Gjykata Administrative e Kosovës

27/10/2026

📢 Njoftim për Ditët e Hapura

Gjykata Administrative e Kosovës fton qytetarët e interesuar të marrin pjesë në takimin e radhës, si pjesë e angazhimit të saj për transparencë, komunikim të drejtpërdrejtë dhe forcim të bashkëpunimit me publikun.

📅 Data: 3 nëntor 2026, e martë
🕙 Ora: 10:00
📍 Vendi: Salla e konferencave A/03, Objekti A, Pallati i Drejtësisë

Pjesëmarrja juaj është e mirëseardhur!

📢 Obaveštenje za Dane otvorenih vrata

Upravni Sud Kosova poziva zainteresovane građane da učestvuju na sledećem sastanku, kao deo svoje posvećenosti transparentnosti, direktnoj komunikaciji i jačanju saradnje sa javnošću.

📅 Datum: 3. novembar 2026, utorak
🕙 Vreme: 10:00
📍 Maesto održavanja: Konferencijska sala
A/03, Zgrada A, Palata pravde

Vaše učešće je dobrodošlo!

27/10/2026

Kryetari i Gjykatës Administrative mbajti ligjëratë informuese me studentët e Fakultetit Juridik të Universitetit të Mitrovicës

Prishtinë, 27 tetor 2026 – Kryetari i Gjykatës Administrative të Kosovës, Kreshnik Kaçiu, mbajti ligjëratë informuese me studentët e Fakultetit Juridik të Universitetit të Mitrovicës “Isa Boletini”.

Në kuadër të ligjëratës, studentët u informuan lidhur me organizimin institucional të gjykatës, fushëveprimin e saj dhe kompetencat në trajtimin e çështjeve administrative, me theks të veçantë në rolin e saj në mbrojtjen gjyqësore të të drejtave dhe interesave të ligjshme të qytetarëve.

Gjatë bashkëbisedimit me studentët u theksua rëndësia e drejtësisë administrative në garantimin e mbrojtjes juridike dhe në ushtrimin e kontrollit gjyqësor në fushën administrative, në përputhje me kompetencat dhe legjislacionin në fuqi.

Në këtë aktivitet, i pranishëm ishte edhe Dekani i Fakultetit Juridik të Universitetit të Mitrovicës, Prof. Dr. Islam Qerimi. Duke e falenderuar kryetarin Kaçiu, për mbajtjen e ligjëratës informuese, ai tha se kjo do të i shërbejë si mundësi studentëve që të thellojnë njohuritë teorike lidhur me drejtësinë administrative dhe të njihen më nga afër me rolin dhe funksionin e Gjykatës Administrative në sistemin e drejtësisë.

Bashkëpunimi me Fakultetin Juridik të Universitetit të Mitrovicës synohet të vazhdohet dhe të avancohet edhe më tutje, në të ardhmen.

Gjykata Administrative vlerëson rëndësinë e bashkëpunimit me institucionet akademike dhe mbetet e përkushtuar ndaj transparencës institucionale, informimit të publikut dhe avancimit të edukimit juridik, në funksion të forcimit të sundimit të ligjit dhe të mbrojtjes së të drejtave ligjore të qytetarëve.

26/10/2026

Kryetari i Gjykatës Administrative takon përfaqësueset e Lëvizjes FOL

Prishtinë, 26 tetor 2026 – Kryetari i Gjykatës Administrative, Kreshnik Kaçiu, së bashku me gjyqtaren e Departamentit të Përgjithshëm, Rajmonda Kurteshi, pritën në takim drejtoreshën ekzekutive të Lëvizjes FOL, Mexhide Demolli Nimani, dhe menaxheren e programeve në këtë organizatë, Nora Bajrami.

Në fillim të takimit, përfaqësueset e Lëvizjes FOL e uruan kryetarin Kaçiu për emërimin në këtë detyrë, duke e vlerësuar funksionalizimin e Gjykatës Administrative si një hap të rëndësishëm dhe të nevojshëm, për avancimin e sistemit të drejtësisë në Republikën e Kosovës.

Teksa u diskutua për funksionalizimin dhe funksionimin e Gjykatës Administrative, kryetari Kaçiu tha se kjo gjykatë është e hapur për publikun dhe organizatat e shoqërisë civile, duke theksuar përkushtimin e plotë për rritjen e transparencës dhe forcimin e llogaridhënies.

Tutje, në takim, palët diskutuan dhe u dakorduan për mundësinë e bashkëpunimit ndërmjet Gjykatës Administrative dhe Lëvizjes Fol, në kuadër të projektit “Nga ankesa te drejtësia”, lidhur me monitorimin dhe publikimin e vendimeve gjyqësore, në rastet që kanë për objekt kontesti marrëdhëniet e punës, të cilat trajtohen në Departamenti për Konteste të Punës.

Raporti i Lëvizjes FOL i cili në fokus ka vendimet e Gjykatës Administrative lidhur me kontestet e punës, pritet të publikohet në tre mujorin e parë të vitit 2027.

23/10/2026

Fakulteti Juridik i Universitetit “Haxhi Zeka” në Pejë, në bashkëpunim me Gjykatën Administrative të Republikës së Kosovës, organizon ligjëratë me temën: “ROLI, KOMPETENCAT DHE FUNKSIONIMI I GJYKATËS ADMINISTRATIVE NË REPUBLIKËN E KOSOVËS”.

Ligjërata do të mbahet nga z. Kreshnik Kaçiu, Kryetar i Gjykatës Administrative të Republikës së Kosovës.

📅 Data: 2 nëntor 2026
🕚 Ora: 11:00
📍 Vendi: Amfiteatri 2, Fakulteti Juridik, Universiteti “Haxhi Zeka”, Pejë.

📢 NJOFTIM - LIGJËRATË

Fakulteti Juridik i Universitetit “Haxhi Zeka” në Pejë, në bashkëpunim me Gjykatën Administrative të Republikës së Kosovës, organizon ligjëratë me temën:

“ROLI, KOMPETENCAT DHE FUNKSIONIMI I GJYKATËS ADMINISTRATIVE NË REPUBLIKËN E KOSOVËS”

Ligjërata do të mbahet nga z. Kreshnik Kaçiu, Kryetar i Gjykatës Administrative të Republikës së Kosovës, i cili do të trajtojë rolin dhe kompetencat e kësaj gjykate, organizimin dhe funksionimin e saj, si dhe rëndësinë e kontrollit gjyqësor të veprimtarisë administrative në mbrojtjen e të drejtave të qytetarëve dhe forcimin e sundimit të ligjit.

Ky aktivitet synon t'u ofrojë studentëve mundësinë për të thelluar njohuritë teorike dhe praktike mbi drejtësinë administrative.

📅 Data: 2 nëntor 2026

🕚 Ora: 11:00

📍 Vendi: Amfiteatri 2, Fakulteti Juridik, Universiteti “Haxhi Zeka”, Pejë

Ftohen studentët, stafi akademik dhe të gjithë të interesuarit të marrin pjesë në këtë ligjëratë.

Ju mirëpresim!

22/10/2026

Fjala përmbyllëse e Kryetarit të Gjykatës Administrative të Kosovës, Kreshnik Kaçiu, me rastin e përfundimit të trajnimit për Azilin dhe Mbrojtjen Ndërkombëtare për Gjyqësorin, e mbajtur në Vilnius të Lituanisë, nga data 20-22 Tetor 2026.

“Faleminderit organizatorëve për ftesën.

Në emër të Gjykatës Administrative të Kosovës, në emrin tim personal dhe në emër të kolegëve të tjerë shqiptarë të pranishëm këtu, dëshiroj t'ju falënderoj të gjithëve për ftesën dhe për programin e shkëlqyer të trajnimit që keni organizuar.

Për ne ka qenë vërtet një nder i veçantë të marrim pjesë në këtë trajnim si Gjykatë Administrative e Kosovës, e sapoformuar. Kemi kaluar një kohë shumë të vlefshme këtu, duke përfituar jashtëzakonisht shumë në aspektin profesional nga trajnerët e nderuar.

Ju falënderoj të gjithëve për prezantimet tuaja, për profesionalizmin e treguar dhe për përvojën e çmuar që ndatë me ne.

Për ne, si gjykatë e re, ka qenë gjithashtu shumë e rëndësishme që të ndajmë përvojat tona me kolegët nga vendet e tjera. Do të ishte me shumë rëndësi për ne që, në trajnimet e ardhshme, të ftohen edhe gjyqtarë të tjerë nga Departamenti i Përgjithshëm i Gjykatës. Shpresoj që edhe ata do të kenë mundësinë të marrin pjesë në trajnimet tuaja të ardhshme.

Ju dëshiroj shumë suksese në karrierën tuaj dhe, gjithashtu, shfrytëzoj këtë rast për t'ju ftuar të gjithëve që të vizitoni Kosovën.

Edhe një herë, ju falënderoj shumë dhe ju uroj të gjithëve gjithë të mirat dhe suksese të mëtejshme!”, deklaroi Kaçiu.

21/10/2026

Gjykata Administrative e Kosovës pjesëmarrëse në Konferencën Rajonale të Ballkanit Perëndimor për Mbrojtjen Ndërkombëtare

Podgoricë, Mali i Zi, 20-21 tetor 2026 - Gjyqtari i Gjykatës Administrative të Kosovës, Driton Nocaj, mori pjesë në Konferencën Rajonale të Ballkanit Perëndimor për Mbrojtjen Ndërkombëtare, e cila u mbajt në Podgoricë të Malit të Zi.

Punëtoria u organizua nga Agjencia e Bashkimit Evropian për Azil (EUAA), në kuadër të mbështetjes rajonale të Bashkimit Evropian për sistemet e menaxhimit të migrimit në Ballkanin Perëndimor.

Gjatë punëtorisë u trajtuan tema që lidhen me Sistemin e Përbashkët Evropian të Azilit, kriteret për njohjen e statusit të refugjatit dhe format e mbrojtjes ndërkombëtare.

Gjykata Administrative e vlerëson si shumë pozitive pjesëmarrjen në punëtori të tilla, pasi ato ndihmojnë në ngritjen e kapaciteteve profesionale, shkëmbimin e përvojave rajonale dhe zbatimin e standardeve më të larta evropiane në vendimmarrjen gjyqësore.

20/10/2026

Gjykata Administrative e Kosovës pjesëmarrëse në trajnimin ndërkombëtar të Procesit të Pragës

Vilnius, Lituani, 20.10.2026 – Gjykata Administrative e Kosovës përfaqësohet për herë të parë në trajnimin ndërkombëtar të organizuar nga Akademia e Trajnimit e Procesit të Pragës, me temën “Trajnimi për azilin dhe ligjin për mbrojtjen ndërkombëtare për gjyqësorin”.

Në këtë aktivitet po marrin pjesë kryetari i Gjykatës Administrative të Kosovës, Kreshnik Kaçiu dhe gjyqtari Vegim Maloku, udhëheqës i Departamentit të Përgjithshëm në këtë gjykatë.

Gjatë punimeve të trajnimit, kryetari Kaçiu i njoftoi pjesëmarrësit për themelimin dhe funksionalizimin e Gjykatës Administrative të Kosovës, si dhe për objektivat dhe synimet e saj për të ardhmen.

Po ashtu, Kaçiu falënderoi organizatorët për ftesën dhe theksoi rëndësinë e bashkëpunimit ndërmjet gjykatave të vendeve të rajonit, përmes shkëmbimit të përvojave dhe praktikave më të mira, me qëllim të rritjes së profesionalizmit dhe efikasitetit në trajtimin e rasteve gjyqësore.

Pjesëmarrja e përfaqësuesve të Gjykatës Administrative të Kosovës në këtë trajnim shënon një hap të rëndësishëm drejt zhvillimit të kapaciteteve profesionale, avancimit të praktikave gjyqësore dhe forcimit të bashkëpunimit ndërkombëtar.

Procesi i Pragës (Prague Process) është një mekanizëm rajonal bashkëpunimi ndërmjet shteteve në fushën e migracionit, azilit dhe mbrojtjes ndërkombëtare. Ai është themeluar në vitin 2009 dhe përfshinë shtete të Bashkimit Evropian, Ballkanit Perëndimor, Evropës Lindore, Azisë Qendrore dhe rajoneve të tjera partnere.

15/10/2026

Kryetari i Gjykatës Administrative mbajti ligjëratë informuese me studentët e Fakultetit Juridik të Universitetit të Prishtinës

Prishtinë, 15 tetor 2026 – Kryetari i Gjykatës Administrative të Kosovës, Kreshnik Kaçiu, mbajti ligjëratë informuese me studentët e Fakultetit Juridik të Universitetit të Prishtinës “Hasan Prishtina”. Gjatë ligjëratës u trajtuan çështje që ndërlidhen me funksionimin, organizimin dhe kompetencat e Gjykatës Administrative.

Në kuadër të ligjëratës, studentët u informuan lidhur me organizimin institucional të gjykatës, fushëveprimin e saj dhe kompetencat në trajtimin e çështjeve administrative, me theks të veçantë në rolin e saj në mbrojtjen gjyqësore të të drejtave dhe interesave të ligjshme të qytetarëve.

Gjatë bashkëbisedimit me studentët u theksua rëndësia e drejtësisë administrative në garantimin e mbrojtjes juridike dhe në ushtrimin e kontrollit gjyqësor në fushën administrative, në përputhje me kompetencat dhe legjislacionin në fuqi.

Ligjërata, ku ishin të pranishëm edhe profesorët e nderuar, Prof. Dr. Mirlinda Batalli dhe Prof. Dr. Islam Pepaj, ligjërues të së drejtës dhe procedurës administrative, shërbeu si mundësi për studentët që të thellojnë njohuritë teorike lidhur me drejtësinë administrative dhe të njihen më nga afër me rolin dhe funksionin e Gjykatës Administrative në sistemin e drejtësisë.

Bashkëpunimi me Fakultetin Juridik të Universitetit të Prishtinës synohet të vazhdohet dhe të avancohet edhe më tutje, në të ardhmen.

Gjykata Administrative vlerëson rëndësinë e bashkëpunimit me institucionet akademike dhe mbetet e përkushtuar ndaj transparencës institucionale, informimit të publikut dhe avancimit të edukimit juridik, në funksion të forcimit të sundimit të ligjit dhe të mbrojtjes së të drejtave ligjore të qytetarëve.

14/10/2026

Kryetari i Gjykatës Administrative takoi Komisionin për Administrimin e Gjykatave të Këshillit Gjyqësor të Kosovës


Prishtinë, 14 tetor 2026 – Kryetari i Gjykatës Administrative, Kreshnik Kaçiu, priti në takim Komisionin për Administrimin e Gjykatave të Këshillit Gjyqësor të Kosovës (KGJK), të kryesuar nga gjyqtari Fahret Vellija. Në takim morën pjesë edhe anëtarët e Komisionit, gjyqtari Besnik Bislimaj, profesori Ahmet Imami, si dhe përfaqësues të Sekretariatit të KGJK-së.

Gjatë takimit u diskutuan çështje që ndërlidhen me funksionimin, sfidat dhe administrimin e Gjykatës Administrative, si gjykatë e re dhe e specializuar në fushën e drejtësisë administrative.

Kryetari Kaçiu kërkoi përkrahjen e Komisionit, duke theksua veçmas si nevojë imediate funksionalizimin e zyrës së financave dhe atë të dorëzuesve.

Nga ana e tij, kryesuesi i Komisionit për Administrimin e Gjykatave, Fahret Vellija, shprehu gatishmërinë për të ofruar përkrahje maksimale, brenda mundësive dhe kapaciteteve ekzistuese, me qëllim të mbështetjes së funksionimit sa më efikas të Gjykatës Administrative.

Po ashtu, mes tjerash, u diskutua edhe për dorëzimin e parashtresave, vonesat në kthimin e fletëkthesave nga Posta, raportimin e saktë e periodik të të dhënave statistikore, si dhe procesin e pranimit, regjistrimit dhe arkivimit të dosjeve të lëndëve në mënyrë fizike dhe elektronike. Në takim u theksua edhe rëndësia e nevojës dhe nismat që gjykata ka ndërmarrë që të avancoj më tutje komunikimin elektronik me institucionet publike dhe avokatët.

07/10/2026

Kryetari i Gjykatës Administrative takoi shefin e zyrës ligjore të Kampit Bondsteel

Prishtinë, 07 tetor 2026 – Kryetari i Gjykatës Administrative, Kreshnik Kaçiu, priti në takim Major Hector Zayas, Shef i Zyrës Ligjore në Kampin Bondsteel, ku u diskutua për organizimin, mbarëvajtjen e punës dhe sfidat e Gjykatës Administrative, si një gjykatë e re dhe e specializuar për drejtësinë administrative.

Kryetari Kaçiu e vlerësoi rëndësinë e takimeve të tilla, të cilat tha se kontribuojnë në forcimin e bashkëpunimit, teksa theksoi prioritet e tij në drejtimin e gjykatës.

Nga ana e tij, Major Hector Zayas, Shef i Zyrës Ligjore në Kampin Bondsteel, e uroi Kaçiun për zgjedhjen si kryetar, duke i dëshiruar mbarësi dhe suksese në punë. Gjatë bashkëbisedimit ai ofroi përkrahjen e plotë për Gjykatën Administrative.

Tutje, në takim u shpreh gatishmëria për vazhdimin e komunikimit dhe bashkëpunimit në të ardhmen, në përputhje me përgjegjësitë dhe kompetencat e institucioneve përkatëse.