Kaçanikut dhe të komunës së Hanit të Elezit, të cilët e kanë përfunduar me sukses trajnimin me temë “Ngritja e kapaciteteve për rishikim dhe përmirësim të teksteve shkollore”.
Trajnimi është realizuar nga Instituti Pedagogjik i Kosovës, në kuadër të projektit KosEd, me mbështetje financiare nga Bashkimi Evropian.

Certifikatat u dorëzuan në Drejtoritë Komunale të Arsimit nga Osman Buleshkaj dhe Bekim Morina, punëtorë shkencorë në Institutin Pedagogjik të Kosovës.

Përfaqësuesit e Institutit falënderuan drejtorët e DKA-ve për bashkëpunimin dhe shprehën gatishmërinë për të vazhduar përkrahjen e komunave dhe shkollave nëpërmjet trajnimeve dhe formave të tjera të bashkëpunimit profesional.